മരണം എപ്പോൾ വേണമെന്ന് തീരുമാനിക്കാം! കുട്ടികളുടെ എഴുത്തുകാരൻ റോബർട്ട് മഞ്ചിന് കാനഡയിൽ ദയാവധത്തിന് അനുമതി

ടൊറന്റോ: ‘ദി പേപ്പർ ബാഗ് പ്രിൻസസ്’, ‘ലവ് യു ഫോർ എവർ’ തുടങ്ങിയ ശ്രദ്ധേയമായ ബാലസാഹിത്യ കൃതികളിലൂടെ ലോകമെമ്പാടും ആരാധകരുള്ള എഴുത്തുകാരൻ റോബർട്ട് മഞ്ചിന് കാനഡയിൽ ദയാവധത്തിന് അനുമതി ലഭിച്ചു. ഓർമ്മക്കുറവ്, സംസാരശേഷിക്കുറവ് എന്നിവയ്ക്ക് കാരണമാകുന്ന ഡിമെൻഷ്യയും പാർക്കിൻസൺസ് രോഗവും അദ്ദേഹത്തെ ആരോഗ്യപരമായി ഏറെ ബുദ്ധിമുട്ടിക്കുന്ന സാഹചര്യത്തിലാണ് ഈ തീരുമാനം.

80-കാരനായ മഞ്ചിന് 2021-ലാണ് ഡിമെൻഷ്യ സ്ഥിരീകരിക്കുന്നത്. രോഗം മൂലം മറ്റുള്ളവരുമായി സംസാരിക്കുന്നതിനും ഇടപഴകുന്നതിനും ബുദ്ധിമുട്ട് അനുഭവപ്പെടുമ്പോൾ ദയാവധം പരിഗണിക്കാനാണ് അദ്ദേഹത്തിൻ്റെ തീരുമാനം. ദയാവധത്തിന് അനുമതി ലഭിച്ചെങ്കിലും അതിനായി ഒരു പ്രത്യേക തീയതി തീരുമാനിച്ചിട്ടില്ലെന്ന് അദ്ദേഹം ഒരു മാഗസിന് നൽകിയ അഭിമുഖത്തിൽ പറഞ്ഞു. ലൂ ഗെറിഗ്സ് രോഗം ബാധിച്ച തൻ്റെ സഹോദരന്റെ മരണം നേരിൽ കണ്ടതാണ് ഈ തീരുമാനമെടുക്കാൻ തന്നെ പ്രേരിപ്പിച്ചതെന്നും മഞ്ച് വെളിപ്പെടുത്തി.

അഞ്ച് വർഷം മുൻപേ തന്നെ ദയാവധം തിരഞ്ഞെടുക്കാനുള്ള പിതാവിന്റെ തീരുമാനം കുടുംബം അംഗീകരിച്ചിരുന്നതായി മകൾ ജൂലി ഫെയ്‌സ്ബുക്കിൽ കുറിച്ചു. പിതാവിന്റെ ആരോഗ്യനില മോശമാണെന്നോ, അദ്ദേഹം ഉടൻ മരിക്കാൻ പോകുകയാണെന്നോ അഭിമുഖത്തിൽ പറയുന്നില്ലെന്നും ജൂലി വ്യക്തമാക്കി. മെഡിക്കൽ സഹായത്തോടെയുള്ള മരണത്തെക്കുറിച്ച് പരസ്യമായി സംസാരിക്കാനുള്ള മഞ്ചിന്റെ തീരുമാനം, അദ്ദേഹത്തിൻ്റെ കൃതികൾക്ക് സമൂഹത്തിൽ എത്രത്തോളം സ്വാധീനം ചെലുത്താൻ സാധിക്കുമെന്ന് കാണിക്കുന്നുവെന്ന് പ്രസാധകരായ ‘സ്കോളാസ്റ്റിക്’ ഇൻസ്റ്റാഗ്രാമിൽ കുറിച്ചു.

കാനഡയിൽ ദയാവധം നിയമം

2016-ലാണ് കാനഡയിൽ ദയാവധം നിയമവിധേയമാക്കിയത്. 2021-ൽ നിയമം ഭേദഗതി ചെയ്തതിലൂടെ ഗുരുതരവും ദീർഘകാലമായതുമായ ശാരീരിക ബുദ്ധിമുട്ടുകൾ ഉള്ളവർക്കും ദയാവധത്തിന് അപേക്ഷിക്കാൻ സാധിച്ചു. എങ്കിലും, ദയാവധത്തിന് അനുമതി ലഭിക്കാൻ ഗുരുതരമായതും ചികിത്സയില്ലാത്തതുമായ രോഗം ഉണ്ടായിരിക്കുക, പുറമെ നിന്നുള്ള സമ്മർദ്ദമില്ലാതെ സ്വയം തീരുമാനമെടുക്കുക തുടങ്ങിയ നിബന്ധനകൾ പാലിക്കണം.

രണ്ട് സ്വതന്ത്ര ഡോക്ടർമാർ അപേക്ഷകനെ വിശദമായി പരിശോധിച്ച ശേഷമാണ് അപേക്ഷയ്ക്ക് അംഗീകാരം നൽകുന്നത്. 2023-ലെ കണക്കുകൾ പ്രകാരം കാനഡയിലെ ആകെ മരണങ്ങളിൽ 4.7% വൈദ്യസഹായത്തോടെയുള്ള ദയാവധമായിരുന്നു. ഈ വർഷം ദയാവധം തിരഞ്ഞെടുത്ത 15,300 പേരിൽ 96% പേരും കാൻസർ പോലുള്ള രോഗങ്ങൾ കാരണം ഗുരുതരാവസ്ഥയിലുള്ളവരായിരുന്നു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

robert munsch canadian childrens writer approved for assisted dying