ലോസ് ഏഞ്ചൽസ്: ഫിഫ ലോകകപ്പിൽ ആവേശകരമായ ക്വാർട്ടർ ഫൈനൽ മത്സരത്തിൽ നിലവിലെ ചാമ്പ്യന്മാരായ സ്പെയിൻ ഇന്ന് ബെൽജിയത്തെ നേരിടും. ലോസ് ഏഞ്ചൽസിൽ ഇന്ത്യൻ സമയം രാത്രി 12.30-നാണ് മത്സരം നടക്കുക. ഇന്നത്തെ മത്സരത്തിൽ വിജയിക്കുന്ന ടീമിന് സെമി ഫൈനലിൽ ഫ്രാൻസ് ആയിരിക്കും എതിരാളികൾ.
ഗ്രൂപ്പ് ഘട്ടത്തിലെ ആദ്യ മത്സരത്തിൽ കേപ് വർദെയോട് അപ്രതീക്ഷിത സമനില വഴങ്ങിയെങ്കിലും, ശക്തമായ തിരിച്ചുവരവാണ് സ്പെയിൻ ടൂർണമെന്റിൽ നടത്തിയത്. പ്രീ ക്വാർട്ടറിൽ പോർച്ചുഗലിനെ ഏകപക്ഷീയമായ ഒരു ഗോളിന് പരാജയപ്പെടുത്തിയാണ് അവർ അവസാന എട്ടിൽ ഇടംപിടിച്ചത്. പൗ കുബാർസി, ലാപോർട്ട്, പെഡ്രോ പോറോ, മാർക് കുക്കുറയ്യ എന്നിവരടങ്ങുന്ന പ്രതിരോധ നിരയും ഗോൾകീപ്പർ ഉനായി സിമോണുമാണ് സ്പെയിനിന്റെ പ്രധാന കരുത്ത്. മുന്നേറ്റത്തിൽ ലമീൻ യമാൽ, ഒയാർസബാൽ, ഡാനി ഓൾമോ എന്നിവരും മധ്യനിരയിൽ പെഡ്രി, റോഡ്രി എന്നിവരും മികച്ച ഫോമിലാണ്.
മറുഭാഗത്ത്, ഗ്രൂപ്പ് ഘട്ടത്തിൽ സ്ഥിരതയില്ലാത്ത പ്രകടനം നടത്തിയ ശേഷമാണ് ബെൽജിയം ഫോമിലേക്ക് ഉയർന്നത്. ആദ്യ രണ്ട് മത്സരങ്ങളിൽ സമനില വഴങ്ങിയ അവർ, പിന്നീട് ന്യൂസിലന്റിനെ 5-1 നും, നോക്കൗട്ടിൽ സെനഗലിനെ 3-2 നും പരാജയപ്പെടുത്തി. പ്രീ ക്വാർട്ടറിൽ അമേരിക്കയെ 4-1 ന് തകർത്താണ് ബെൽജിയത്തിന്റെ വരവ്. കെവിൻ ഡി ബ്രൂയ്ൻ, ലുക്കാക്കു, ട്രോസാർഡ്, ജെറമി ഡോക്കു എന്നിവരടങ്ങുന്ന മുന്നേറ്റനിര മികച്ച ഫോമിലാണ്. മുൻകാലങ്ങളിലെ ‘ഗോൾഡൻ ജനറേഷൻ’ താരങ്ങളുടെ സാന്നിധ്യമില്ലെങ്കിലും, മികച്ച പോരാട്ടവീര്യത്തോടെയാണ് ബെൽജിയം ക്വാർട്ടർ പോരാട്ടത്തിന് ഇറങ്ങുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Spain and Belgium brace for a fierce battle; who will reach the semi-finals today?
