സസ്കാച്വാന്: അമേരിക്കന്‍ തീരുവകളുടെ ആഘാതം നേരിടാന്‍ സസ്കാച്വാന് പ്രവിശ്യയിലെ എട്ട് പദ്ധതികള്‍ക്ക് 1.12 കോടി ഡോളറിലധികം ധനസഹായം പ്രഖ്യാപിച്ച് ഫെഡറല്‍ സര്‍ക്കാര്‍. ബിസിനസുകളുടെ വളര്‍ച്ചയ്ക്കും പുതിയ വിപണികള്‍ കണ്ടെത്തുന്നതിനും തൊഴിലവസരങ്ങള്‍ പിന്തുണയ്ക്കുന്നതിനുമാണ് ഈ ധനസഹായം. ഗ്രാമവികസന ചുമതലയുള്ള സ്റ്റേറ്റ് സെക്രട്ടറി ബക്ലി ബെലാഞ്ചര്‍ വെള്ളിയാഴ്ചയാണ് ധനസഹായം പ്രഖ്യാപിച്ചത്.
പ്രെയ്‌റീസ് കാനഡയുടെ റീജിയണല്‍ ടാരിഫ് റെസ്പോണ്‍സ് ഇനിഷ്യേറ്റീവ്, ബിസിനസ് സ്‌കെയില്‍-അപ്പ് ആന്‍ഡ് പ്രൊഡക്ടിവിറ്റി പദ്ധതികള്‍ വഴിയാണ് തുക നല്‍കുന്നത്. ഉല്‍പ്പാദനം വര്‍ധിപ്പിക്കാനും വിദേശ വിപണികളിലേക്ക് കടക്കാനും സാമ്പത്തിക അനിശ്ചിതത്വങ്ങളെ നേരിടാനും ഈ സഹായം ബിസിനസുകളെ പ്രാപ്തരാക്കുമെന്ന് സര്‍ക്കാര്‍ അറിയിച്ചു.
നാല് പദ്ധതികള്‍ക്ക് ഏകദേശം 76 ലക്ഷം ഡോളര്‍ തിരിച്ചടയ്‌ക്കേണ്ട ധനസഹായമായി ലഭിക്കും. നോര്‍ത്തേണ്‍ ന്യൂട്രിയന്റ്‌സിന് 31 ലക്ഷം ഡോളറും എം.പി.എസ്. വെല്‍ഡിങ്ങിന് ഏകദേശം 26 ലക്ഷം ഡോളറും അനുവദിച്ചു. സോളോ ഇറ്റാലിയ ഫൈന്‍ പാസ്തയ്ക്കും സൗത്ത് വെസ്റ്റ് ടെര്‍മിനലിനും ചേര്‍ന്ന് 11.5 ലക്ഷം ഡോളറും ടൈറ്റന്‍ ക്ലീന്‍ എനര്‍ജി പ്രോജക്ട്‌സ് കോര്‍പ്പറേഷന് 7,87,500 ഡോളറും ലഭിക്കും.
ALSO READ: ‘കാനഡ ഞങ്ങളുടെ ശത്രുവല്ല’; വ്യാപാരയുദ്ധത്തിൽ ട്രംപിനോട് വിയോജിച്ച് മിഷിഗൺ റിപ്പബ്ലിക്കൻ സ്ഥാനാർഥി
മറ്റ് നാല് പദ്ധതികള്‍ക്ക് ഏകദേശം 36 ലക്ഷം ഡോളര്‍ തിരിച്ചടയ്‌ക്കേണ്ടതില്ലാത്ത സഹായമായി നല്‍കും. ത്രീ ഫാര്‍മേഴ്‌സ് ഫുഡ്‌സ്, ഹണി ബീ മാനുഫാക്ചറിങ്, സോളോ ഇറ്റാലിയ ഫൈന്‍ പാസ്ത, സൗത്ത് വെസ്റ്റ് ടെര്‍മിനല്‍, വെസ്റ്റേണ്‍ കനേഡിയന്‍ ഷോര്‍ട്ട് ലൈന്‍ റെയില്‍വേ അസോസിയേഷന്‍ എന്നിവയുടെ വികസനത്തിനും സൗകര്യങ്ങള്‍ മെച്ചപ്പെടുത്തുന്നതിനുമാണ് ഈ സഹായം.
നോര്‍ത്തേണ്‍ ന്യൂട്രിയന്റ്‌സിന്റെ സള്‍ഫര്‍ വളത്തിന്റെ ഉല്‍പ്പാദനശേഷി പ്രതിവര്‍ഷം 1.5 ലക്ഷം മെട്രിക് ടണ്ണായി മൂന്നിരട്ടിയാക്കാന്‍ ഈ ധനസഹായം സഹായിക്കുമെന്ന് കമ്പനി സിഇഒ റോസ് ഗ്വെന്തര്‍ പറഞ്ഞു. പദ്ധതികള്‍ 147-ലധികം തൊഴിലവസരങ്ങള്‍ക്ക് പിന്തുണ നല്‍കുമെന്നാണ് ഫെഡറല്‍ സര്‍ക്കാരിന്റെ കണക്ക്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
‘Saskatchewan Tariff Relief Funding’
