മാത്യു പെറി ഹൗസ് പദ്ധതിയിൽ മാറ്റം: ഹോളിവുഡ് നടന്റെ പേര് ഒഴിവാക്കാൻ തീരുമാനം

ഒട്ടാവ: ഒട്ടാവയിലെ ബൈങ് ഡ്രൈവിൽ നിർമ്മിക്കുന്ന ലഹരി വിമുക്തർക്കായുള്ള പുനരധിവാസ ഭവന പദ്ധതിക്ക് ഹോളിവുഡ് നടൻ മാത്യു പെറിയുടെ പേര് നൽകില്ലെന്ന് ബന്ധപ്പെട്ട സംഘടനകൾ അറിയിച്ചു. ‘മാത്യു പെറി ഹൗസ്’ എന്ന് നാമകരണം ചെയ്യാൻ നിശ്ചയിച്ചിരുന്ന പദ്ധതിയിൽ നിന്നും നടന്റെ പേരിലുള്ള സംഘടനയുമായുള്ള പങ്കാളിത്തം അവസാനിപ്പിക്കാൻ ഒട്ടാവ കമ്മ്യൂണിറ്റി ഹൗസിംഗ്, സാലസ്, ദി റോയൽ എന്നീ സ്ഥാപനങ്ങൾ സംയുക്തമായി തീരുമാനിച്ചു. സംഘടനകളുടെ ദൗത്യങ്ങളിലും മുൻഗണനകളിലും ഉള്ള വ്യത്യാസം പരിഗണിച്ചാണ് ഈ തീരുമാനമെന്നും എന്നാൽ മാറ്റം സൗഹാർദ്ദപരമായ ചർച്ചകളിലൂടെയാണ് ഉണ്ടായതെന്നും അധികൃതർ പ്രസ്താവനയിലൂടെ വ്യക്തമാക്കി.

പങ്കാളിത്തത്തിൽ മാറ്റം വന്നുവെങ്കിലും പദ്ധതിയുടെ നിർമ്മാണ പ്രവർത്തനങ്ങൾ തടസ്സമില്ലാതെ തുടരുമെന്ന് ദി റോയൽ അറിയിച്ചു. 2025 മെയ് മാസത്തിൽ ശിലാസ്ഥാപനം നടത്തിയ ഈ പദ്ധതിയിൽ മൂന്ന് കെട്ടിടങ്ങളിലായി 160 ഓളം താമസ യൂണിറ്റുകളാണ് ഒരുങ്ങുന്നത്. ലഹരി വിമുക്ത ചികിത്സ പൂർത്തിയാക്കിയവർക്ക് കരിയർ ട്രെയിനിംഗ്, മെന്റൽ ഹെൽത്ത് സപ്പോർട്ട്, ആർട്ട് തെറാപ്പി എന്നിവ നൽകുന്നതിനായി വിഭാവനം ചെയ്ത പദ്ധതി 2027-ൽ പൂർത്തിയാകുമെന്നാണ് പ്രതീക്ഷിക്കുന്നത്. പദ്ധതിയുടെ പുതിയ പേര് ഇതുവരെ പ്രഖ്യാപിച്ചിട്ടില്ല.

മാത്യു പെറിയുടെ പോരാട്ടങ്ങളിൽ നിന്ന് പ്രചോദനം ഉൾക്കൊണ്ട് മികച്ച ചികിത്സാ സൗകര്യങ്ങൾ ലഭ്യമാക്കാനാണ് തങ്ങളുടെ സംഘടന തുടർന്നും ശ്രമിക്കുന്നതെന്ന് മാത്യു പെറി ഹൗസ് ഓർഗനൈസേഷൻ വക്താവ് കെയ്‌ല ഫോളോ അറിയിച്ചു. പങ്കാളികളായ മറ്റ് സംഘടനകൾക്ക് അവർ ആശംസകൾ നേർന്നു. ലഹരി ഉപയോഗവുമായി ബന്ധപ്പെട്ട പ്രശ്നങ്ങൾ നേരിടുന്നവർക്ക് സഹായം എത്തിക്കുന്നതിൽ തങ്ങൾ ഒറ്റക്കെട്ടാണെന്നും എന്നാൽ ഓരോ സംഘടനയും വ്യത്യസ്തമായ രീതിയിലായിരിക്കും ഈ ലക്ഷ്യം നടപ്പിലാക്കുകയെന്നും ദി റോയൽ വക്താവ് അലീസ നാഡർ ഇമെയിൽ സന്ദേശത്തിലൂടെ വ്യക്തമാക്കി.

പ്രശസ്ത ടെലിവിഷൻ പരമ്പരയായ ‘ഫ്രണ്ട്‌സി’ലൂടെ അന്താരാഷ്ട്ര ശ്രദ്ധ നേടിയ മാത്യു പെറി ഒട്ടാവയിലാണ് വളർന്നത്. ദീർഘകാലം ലഹരി വിമോചനത്തിനായി പോരാടിയ അദ്ദേഹം 2023-ലാണ് അന്തരിച്ചത്. മറ്റുള്ളവരെ ലഹരി വിമുക്തരാക്കാൻ സഹായിക്കുക എന്ന ലക്ഷ്യത്തോടെ അദ്ദേഹത്തിന്റെ കുടുംബവും സുഹൃത്തുക്കളും ചേർന്ന് 2024-ൽ ഒരു ചാരിറ്റബിൾ ഫൗണ്ടേഷൻ രൂപീകരിച്ചിരുന്നു. ഈ ഫൗണ്ടേഷന്റെ ഭാഗമായാണ് ഒട്ടാവയിലെ പദ്ധതിക്ക് മാത്യു പെറിയുടെ പേര് നൽകാൻ നേരത്തെ തീരുമാനിച്ചിരുന്നത്.

Changes to Matthew Perry House project: Decision to remove Hollywood actor’s name

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt