ബ്രിട്ടീഷ് കൊളംബിയ; ട്രാൻസ്-കാനഡ ഹൈവേയിൽ Self-driving ടെസ്ല കാറുകളുടെ ഡ്രൈവിംഗ് സീറ്റിലിരുന്ന് ഉറങ്ങി യാത്ര ചെയ്ത രണ്ടുപേരെ ബി.സി. ഹൈവേ പട്രോൾ (BCHP) പിടികൂടി. വാഹനങ്ങളിലെ സുരക്ഷാ സംവിധാനങ്ങൾ ദുരുപയോഗം ചെയ്യുന്നവർക്കെതിരെ കടുത്ത നടപടിയുണ്ടാകുമെന്ന് അധികൃതർ മുന്നറിയിപ്പ് നൽകി.
ആഗസ്റ്റ് 27-ന് ലാംഗ്ലിയിലൂടെ കടന്നുപോയ ട്രാൻസ്-കാനഡ ഹൈവേയിൽ അമിതവേഗതയിൽ സഞ്ചരിച്ച കറുത്ത ടെസ്ല കാറിലാണ് ആദ്യ സംഭവം ശ്രദ്ധയിൽപ്പെട്ടത്.
ഡ്രൈവർ സ്റ്റിയറിംഗ് വീലിൽ പിടിക്കാതെ കണ്ണടച്ച് ഉറങ്ങുന്നത് കണ്ട പട്രോളിംഗ് ഉദ്യോഗസ്ഥൻ ഉടൻ തന്നെ വാഹനം തടഞ്ഞുനിർത്തുകയായിരുന്നു. ശ്രദ്ധയില്ലാതെ വാഹനമോടിച്ചതിന് 368 ഡോളറും, ലൈസൻസ് ഹാജരാക്കാത്തതിന് 81 ഡോളറും ഉൾപ്പെടെ ഡ്രൈവർക്ക് പിഴ ചുമത്തി. “Self-driving കാറിന്റെ ഗുണദോഷങ്ങളെക്കുറിച്ച് ഉറങ്ങുന്ന ഡ്രൈവർമാരുമായി വാദിക്കാൻ പോലീസിന് താല്പര്യമില്ല. ബി.സിയിൽ ഇത് പൂർണ്ണമായും നിയമവിരുദ്ധമാണെന്നും ബി.സി. ഹൈവേ പട്രോൾ സർജന്റ് മൈക്കൽ മക്ലാഫ്ലിൻ വ്യക്തമാക്കി.
ഇതിനുമുമ്പ് ആഗസ്റ്റ് 11-ന് നോർത്ത് വാൻകൂവറിലെ ഹൈവേയിലൂടെ സഞ്ചരിച്ച മറ്റൊരു ടെസ്ല ഡ്രൈവറും ഉറങ്ങുന്നതിനിടെ പിടിയിലായിരുന്നു. സമീപ വാഹനത്തിലെ യാത്രികൻ പകർത്തിയ വീഡിയോ ദൃശ്യങ്ങളുടെ അടിസ്ഥാനത്തിലാണ് മാപ്പിൾ റിഡ്ജ് സ്വദേശിയായ ഡ്രൈവറെ തിരിച്ചറിഞ്ഞ് 368 ഡോളർ പിഴ ചുമത്തിയത്. ജൂലൈ മാസത്തിൽ റെവൽസ്റ്റോക്കിന് സമീപം സമാനമായ രീതിയിൽ ടെസ്ല ഡ്രൈവർ ഉറങ്ങുന്ന വീഡിയോ സോഷ്യൽ മീഡിയയിൽ വൈറലായിരുന്നു.
Also Read : Express Entry Draw: 2026 സെപ്റ്റംബർ 3-ന് നടന്ന നറുക്കെടുപ്പിന്റെ വിശദാംശങ്ങൾ ഇതാ
Self-driving കാറുകളിൽ ഡ്രൈവർമാർ ഉറങ്ങിപ്പോകുന്നത് തടയാനുള്ള നിരീക്ഷണ സംവിധാനങ്ങൾ വളരെ എളുപ്പത്തിൽ മറികടക്കാൻ സാധിക്കുമെന്ന് പ്രമുഖ ടെക് വെബ്സൈറ്റായ Electrek.co എഡിറ്റർ-ഇൻ-ചീഫ് ഫ്രെഡ് ലാംബെർട്ട് ചൂണ്ടിക്കാട്ടുന്നു. ഡ്രൈവിംഗ് സീറ്റിലിരുന്ന് ഗെയിം കളിക്കുന്നതും സിനിമ കാണുന്നതുമായ ദൃശ്യങ്ങൾ ആളുകൾ പങ്കുവെക്കാറുണ്ടെന്നും, ഇത്തരം അനാസ്ഥ കടുത്ത അപകടങ്ങൾക്ക് വഴിതെളിക്കുമെന്നും അദ്ദേഹം മുന്നറിയിപ്പ് നൽകുന്നു.
ബ്രിട്ടീഷ് കൊളംബിയയിലെ മോട്ടോർ വെഹിക്കിൾ ആക്ട് പ്രകാരം പൂർണ്ണ സ്വയംനിയന്ത്രിത വാഹനങ്ങൾ പൊതുനിരത്തിലിറക്കുന്നത് നിരോധിച്ചിട്ടുണ്ട്. ലെയ്ൻ ചേഞ്ച് അസിസ്റ്റ്, ഓട്ടോമാറ്റിക് ബ്രേക്കിംഗ് തുടങ്ങിയ പ്രാഥമിക ഫീച്ചറുകൾക്ക് മാത്രമാണ് നിലവിൽ അനുമതിയുള്ളത്. ഡ്രൈവർ അസിസ്റ്റ് ഫീച്ചറുകൾ പ്രവർത്തിക്കുമ്പോഴും വാഹനത്തിന്റെ പൂർണ്ണ നിയന്ത്രണവും ഉത്തരവാദിത്തവും ഡ്രൈവർക്ക് തന്നെയാണെന്നും നിയമലംഘനം നടത്തുന്നവർക്ക് ഇൻഷുറൻസ് പരിരക്ഷ ലഭിക്കില്ലെന്നും ഇൻഷുറൻസ് കോർപ്പറേഷൻ ഓഫ് ബ്രിട്ടീഷ് കൊളംബിയ വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
