പ്രിൻസ് ആൽബർട്ട്: ആഗോള വ്യാപാര തർക്കങ്ങളെത്തുടർന്ന് പ്രതിസന്ധിയിലായ സസ്കാച്ചെവാൻ പ്രവിശ്യയിലെ തൊഴിലാളികളെ സഹായിക്കുന്നതിനായി ഫെഡറൽ-പ്രവിശ്യാ സർക്കാരുകൾ സംയുക്തമായി പദ്ധതി പ്രഖ്യാപിച്ചു. ‘കാനഡ-സസ്കാച്ചെവാൻ വർക്ക്ഫോഴ്സ് താരിഫ് റെസ്പോൺസ്’ എന്ന പേരിൽ നടപ്പിലാക്കുന്ന പദ്ധതിക്കായി 15.6 മില്യൺ ഡോളറാണ് സർക്കാർ നിക്ഷേപിക്കുന്നത്. നിലവിലുള്ള താരിഫ് തർക്കങ്ങൾ ബാധിച്ച തൊഴിലാളികൾക്ക് ജോലി നിലനിർത്താനും പുതിയ തൊഴിലവസരങ്ങൾ കണ്ടെത്താനും ഈ തുക വിനിയോഗിക്കും.
മൂന്ന് വർഷ കാലയളവിനുള്ളിൽ വിതരണം ചെയ്യുന്ന ഈ ധനസഹായത്തിലൂടെ ഏകദേശം 1,800 തൊഴിലാളികൾക്ക് നേരിട്ട് പിന്തുണ ലഭിക്കുമെന്നാണ് പ്രതീക്ഷിക്കുന്നത്. പ്രധാനമായും സ്റ്റീൽ, സോഫ്റ്റ്വുഡ് ലംബർ മേഖലകളിലെ തൊഴിലാളികളെയാണ് പദ്ധതി ലക്ഷ്യമിടുന്നത്. പ്രവിശ്യയിലുടനീളമുള്ള ‘SaskJobs’ ഓഫീസുകൾ വഴിയും വിവിധ പരിശീലന പങ്കാളികൾ വഴിയും സഹായങ്ങൾ ലഭ്യമാക്കും. തൊഴിൽരഹിതരായവർക്ക് ഡിമാൻഡ് കൂടുതലുള്ള മേഖലകളിൽ പ്രത്യേക പരിശീലനം നൽകുന്നതിനൊപ്പം എംപ്ലോയ്മെന്റ് ഇൻഷുറൻസ് ആനുകൂല്യങ്ങളുള്ളവർക്കും പദ്ധതിയുടെ ഗുണം ലഭിക്കും.
ആഗോള സാമ്പത്തിക അനിശ്ചിതത്വങ്ങൾക്കിടയിലും പ്രവിശ്യയുടെ തൊഴിൽ വിപണിയെ ശക്തിപ്പെടുത്തുകയാണ് ഈ നീക്കത്തിലൂടെ ലക്ഷ്യമിടുന്നതെന്ന് സസ്കാച്ചെവാൻ ഇമ്മിഗ്രേഷൻ മന്ത്രി എറിക് ഷ്മാൽസ് അറിയിച്ചു. നിലവിൽ 5.6 ശതമാനമാണ് പ്രവിശ്യയിലെ തൊഴിലില്ലായ്മ നിരക്ക്. ഇത് ദേശീയ ശരാശരിയേക്കാൾ കുറവാണെങ്കിലും, വ്യാപാര തർക്കങ്ങൾ സമ്പദ്വ്യവസ്ഥയെ ബാധിക്കാതിരിക്കാൻ മുൻകരുതൽ നടപടികൾ ആവശ്യമാണെന്ന് അധികൃതർ വ്യക്തമാക്കി. ഫെഡറൽ സർക്കാർ വർഷംതോറും നൽകുന്ന 65 മില്യൺ ഡോളറിന്റെ പതിവ് ഫണ്ടിംഗിന് പുറമെയാണ് ഈ പ്രത്യേക പാക്കേജ് അനുവദിച്ചിരിക്കുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Business crisis: Saskatchewan announces new package to help workers
