ബംഗ്ലാദേശിന് ഐക്യദാർഢ്യം; ലോകകപ്പിൽ നിന്ന് പാകിസ്ഥാൻ പിന്മാറാൻ സാധ്യത, പകരം ഈ കുഞ്ഞൻ ടീം!

ക്രിക്കറ്റ് ലോകത്തെ ഞെട്ടിച്ചുകൊണ്ട് 2026 ടി20 ലോകകപ്പിൽ നിന്ന് പാകിസ്ഥാൻ പിന്മാറാൻ ഒരുങ്ങുന്നതായി റിപ്പോർട്ടുകൾ. സുരക്ഷാ കാരണങ്ങളാൽ ഇന്ത്യയിലേക്ക് വരാൻ വിസമ്മതിച്ച ബംഗ്ലാദേശിനെ ഐസിസി ടൂർണമെന്റിൽ നിന്ന് ഔദ്യോഗികമായി നീക്കിയിരുന്നു. ഇതിന് പിന്നാലെയാണ് ബംഗ്ലാദേശിന് ഐക്യദാർഢ്യം പ്രഖ്യാപിച്ച് തങ്ങളും പിന്മാറിയേക്കുമെന്ന് പിസിബി ചെയർമാൻ മൊഹ്സിൻ നഖ്‌വി സൂചിപ്പിച്ചത്. ബംഗ്ലാദേശിന്റെ മത്സരങ്ങൾ ഇന്ത്യയ്ക്ക് പുറത്ത് നടത്തണമെന്ന പാകിസ്ഥാന്റെ ആവശ്യം ഐസിസി തള്ളിയതാണ് നിലവിലെ പ്രതിസന്ധിക്ക് കാരണം.

ബംഗ്ലാദേശിന് പകരം സ്കോട്ട്‌ലൻഡിനെ ടൂർണമെന്റിൽ ഉൾപ്പെടുത്തിയ ഐസിസി നടപടിക്കെതിരെ രൂക്ഷമായ വിമർശനമാണ് പാകിസ്ഥാൻ ഉയർത്തുന്നത്. ഇന്ത്യ-പാക് മത്സരങ്ങൾക്കായി ‘ഹൈബ്രിഡ് മോഡൽ’ അനുവദിക്കാമെങ്കിൽ ബംഗ്ലാദേശിന്റെ കാര്യത്തിലും അത് ആകാമായിരുന്നു എന്ന് നഖ്‌വി വാദിക്കുന്നു. ഐസിസിയുടേത് ഇരട്ടത്താപ്പാണെന്നും ബംഗ്ലാദേശിനെ പിന്തുണച്ച ഏക രാജ്യം പാകിസ്ഥാനാണെന്നും അദ്ദേഹം വ്യക്തമാക്കി. ബംഗ്ലാദേശിനെ പുറത്താക്കിയ നടപടി നീതിയുക്തമല്ലെന്നാണ് പിസിബിയുടെ നിലപാട്.

ലോകകപ്പിൽ പങ്കെടുക്കണമോ എന്നത് കായികപരമായ തീരുമാനത്തിനപ്പുറം രാജ്യത്തിന്റെ നയപരമായ തീരുമാനമാണെന്ന് പാക് ആഭ്യന്തര മന്ത്രി കൂടിയായ മൊഹ്സിൻ നഖ്‌വി പറഞ്ഞു. പ്രധാനമന്ത്രി ഷെഹ്ബാസ് ഷെരീഫുമായി ആലോചിച്ച ശേഷം മാത്രമേ അന്തിമ തീരുമാനം എടുക്കൂ. നിലവിൽ പ്രധാനമന്ത്രി വിദേശത്താണെന്നും അദ്ദേഹം തിരിച്ചെത്തിയാലുടൻ ചർച്ചകൾ നടത്തുമെന്നും നഖ്‌വി അറിയിച്ചു. സർക്കാർ ‘വേണ്ട’ എന്ന് തീരുമാനിച്ചാൽ പാകിസ്ഥാൻ ലോകകപ്പിൽ നിന്ന് പൂർണ്ണമായും വിട്ടുനിൽക്കും.

പാകിസ്ഥാൻ ലോകകപ്പിൽ നിന്ന് പിന്മാറുകയാണെങ്കിൽ പകരം റാങ്കിംഗിൽ താഴെയുള്ള ഉഗാണ്ട ടൂർണമെന്റിൽ ഇടംപിടിക്കും. ബംഗ്ലാദേശിന്റെ സ്ഥാനം സ്കോട്ട്‌ലൻഡിന് ലഭിച്ചത് പോലെ പാകിസ്ഥാന്റെ മത്സരക്രമം ഉഗാണ്ടയ്ക്ക് ലഭിക്കും. ഗ്രൂപ്പ് എയിൽ ഇന്ത്യ, യുഎസ്എ, നെതർലൻഡ്സ്, നമീബിയ എന്നിവർക്കൊപ്പമാണ് പാകിസ്ഥാൻ ഉൾപ്പെട്ടിരിക്കുന്നത്. പാകിസ്ഥാൻ പിന്മാറിയാൽ ഈ ഗ്രൂപ്പിലെ മത്സരങ്ങൾ ഉഗാണ്ട കളിക്കും.

പാകിസ്ഥാൻ പിന്മാറുന്നതോടെ ക്രിക്കറ്റ് ലോകം ഏറെ കാത്തിരിക്കുന്ന ഫെബ്രുവരി 15-ലെ ഇന്ത്യ-പാക് പോരാട്ടം ഇല്ലാതാകും. പകരം അതേ ദിവസം ഇന്ത്യ ഉഗാണ്ടയെയാകും നേരിടുക. ടൂർണമെന്റിലെ ഏറ്റവും ആവേശകരമായ മത്സരം നഷ്ടപ്പെടുന്നത് ഐസിസിക്കും വലിയ സാമ്പത്തിക ആഘാതമുണ്ടാക്കും. നിലവിൽ പാകിസ്ഥാന്റെ എല്ലാ മത്സരങ്ങളും ശ്രീലങ്കയിലാണ് നിശ്ചയിച്ചിട്ടുള്ളതെങ്കിലും രാജ്യങ്ങൾ തമ്മിലുള്ള രാഷ്ട്രീയ തർക്കങ്ങൾ ടൂർണമെന്റിന്റെ ശോഭ കെടുത്തുകയാണ്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

Solidarity for Bangladesh; Pakistan likely to withdraw from World Cup, replaced by this young team!