സാസ്‌കറ്റൂണ്‍: സാസ്‌കറ്റൂണില്‍ ഈ വര്‍ഷത്തെ റോഡ് നിര്‍മാണ പ്രവര്‍ത്തനങ്ങള്‍ അവസാനഘട്ടത്തിലേക്ക്. എന്നാല്‍, നഗരത്തില്‍ മഞ്ഞുവീഴ്ച തുടങ്ങിയതോടെ ചില പദ്ധതികള്‍ പൂര്‍ത്തിയാക്കുന്നത് വൈകിയേക്കുമെന്ന ആശങ്കയുണ്ട്. പ്രധാന നിര്‍മാണ പ്രവര്‍ത്തനങ്ങള്‍ സമയബന്ധിതമായി പൂര്‍ത്തിയാക്കാനാകുമെന്നാണ് നഗരസഭയുടെ പ്രതീക്ഷ.
നിര്‍മാണം അവസാനിക്കാത്തതിനാല്‍ റോഡുകള്‍ അടച്ചിടുന്നതും വഴിതിരിച്ചുവിടുന്നതും യാത്രക്കാരെ ബുദ്ധിമുട്ടിക്കുന്നുണ്ട്. കാലാവസ്ഥ അനുകൂലമല്ലെങ്കില്‍ ചിലയിടങ്ങളില്‍ താല്‍ക്കാലികമായി ടാര്‍ ചെയ്ത് റോഡുകള്‍ ഉപയോഗയോഗ്യമാക്കും. മാത്രമല്ല, സ്ഥിരമായ ടാറിങ് അടുത്ത വസന്തകാലത്തേക്ക് മാറ്റിവെക്കേണ്ടിവന്നേക്കും.
വാനുസ്‌കിവിന്‍ റോഡ് ഈ വാരാന്ത്യത്തോടെ തുറന്നുകൊടുക്കാനാണ് നഗരസഭയുടെ ലക്ഷ്യം. 25-ാം സ്ട്രീറ്റിലും 22-ാം സ്ട്രീറ്റിലും ജലവിതരണ, മലിനജല പൈപ്പ് ജോലികള്‍ പൂര്‍ത്തിയായി. ഇനി ടാറിങ് മാത്രമാണ് ബാക്കിയുള്ളത്. കോളേജ് ഡ്രൈവില്‍ ശൈത്യകാലത്ത് ഇരുദിശകളിലേക്കും രണ്ട് പാതകള്‍ വീതം തുറന്നിടാനും പദ്ധതിയുണ്ട്. ജൂലൈയില്‍ ഒരു ട്രക്ക് മേല്‍പ്പാലത്തില്‍ ഇടിച്ചുണ്ടായ കേടുപാടുകള്‍ പരിഹരിക്കുന്നതിനായി വാനുസ്‌കിവിന്‍ റോഡിലെ ജോലി പൂര്‍ത്തിയായശേഷം 51-ാം സ്ട്രീറ്റിന് സമീപമുള്ള ഐഡില്‍വൈല്‍ഡ് ഡ്രൈവില്‍ അറ്റകുറ്റപ്പണി നടത്തും. ഇതിനായി തെക്കോട്ടുള്ള ഒരു പാത നാലുമുതല്‍ ആറാഴ്ചവരെ അടച്ചിടേണ്ടിവരും.
ALSO READ: ഡിസംബർ മുതൽ കാലാവസ്ഥയിൽ മാറ്റം; മഞ്ഞുമൂടുന്ന കാനഡയിൽ ഇത്തവണ വരുന്നത് ചൂടുകാലമോ?
നിര്‍മാണം നീണ്ടുപോകുന്നതില്‍ നഗരവാസികള്‍ക്കിടയില്‍ അതൃപ്തിയുണ്ട്. മാസങ്ങളായി ഗതാഗത നിയന്ത്രണങ്ങളും വഴിതിരിച്ചുവിടലുകളും നേരിടുന്നവര്‍ ജോലികള്‍ എത്രയും വേഗം പൂര്‍ത്തിയാകുമെന്ന പ്രതീക്ഷയിലാണ്. അതേസമയം, റോഡുകളുടെ അറ്റകുറ്റപ്പണികള്‍ ആവശ്യമായതിനാല്‍ നിര്‍മാണം അനിവാര്യമാണെന്ന് മറ്റു ചിലര്‍ ചൂണ്ടിക്കാട്ടുന്നു. കാലാവസ്ഥ അനുകൂലമായാല്‍ നിര്‍മാണം തുടരാനാകുമെന്നാണ് നഗരസഭയുടെ പ്രതീക്ഷ. മഞ്ഞും തണുപ്പും ശക്തമാകുന്നതോടെ പൂര്‍ത്തിയാക്കാനാകാത്ത ജോലികള്‍ വസന്തകാലത്തേക്ക് മാറ്റേണ്ടിവന്നേക്കും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
‘Saskatoon Road Construction Delays’
