ഒന്റാരിയോ ; കാനഡയിൽ പെട്രോൾ വില വീണ്ടും ഉയർന്നതോടെ യാത്രക്കാർക്കും ദീർഘദൂര വാഹനമോടിക്കുന്നവർക്കും അധിക സാമ്പത്തിക ഭാരം നേരിടേണ്ടി വരുന്നു. ഒരു രാത്രികൊണ്ട് ഏകദേശം അഞ്ച് സെന്റ് വരെ വർധിച്ചതിനെ തുടർന്ന് രാജ്യത്തെ ശരാശരി പെട്രോൾ വില ലിറ്ററിന് 1.72 കാനഡ ഡോളറിലെത്തി. പ്രത്യേകിച്ച് ടൊറന്റോയിൽ നിന്ന് കോട്ടേജ് മേഖലകളിലേക്കും മറ്റ് ദീർഘദൂര യാത്രകൾക്കുമായി പുറപ്പെട്ടവർക്ക് ഈ വർധന കനത്ത തിരിച്ചടിയായി. ഇന്ധനച്ചെലവ് വർധിച്ചെങ്കിലും അതിനെ നിയന്ത്രിക്കാൻ സാധിക്കില്ലെന്ന നിലപാടിലാണ് പലരും.
അതേസമയം, നിലവിലെ ആഗോള രാഷ്ട്രീയ സംഘർഷങ്ങൾക്കിടയിലും ഈ വാരാന്ത്യത്തിൽ ചില വിപണികളിൽ പെട്രോൾ വില ലിറ്ററിന് രണ്ട് മുതൽ നാല് സെന്റ് വരെ കുറയാൻ സാധ്യതയുണ്ടെന്ന് ഊർജവിദഗ്ധർ വിലയിരുത്തുന്നു. അമേരിക്കയും ഇറാനും തമ്മിലുള്ള സംഘർഷം വീണ്ടും ശക്തമായെങ്കിലും, എണ്ണവിപണി അതിനെ വലിയ തോതിൽ പരിഗണിച്ചിട്ടില്ലെന്നാണ് വിദഗ്ധരുടെ വിലയിരുത്തൽ. സംഘർഷം പൂർണ യുദ്ധത്തിലേക്ക് നീങ്ങില്ലെന്നും, പേർഷ്യൻ ഗൾഫിൽ നിന്നുള്ള എണ്ണക്കപ്പലുകളുടെ ഗതാഗതം തുടരുമെന്ന പ്രതീക്ഷയാണ് വിപണിയിൽ ഇപ്പോൾ നിലനിൽക്കുന്നത്.
എന്നാൽ ഈ ആശ്വാസം ദീർഘകാലം തുടരുമെന്നുറപ്പില്ലെന്നാണ് വിപണി നിരീക്ഷകർ മുന്നറിയിപ്പ് നൽകുന്നത്. ലോകത്തെ വിവിധ രാജ്യങ്ങളിലെ തന്ത്രപ്രധാന എണ്ണശേഖരങ്ങൾ കുറഞ്ഞുവരുന്നതും അമേരിക്കയിലെ എണ്ണശേഖരം ജൂലൈ അവസാനത്തോടെ കൂടുതൽ താഴാനിടയുള്ളതുമാണ് ആശങ്ക ഉയർത്തുന്നത്. വിതരണക്കുറവ് യാഥാർഥ്യമായാൽ ജൂലൈ അവസാനമോ ഓഗസ്റ്റ് ആദ്യമോ മുതൽ പെട്രോൾ വില വീണ്ടും ഉയരാൻ സാധ്യതയുണ്ടെന്നാണ് വിദഗ്ധരുടെ പ്രവചനം. കഴിഞ്ഞ വർഷത്തെ ഇതേ കാലയളവിനെ അപേക്ഷിച്ച് ഇപ്പോഴും പെട്രോൾ വില ലിറ്ററിന് ഏകദേശം 40 സെന്റ് കൂടുതലാണെന്നും അവർ ചൂണ്ടിക്കാട്ടുന്നു.
Slight relief over the weekend; fuel prices in Canada rose again.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
