ഫ്രാൻസ് : യൂറോപ്പിൽ സർവകാല റെക്കോർഡുകൾ ഭേദിച്ച് തുടരുന്ന കനത്ത ഉഷ്ണതരംഗത്തെ തുടർന്ന് ഫ്രാൻസിൽ കഴിഞ്ഞ ആഴ്ച മാത്രം ആയിരത്തിലധികം അധിക മരണങ്ങൾ റിപ്പോർട്ട് ചെയ്തു. ഫ്രാൻസിലെ പൊതുജനാരോഗ്യ ഏജൻസിയാണ് ഞായറാഴ്ച ഈ വിവരം വ്യക്തമാക്കിയത്. ആഗോള ശരാശരിയേക്കാൾ ഇരട്ടി വേഗത്തിൽ ചൂടുപിടിക്കുന്ന, ലോകത്തിലെ ഏറ്റവും വേഗത്തിൽ താപനില ഉയരുന്ന ഭൂഖണ്ഡം യൂറോപ്പാണെന്ന് ലോകാരോഗ്യ സംഘടനയുടെ (ഡബ്ല്യു.എച്ച്.ഒ) മേധാവി ടെഡ്രോസ് അഥാനോം ഗെബ്രിയേസസ് മുന്നറിയിപ്പ് നൽകി. പൗരന്മാരെ സംരക്ഷിക്കാൻ കൂടുതൽ നടപടികൾ സ്വീകരിക്കണമെന്ന് അദ്ദേഹം ആവശ്യപ്പെട്ടു.
കഴിഞ്ഞ വാരന്ത്യത്തിൽ പല യൂറോപ്യൻ രാജ്യങ്ങളിലും താപനില റെക്കോർഡുകൾ തകർത്തു. ജർമ്മനിയിൽ തുടർച്ചയായ മൂന്നാം ദിവസവും 41.7 ഡിഗ്രി സെൽഷ്യസ് എന്ന റെക്കോർഡ് താപനില രേഖപ്പെടുത്തിയപ്പോൾ, പോളണ്ടിൽ 40.5 ഡിഗ്രി സെൽഷ്യസും ചെക് റിപ്പബ്ലിക്കിൽ 41.1 ഡിഗ്രി സെൽഷ്യസും രേഖപ്പെടുത്തി. കാലാവസ്ഥാ വ്യതിയാനമില്ലാതെ ഈ അവസ്ഥ സാധ്യമാകില്ലെന്ന് ശാസ്ത്രജ്ഞരുടെ കൂട്ടായ്മയായ വേൾഡ് വെതർ ആട്രിബ്യൂഷൻ നടത്തിയ പഠനത്തിൽ വ്യക്തമാക്കുന്നു. ഫ്രാൻസിൽ കനത്ത ചൂട് അനുഭവപ്പെട്ട ബുധൻ, വ്യാഴം, വെള്ളി ദിവസങ്ങളിലാണ് മരണസംഖ്യ ഉയർന്നത്. മരിച്ചവരിൽ 85 ശതമാനവും 65 വയസ്സോ അതിൽ കൂടുതലോ പ്രായമുള്ളവരാണ്.
തീവ്രമായ ചൂടിനെത്തുടർന്ന് ജർമ്മനിയിലെ ഗോറിഷ്ഹൈഡ്, ട്രെയ്സൻ എന്നിവിടങ്ങളിലെ വനങ്ങളിൽ കനത്ത ലാംഷാബലുകൾ പൊട്ടിപ്പുറപ്പെട്ടു. രണ്ടാം ലോകമഹായുദ്ധകാലത്തെ പൊട്ടാത്ത വെടിക്കോപ്പുകൾ അവശേഷിക്കുന്ന മേഖലകളായതിനാൽ അഗ്നിശമന പ്രവർത്തനങ്ങൾ സങ്കീർണ്ണമായി. ട്രെയ്സനിൽ സ്ഫോടനങ്ങൾ ഉണ്ടായതിനെ തുടർന്ന് 650 ഓളം ആളുകളെ ഞായറാഴ്ച ഒഴിപ്പിച്ചു. ബെർലിനിൽ ചൂടുമായി ബന്ധപ്പെട്ട ആരോഗ്യപ്രശ്നങ്ങളാൽ ശനിയാഴ്ച മാത്രം 500 ഓളം ആംബുലൻസ് സർവീസുകൾ അധികമായി നടത്തേണ്ടി വന്നു. ബ്രാൻഡൻബർഗ് ഗേറ്റിന് മുന്നിൽ തടിച്ചുകൂടിയ ജനങ്ങൾക്ക് ആശ്വാസമേകാൻ പോലീസ് വാട്ടർ കാനുകൾ ഉപയോഗിച്ച് വെള്ളം തളിച്ചു.
കനത്ത ചൂടിന് പിന്നാലെ യൂറോപ്പിൽ പലയിടങ്ങളിലും ശക്തമായ ഇടിമിന്നലോട് കൂടിയ കൊടുങ്കാറ്റും അനുഭവപ്പെട്ടു. സ്വീഡനിലെ ടോസെലില സോമർലാൻഡ് അമ്യൂൺസ്മെന്റ് പാർക്കിൽ ഇടിമിന്നലേറ്റ് മൂന്ന് മുതിർന്നവർക്ക് പരിക്കേറ്റു. ശനിയാഴ്ച പുതിയ താപനില റെക്കോർഡ് രേഖപ്പെടുത്തിയ ഡെന്മാർക്കിൽ ഞായറാഴ്ച രാവിലെ വരെ 1,156 ഇടിമിന്നലുകൾ ഉണ്ടായതായി ഔദ്യോഗിക മാധ്യമം റിപ്പോർട്ട് ചെയ്തു. ശക്തമായ ചൂട് കാരണം ജർമ്മനിയിലെ ഹൈവേകളുടെ കോൺക്രീറ്റ് പ്രതലങ്ങൾ തകരുകയും ട്രെയിൻ ഗതാഗതം തടസ്സപ്പെടുകയും ചെയ്തു. ലൈപ്സിഗ് നഗരത്തിൽ ചൂട് കാരണം ട്രാക്കുകൾക്ക് കേടുപാടുകൾ സംഭവിച്ചതിനെ തുടർന്ന് ട്രാം സർവീസുകൾ നിർത്തിവെച്ചു.
Severe heatwave in Europe; Death toll rises in France, reports
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
