ബ്രിട്ടിഷ് കൊളംബിയ: കാട്ടുതീയെ തുടർന്ന് ഒഴിപ്പിക്കൽ ഉത്തരവ് നേരിട്ടിരുന്ന ബ്രിട്ടിഷ് കൊളംബിയയിലെ ക്ലിന്റൺ ഗ്രാമത്തിലെ താമസക്കാർക്ക് വീടുകളിലേക്ക് മടങ്ങാൻ അനുമതി. പേയർ ലേക്ക്, ഫിഫ്റ്റിനൈൻ ക്രീക്ക് കാട്ടുതീകളെ തുടർന്ന് ഏർപ്പെടുത്തിയിരുന്ന ഒഴിപ്പിക്കൽ ഉത്തരവുകൾ ഭാഗികമായി അലർട്ടുകളാക്കി മാറ്റിയതോടെയാണ് ഏകദേശം 373 പ്രോപ്പർട്ടികളിലെ താമസക്കാർക്ക് തിരിച്ചെത്താൻ വഴിയൊരുങ്ങിയത്.
ക്ലിന്റൺ–പവില്യൻ റോഡിന്റെ ചില ഭാഗങ്ങൾ, ഹൈവേ 97-ലെ നിർദ്ദിഷ്ട മേഖലകൾ, ബിഗ് ബാർ ലേക്ക്, ബീവർഡാം ലേക്ക്, ചാസം, ലിറ്റിൽ ബിഗ് ബാർ ലേക്ക്, മെഡോ ലേക്ക്, മെഡോ ലേക്ക് റോഡ് എന്നിവിടങ്ങളിലാണ് നിയന്ത്രണങ്ങളിൽ ഇളവ് വരുത്തിയത്. എന്നാൽ ക്ലിന്റണിന്റെ പടിഞ്ഞാറ് ഭാഗത്ത് കെല്ലി ലേക്ക് സബ്സ്റ്റേഷനിൽ നിന്ന് വടക്കോട്ട് റീജിയണൽ ഡിസ്ട്രിക്ട് അതിർത്തി വരെയുള്ള പ്രദേശങ്ങളിൽ പേയർ ലേക്ക് കാട്ടുതീയുടെ ഭീഷണി തുടരുന്നതിനാൽ ഒഴിപ്പിക്കൽ ഉത്തരവ് ഇപ്പോഴും നിലവിലുണ്ട്.
READ MORE ; സീരിയൽ കില്ലർ കഥാപാത്രങ്ങളോടുള്ള താൽപര്യം; ഒന്റാറിയോയിൽ അധ്യാപികയെ കുത്തിക്കൊന്ന് 14കാരൻ
താമസക്കാർ മടങ്ങിയെത്തുമ്പോൾ പ്രദേശത്തെ പല സേവനങ്ങളും പരിമിതമായിരിക്കുകയോ ലഭ്യമാകാതിരിക്കുകയോ ചെയ്യുമെന്ന് ക്ലിന്റൺ മേയർ റോളണ്ട് സ്റ്റാങ്കെ മുന്നറിയിപ്പ് നൽകി. വീടുകളിലേക്ക് മടങ്ങുന്നതിന് മുമ്പ് വെള്ളം പരിശോധിക്കണമെന്നും, സാധ്യമെങ്കിൽ കുപ്പിവെള്ളം ഉപയോഗിക്കണമെന്നും അധികൃതർ നിർദേശിച്ചു. തീപിടിത്തത്തിൽ കേടുപാടുകൾ സംഭവിച്ചിട്ടില്ലെങ്കിലും റഫ്രിജറേറ്ററും ഫ്രീസറും പരിശോധിക്കണം. കേടായിട്ടില്ലാത്തവ വൃത്തിയാക്കുമ്പോൾ ഗ്ലൗസ്, കണ്ണ് സംരക്ഷണം, N95 മാസ്ക് എന്നിവ ഉപയോഗിക്കണമെന്നും നിർദേശമുണ്ട്.
പുകയും ചാരവും കരിയും അവശിഷ്ടങ്ങളും ആരോഗ്യപ്രശ്നങ്ങൾക്ക് കാരണമാകാമെന്നും അധികൃതർ മുന്നറിയിപ്പ് നൽകി. ക്ലിന്റണിൽ ഒഴിപ്പിക്കലിന് കാരണമായ പേയർ ലേക്ക് കാട്ടുതീ തന്നെയാണ് നിലവിൽ ബ്രിട്ടിഷ് കൊളംബിയയിലെ ഏറ്റവും വലിയ കാട്ടുതീ. വെള്ളിയാഴ്ച രാത്രിയിലെ കണക്കനുസരിച്ച് തീ ഏകദേശം 1,574 ചതുരശ്ര കിലോമീറ്റർ പ്രദേശത്തേക്ക് വ്യാപിച്ചിട്ടുണ്ട്.
തെക്കൻ ബ്രിട്ടിഷ് കൊളംബിയയിൽ നിരവധി കാട്ടുതീകൾ തുടരുന്നതിനിടെ 45 ഒഴിപ്പിക്കൽ ഉത്തരവുകളിലായി ആയിരക്കണക്കിന് ആളുകൾ ഇപ്പോഴും വീടുകളിൽ നിന്ന് മാറിനിൽക്കുകയാണ്. ഈ വർഷം കാട്ടുതീ സീസൺ നേരത്തെയും ശക്തമായും ആരംഭിച്ചതോടെ ഏകദേശം 400 കെട്ടിടങ്ങൾ ഇതിനകം നശിച്ചു. ബ്രാഡ്ലി ക്രീക്ക് കാട്ടുതീയിൽ ഒകനഗൻ ഇന്ത്യൻ ബാൻഡ് റിസർവിലെ ഏകദേശം 230 വീടുകളും നഷ്ടപ്പെട്ടിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
