ഒട്ടാവയുടെ സെൻട്രെറ്റൗൺ പ്രദേശത്തുള്ള 129 വർഷം പഴക്കമുള്ള ചരിത്രപ്രധാനമായ സോമെർസെറ്റ് ഹൗസിന്റെ നവീകരണ പ്രവർത്തനങ്ങൾ ആരംഭിച്ചു. 2007-ൽ കെട്ടിടത്തിന്റെ കിഴക്ക് ഭാഗം തകർന്ന് വീഴുകയും പടിഞ്ഞാറ് ഭാഗം പലകകൾ കൊണ്ട് മറയ്ക്കുകയും ചെയ്തതിന് ശേഷം, 17 വർഷമായി ഈ കെട്ടിടം ഒഴിഞ്ഞു കിടക്കുകയായിരുന്നു. ഇപ്പോൾ കെട്ടിടത്തിന്റെ കിഴക്ക് ഭാഗത്ത് കോൺക്രീറ്റ് തറയുടെ പണികൾ പൂർത്തിയായതായി കൗൺസിലർ ഏരിയൽ ട്രോസ്റ്റർ അറിയിച്ചു.
വർഷങ്ങളായി നഗരത്തിന്റെ ഒരു “കണ്ണിലെ കരടെന്നപ്പോലെ” ഈ കെട്ടിടം നിലനിന്നിരുന്നു. 2013, 2017, 2023 വർഷങ്ങളിൽ കെട്ടിടത്തിന്റെ പുനർവികസന പദ്ധതികൾക്ക് നഗര പൈതൃക സമിതിയുടെ അനുമതി ലഭിച്ചിരുന്നെങ്കിലും, ഉടമകളായ ടി.കെ. ഹോൾഡിംഗ്സ് നിർമ്മാണ പ്രവർത്തനങ്ങൾ ആരംഭിക്കാത്തത് വ്യാപകമായ എതിർപ്പിന് കാരണമായിരുന്നു.
സെൻട്രെറ്റൗൺ കമ്യൂണിറ്റി അസോസിയേഷൻ പൈതൃക വിഭാഗം അധ്യക്ഷൻ ജാക്ക് ഹന്നയുടെ അഭിപ്രായത്തിൽ, ഇങ്ങനെ ഒഴിഞ്ഞു കിടക്കുന്ന കെട്ടിടങ്ങൾ നഗരത്തിന്റെ ഭാവിയെയും ആകർഷണ ശക്തിയെയും ദോഷകരമായി ബാധിക്കും.
സോമെർസെറ്റ് ഹൗസ് പോലുള്ള കെട്ടിടങ്ങൾ “ശ്രദ്ധയില്ലാതെ നശിപ്പിക്കപ്പെട്ട” ഉദാഹരണങ്ങളാണെന്നും, ഉടമകളെ നിർബന്ധിതമായി നടപടിയെടുക്കാൻ പ്രേരിപ്പിക്കുന്നതിന് നഗരത്തിന് കൂടുതൽ നിയമങ്ങളും നികുതി നയങ്ങളും ആവശ്യമാണെന്നും അദ്ദേഹം പറഞ്ഞു. ട്രോസ്റ്ററും ഈ അഭിപ്രായത്തോട് യോജിച്ചു.
പല കെട്ടിട ഉടമകളും പലിശ നിരക്ക് കുറയുന്നതിനായി കാത്തിരിക്കുന്നതിനാൽ കെട്ടിടങ്ങൾ ഒഴിഞ്ഞു തന്നെ കിടക്കുന്നു. ഇവർക്ക് മേൽ സമ്മർദ്ദം ചെലുത്തുന്നതിനായി ഉപയോഗിക്കാതെ കിടക്കുന്ന വ്യാപാര കെട്ടിടങ്ങൾക്കുള്ള പ്രത്യേക നികുതിപോലുള്ള നയങ്ങൾ ആലോചിക്കേണ്ട സമയമായെന്ന് ട്രോസ്റ്റർ ചൂണ്ടിക്കാട്ടി. 2026-ലെ തിരഞ്ഞെടുപ്പിൽ വീണ്ടും മത്സരിക്കുന്ന പക്ഷം, ഇത്തരം നഗര പ്രശ്നങ്ങൾ ഇല്ലാതാക്കുന്നതിനുള്ള നിയമനിർമ്മാണത്തിന് താൻ മുൻഗണന നൽകുമെന്നും ട്രോസ്റ്റർ വ്യക്തമാക്കി.
