കണ്ണീരിലമർന്ന് സാർനിയ; വെടിയേറ്റു മരിച്ച ഡെയ്ൻ നിസ്ബെറ്റിന് വിട നൽകി ആയിരങ്ങൾ

ഒന്റാറിയോ: ലാംബ്ടൺ കോളേജ് പബ്ബിലുണ്ടായ വെടിവെപ്പിൽ കൊല്ലപ്പെട്ട ഇരുപതുകാരൻ ഡെയ്ൻ നിസ്ബെറ്റിന് നാടിന്റെ വിടവാങ്ങൽ. വെള്ളിയാഴ്ച ടെമ്പിൾ ബാപ്റ്റിസ്റ്റ് ചർച്ചിൽ നടന്ന സംസ്കാര ചടങ്ങുകളിൽ സാനിയ നഗരത്തെ ഒന്നടങ്കം ദുഃഖത്തിലാഴ്ത്തി എണ്ണൂറോളം പേർ പങ്കെടുത്തു. ലാംബ്ടൺ കൗണ്ടിയിലെ പ്രമുഖരും ജനപ്രതിനിധികളും ഡെയ്‌ന്റെ സുഹൃത്തുക്കളും കുടുംബാംഗങ്ങളും ചടങ്ങിൽ സംബന്ധിച്ചു. സംഭവത്തിൽ മുഖ്യപ്രതിക്കായി കാനഡയിലുടനീളം പോലീസ് തിരച്ചിൽ ശക്തമാക്കിയിരിക്കുകയാണ്.

ഏപ്രിൽ പത്തിന് ലാംബ്ടൺ കോളേജിലെ ലയൺസ് ഡെൻ പബ്ബിന് പുറത്തുണ്ടായ തർക്കമാണ് വെടിവെപ്പിൽ കലാശിച്ചത്. പരിക്കേറ്റ ഡെയ്ൻ പിന്നീട് മരണത്തിന് കീഴടങ്ങുകയായിരുന്നു. നഗരത്തിന് താങ്ങാനാവുന്നതിലുമപ്പുറമുള്ള ദുരന്തമാണിതെന്ന് സാർനിയ മേയർ മൈക്ക് ബ്രാഡ്ലി പറഞ്ഞു. ഡെയ്‌നോടുള്ള ആദരസൂചകമായി സാർനിയ സിറ്റി ഹാളിന് മുന്നിലെ പതാക പകുതി താഴ്ത്തിക്കെട്ടി. “നമ്മുടെ പ്രാർത്ഥനകൾ ഡെയ്‌ന്റെ കുടുംബത്തോടൊപ്പമാണ്. സാർനിയ-ലാംബ്ടൺ സമൂഹത്തെ സംബന്ധിച്ചിടത്തോളം ഇത് അതീവ ദുഃഖകരമായ നിമിഷമാണ്,” സിറ്റി കൗൺസിലർ ആദം കിൽനർ അനുസ്മരിച്ചു. അസാമാന്യ ധൈര്യമുള്ള, മാതാപിതാക്കളുടെ പ്രിയപ്പെട്ട മകനായിരുന്നു ഡെയ്‌നെന്ന് കുടുംബം ഓർത്തെടുത്തു.

ദേവാലയത്തിലെ ശുശ്രൂഷകൾക്ക് ശേഷം ലേക് വ്യൂ സെമിത്തേരിയിലേക്കായിരുന്നു വിലാപയാത്ര. പോലീസ്, ഫയർഫോഴ്സ് വാഹനങ്ങളുടെ അകമ്പടിയോടെ നടന്ന യാത്രയിൽ സാർനിയ നിവാസികൾ വഴിയോരങ്ങളിൽ അണിനിരന്നു. മികച്ച ഒരു ഹോക്കി താരം കൂടിയായിരുന്ന ഡെയ്‌നോടുള്ള ആദരസൂചകമായി, കായികരംഗത്തെ പാരമ്പര്യമനുസരിച്ച് ഹോക്കി സ്റ്റിക്കുകൾ നടപ്പാതയിൽ തട്ടിയാണ് നാട്ടുകാർ വിട നൽകിയത്. പരിക്കേറ്റ താരം ഐസ് ഹോക്കി ഫീൽഡിൽ നിന്നും മടങ്ങുമ്പോൾ നൽകുന്ന ആദരമാണിതെന്ന് ചടങ്ങിന് നേതൃത്വം നൽകിയ പാരാമെഡിക് സ്റ്റീഫൻ അഡ്‌ലിംഗ്ടൺ പറഞ്ഞു.

അതേസമയം, കേസിലെ മുഖ്യപ്രതിയായ 24 വയസ്സുകാരൻ ക്യോ ‘ചിൻ’ ഡോയെ (Kyaw “Chin” Doe) പിടികൂടാൻ കാനഡ പോലീസ് വ്യാപകമായ തിരച്ചിൽ തുടരുകയാണ്. ഇയാൾക്കെതിരെ രണ്ടാം ഡിഗ്രി കൊലപാതക കുറ്റമാണ് ചുമത്തിയിരിക്കുന്നത്. പ്രതിക്കായി രാജ്യം മുഴുവൻ ലുക്ക് ഔട്ട് നോട്ടീസ് പുറപ്പെടുവിച്ചതായി സാനിയ പോലീസ് ചീഫ് ഡെറക് ഡേവിസ് അറിയിച്ചു. സംഭവവുമായി ബന്ധപ്പെട്ട് മൂന്ന് പേരെ ഇതിനോടകം പോലീസ് അറസ്റ്റ് ചെയ്തിട്ടുണ്ട്. പ്രതി ഉടൻ പിടിയിലാകുമെന്നും മറ്റ് ഏജൻസികളുമായി സഹകരിച്ച് അന്വേഷണം പുരോഗമിക്കുകയാണെന്നും പോലീസ് വ്യക്തമാക്കി.

Sarnia in tears as thousands bid farewell to Dane Nisbet, who was shot dead

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt