സസ്കറ്റുൺ: സസ്കറ്റുണിലെ സെന്റ് പോൾസ് ആശുപത്രിയിൽ ചികിത്സയ്ക്കും മറ്റുമായി എത്തിയവരിൽ നിന്ന് വൻ ആയുധ ശേഖരം പിടിച്ചെടുത്ത് സുരക്ഷാ ജീവനക്കാർ. കഴിഞ്ഞ ഏതാനും മാസങ്ങളായി നടത്തിയ പരിശോധനകളിൽ കണ്ടെടുത്ത മാരകായുധങ്ങളുടെയും മറ്റ് നിരോധിത വസ്തുക്കളുടെ ദൃശ്യങ്ങൾ സസ്കാച്ചെവാൻ എൻഡിപി പുറത്തുവിട്ടു. ആശുപത്രിയിൽ മെറ്റൽ ഡിറ്റക്ടറുകൾ സ്ഥാപിക്കുന്നതിന് മുൻപ് നടന്ന പരിശോധനകളിലാണ് ഇവയെല്ലാം സുരക്ഷാ വിഭാഗം പിടിച്ചെടുത്തത്.
വാർത്താസമ്മേളനത്തിൽ നാല് വലിയ മേശകളിലായി നിരത്തിവെച്ചാണ് പിടിച്ചെടുത്ത വസ്തുക്കൾ പ്രദർശിപ്പിച്ചത്. മാനിഫെസ്റ്റോ അനുസരിച്ച് ഓരോ മേശയിലും ഉള്ളത് ഓരോ മാസത്തെ കാലയളവിൽ മാത്രം കണ്ടെടുത്ത ആയുധങ്ങളാണ്. ഹാക്സോകൾ, വെട്ടുകത്തി, ഹാച്ചറ്റുകൾ, ഗോൾഫ് ക്ലബ്ബുകൾ, ഇലക്ട്രിക് സോകൾ എന്നിവയും ഇതിൽ ഉൾപ്പെടുന്നു. ഇവ കൂടാതെ നിരവധി സ്വിച്ച് ബ്ലേഡുകളും മൂർച്ചയേറിയ മറ്റ് കത്തികളും സുരക്ഷാ പരിശോധനയിൽ കണ്ടെത്തിയിട്ടുണ്ട്.
മാരകമായ ആയുധങ്ങൾക്ക് പുറമെ എയർ പിസ്റ്റൾ, വെടിയുണ്ടകൾ അടങ്ങിയ ബാഗ്, ബെയർ സ്പ്രേ, നഞ്ചക്കുകൾ എന്നിവയും പിടിച്ചെടുത്തവയിലുണ്ട്. കഴിഞ്ഞ നവംബറിൽ തോക്കും കത്തികളുമായി എത്തിയ ഒരാൾ ആശുപത്രി ജീവനക്കാരെ ഭീഷണിപ്പെടുത്തിയ സംഭവത്തിന് പിന്നാലെയാണ് സുരക്ഷാ പരിശോധന കർശനമാക്കിയത്. ഇത്തരത്തിൽ വ്യാപകമായി ആയുധങ്ങൾ ആശുപത്രിയിലേക്ക് എത്തുന്നത് രോഗികളുടെയും ജീവനക്കാരുടെയും സുരക്ഷയ്ക്ക് വലിയ ഭീഷണിയാണെന്ന് എൻഡിപി വിമർശിച്ചു.
ആശുപത്രി കവാടങ്ങളിൽ നിലവിൽ മെറ്റൽ ഡിറ്റക്ടറുകൾ സ്ഥാപിച്ചിട്ടുണ്ട്. സുരക്ഷാ ക്രമീകരണങ്ങൾ വർധിപ്പിച്ചതോടെ ആയുധങ്ങളുമായി എത്തുന്നവരുടെ എണ്ണത്തിൽ കുറവുണ്ടാകുമെന്നാണ് അധികൃതരുടെ പ്രതീക്ഷ. സുരക്ഷാ ജീവനക്കാരുടെ എണ്ണം വർധിപ്പിക്കുന്നതിനും പുതിയ സുരക്ഷാ നയങ്ങൾ നടപ്പിലാക്കുന്നതിനും ആവശ്യമായ നടപടികൾ സ്വീകരിച്ചുവരികയാണെന്നും ആശുപത്രി അധികൃതർ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Deadly weapons among patients; Security staff seize large cache of weapons at Saskatoon St. Paul's Hospital
