ഹാലിഫാക്സ്: ത്വക്ക് കാൻസർ നേരത്തെ കണ്ടെത്തുന്നതിനും വിദഗ്ധ പരിശോധനയ്ക്കുള്ള കാത്തിരിപ്പ് സമയം കുറയ്ക്കുന്നതിനുമായി നോവ സ്കോഷ്യയിലും പ്രിൻസ് എഡ്വേർഡ് ഐലൻഡിലും ‘സ്പോട്ട്’ (SPOT – Suspicious Photo Overview and Triage) പൈലറ്റ് പദ്ധതി ആരംഭിച്ചു. ഡാൽഹൗസി സർവകലാശാലയിലെ ചർമ്മരോഗ വിദഗ്ധനായ ഡോ. റിച്ചാർഡ് ലാങ്ലിയുടെ നേതൃത്വത്തിലാണ് കാനഡയിൽ ത്വക്ക് കാൻസർ കൂടുതലായി കാണപ്പെടുന്ന ഈ പ്രദേശങ്ങളിൽ പരിശോധന തുടങ്ങിയിരിക്കുന്നത്.
പദ്ധതിയുടെ ഭാഗമായി ഹാലിഫാക്സ് വാട്ടർഫ്രണ്ടിൽ ശനിയാഴ്ച സംഘടിപ്പിച്ച താൽക്കാലിക പരിശോധനാ ക്യാമ്പിൽ നൂറുകണക്കിന് ആളുകളാണ് സൗജന്യ പരിശോധനയ്ക്കായി എത്തിയത്. പ്രത്യേക ക്യാമറ ഉപയോഗിച്ച് ശരീരത്തിലെ സംശയാസ്പദമായ പാടുകളുടെയും മറുകുകളുടെയും ഡെർമോസ്കോപ്പിക് ചിത്രങ്ങളെടുത്ത് വിദഗ്ധ ഡോക്ടർമാർക്ക് അയച്ചുനൽകുന്ന രീതിയാണ് ഇതിൽ പിന്തുടരുന്നത്.
ആവശ്യമുള്ള രോഗികൾക്ക് കൃത്രിമ ബുദ്ധി (AI) സാങ്കേതികവിദ്യയുടെ സഹായത്തോടെ ഉടനടി തുടർചികിത്സ ഉറപ്പാക്കും. വരും ആഴ്ചകളിൽ കൂടുതൽ ഫാർമസികൾ വഴി ഈ സേവനം പൊതുജനങ്ങളിലേക്ക് എത്തിക്കാനാണ് ഗവേഷക സംഘത്തിന്റെ തീരുമാനം. ത്വക്കിലുണ്ടാകുന്ന മാറ്റങ്ങൾ കൃത്യസമയത്ത് തിരിച്ചറിയുന്നത് രോഗമുക്തി സാധ്യത വർധിപ്പിക്കുമെന്നും ആരോഗ്യമേഖലയിലെ കാത്തിരിപ്പ് സമയം കുറയ്ക്കാൻ ഇത് സഹായിക്കുമെന്നും മെഡിക്കൽ വിദ്യാർഥികളുടെ സഹകരണത്തോടെ പ്രവർത്തിക്കുന്ന സംഘം വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
'Spot' initiative in Nova Scotia for early detection of skin cancer; huge turnout for screening.
