ഒന്റാറിയോ: കാനഡയിൽ ഭക്ഷ്യവില കുതിച്ചുയരുന്ന സാഹചര്യത്തിൽ ഉപഭോക്താക്കൾ പരിസ്ഥിതി സൗഹൃദവും സുസ്ഥിരവുമായ ഉൽപ്പന്നങ്ങൾക്ക് പകരം കുറഞ്ഞ വിലയിലുള്ളവ തിരഞ്ഞെടുക്കാൻ നിർബന്ധിതരാകുന്നതായി പുതിയ പഠനം. മറൈൻ സ്റ്റുവാർഡ്ഷിപ്പ് കാനഡയ്ക്ക് വേണ്ടി ലെഗർ നടത്തിയ ഓൺലൈൻ സർവേയിലാണ് ഈ കണ്ടെത്തൽ. സർവേയിൽ പങ്കെടുത്ത 72 ശതമാനം പേരും ഉയർന്ന വില തങ്ങളുടെ പരിസ്ഥിതി സൗഹൃദ തീരുമാനങ്ങൾക്ക് തടസ്സമാകുന്നു എന്ന് വ്യക്തമാക്കി. ഭൂരിഭാഗം കനേഡിയൻമാരും സുസ്ഥിര ഉൽപ്പന്നങ്ങൾ വാങ്ങാൻ ആഗ്രഹിക്കുന്നുണ്ടെങ്കിലും സാമ്പത്തിക സമ്മർദ്ദം മൂലം പലപ്പോഴും വില കുറഞ്ഞ സാധനങ്ങൾ തിരഞ്ഞെടുക്കേണ്ടി വരുന്നു എന്നാണ് വിലയിരുത്തൽ.
ഭക്ഷ്യവിലക്കയറ്റം മൂലം 62 ശതമാനം ഉപഭോക്താക്കളും വിലയും പരിസ്ഥിതി താൽപ്പര്യങ്ങളും തമ്മിൽ പൊരുത്തപ്പെടുത്താനാവാത്ത പ്രതിസന്ധി നേരിടുന്നുണ്ടെന്ന് സർവേ ചൂണ്ടിക്കാട്ടുന്നു. വാടക പോലുള്ള സ്ഥിരമായ ചെലവുകളിൽ മാറ്റം വരുത്താൻ സാധിക്കാത്തതിനാൽ, ഭക്ഷണത്തിനായുള്ള ചെലവ് കുറച്ചാണ് പലരും കുടുംബ ബജറ്റ് നിയന്ത്രിക്കുന്നത്.
സുസ്ഥിരമായ രീതിയിൽ ഉൽപ്പാദിപ്പിക്കുന്ന സമുദ്രവിഭവങ്ങൾ പോലുള്ള ഉൽപ്പന്നങ്ങൾക്ക് സാധാരണയായി വില കൂടുതലാണെന്നും ഇത് സാധാരണക്കാരെ ഇത്തരം ഉൽപ്പന്നങ്ങളിൽ നിന്ന് അകറ്റുന്നുണ്ടെന്നും ഡൽഹൗസി സർവ്വകലാശാലയിലെ ഗവേഷകൻ സിൽവെയിൻ ചാർലെബോയിസ് പറഞ്ഞു. മിക്ക ഉപഭോക്താക്കളും നിലനിൽപ്പിനായുള്ള പോരാട്ടത്തിലാണെന്നും അദ്ദേഹം കൂട്ടിച്ചേർത്തു.
ഏപ്രിൽ 10 മുതൽ 12 വരെ 18 വയസ്സിന് മുകളിലുള്ള 1,535 കനേഡിയൻമാരിലാണ് സർവേ നടത്തിയത്. സുസ്ഥിര ഉൽപ്പന്നങ്ങളെക്കുറിച്ചുള്ള വ്യക്തമായ ധാരണ ഉപഭോക്താക്കൾക്കിടയിൽ കുറവാണെന്നും പഠനം വ്യക്തമാക്കുന്നു. പ്രാദേശിക ഉൽപ്പന്നങ്ങളും ഓർഗാനിക് സാധനങ്ങളും വാങ്ങുന്നത് സുസ്ഥിരമാണെന്ന് പലരും കരുതുന്നുണ്ടെങ്കിലും അവ എപ്പോഴും പരിസ്ഥിതിക്ക് ഗുണകരമാകണമെന്നില്ല.
ഇത്തരം ഉൽപ്പന്നങ്ങളെ തിരിച്ചറിയാൻ സഹായിക്കുന്ന സർട്ടിഫിക്കേഷൻ ലേബലുകളെക്കുറിച്ച് ഉപഭോക്താക്കൾക്കിടയിൽ അവബോധം കുറവാണ്. ഭക്ഷ്യവിലക്കയറ്റം ബാധിക്കാത്ത ഉയർന്ന വരുമാനമുള്ള 30 ശതമാനം ആളുകൾ ഇത്തരം ഉൽപ്പന്നങ്ങളെ പിന്തുണയ്ക്കുന്നതിൽ വലിയ പങ്ക് വഹിക്കേണ്ടതുണ്ടെന്നും സിൽവെയിൻ ചാർലെബോയിസ് അഭിപ്രായപ്പെട്ടു.
Rising food prices: Canadian consumers abandon sustainable products
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
