ആറ് വർഷം മുമ്പ് സുഹൃത്തുക്കളോടൊപ്പം പുറത്തു പോയ ശേഷം റൈഡ് ഷെയർ ആപ്പിൽ ഒരു വാഹനം ബുക്ക് ചെയ്തപ്പോൾ സുരക്ഷിതമായ ഒരു യാത്രയാണ് താൻ കരുതിയതെന്ന് പറയുകയാണ് എമിലി എന്ന സ്ത്രീ. എന്നാൽ ആ വാഹനം ഓടിച്ച ഡ്രൈവർ അവളെ ലൈംഗികമായി പീഡിപ്പിച്ചു. ഡ്രൈവർ കുറ്റം സമ്മതിച്ച് രണ്ട് വർഷത്തിന് ശേഷം, എമിലി ഡ്രൈവർക്കും റൈഡ് ഷെയർ കമ്പനിക്കുമെതിരെ സിവിൽ കോടതിയിൽ കേസ് കൊടുത്തു. കേസ് ഇപ്പോഴും നടന്നുകൊണ്ടിരിക്കുകയാണ്.
“സുരക്ഷിതമായി വീട്ടിലെത്തിക്കാൻ താൻ റൈഡ് ഷെയർ കമ്പനിയെ ആശ്രയിച്ചു, പകരം അവർ തന്നെ പീഡിപ്പിക്കുന്നയാളുടെ കാറിൽ കയറ്റി,” എമിലി പറഞ്ഞു. എമിലിയുടെ സ്വകാര്യത സംരക്ഷിക്കുന്നതിനായി റേഡിയോ-കാനഡ അവളുടെ പേര് മാറ്റിയിട്ടുണ്ട്. കൂടാതെ റൈഡ് ഷെയർ കമ്പനിയുടെ പേര് വെളിപ്പെടുത്തിയിട്ടില്ല. കഴിഞ്ഞ രണ്ട് വർഷത്തിനിടെ ഗ്രേറ്റർ ടൊറന്റോയിലും ഹാമിൽട്ടൺ ഏരിയയിലും അഞ്ച് റൈഡ് ഷെയർ ഡ്രൈവർമാരെ ലൈംഗികാതിക്രമവുമായി ബന്ധപ്പെട്ട് അറസ്റ്റ് ചെയ്യുകയും ശിക്ഷിക്കുകയും ചെയ്തിട്ടുണ്ട്.
എന്നാൽ ഈ കണക്ക് എത്രത്തോളം കൃത്യമാണെന്ന് വ്യക്തമല്ല. കാരണം, യുഎസിൽ ചെയ്തതുപോലെ, ഊബർ, ലിഫ്റ്റ് തുടങ്ങിയ കമ്പനികൾ കാനഡയിൽ നടന്ന ലൈംഗികാതിക്രമങ്ങളെക്കുറിച്ചുള്ള വിവരങ്ങൾ പുറത്തുവിട്ടിട്ടില്ല. നിരവധി അഭിഭാഷകർ പറയുന്നത്, കമ്പനികൾ ഇത്തരം കേസുകളെക്കുറിച്ച് കൂടുതൽ സുതാര്യത പുലർത്തണമെന്നാണ്. “അവർ സുരക്ഷിതമായ സേവനം എന്ന് പറയുന്നു. അത് എത്രത്തോളം സുരക്ഷിതമാണെന്ന് തങ്ങൾക്ക് കാണിച്ച് തരൂ. അത് തെളിയിക്കൂ,” ടൊറന്റോ അഭിഭാഷക സിമോണ ജെല്ലിനെക് പറഞ്ഞു.
ടൊറന്റോ ആസ്ഥാനമായുള്ള അഭിഭാഷകൻ ഡാരിൽ സിംഗർ കഴിഞ്ഞ അഞ്ച് വർഷത്തിനിടെ റൈഡ് ഷെയർ കമ്പനിക്കെതിരെ ലൈംഗികാതിക്രമം ആരോപിക്കപ്പെട്ട ഏകദേശം ഒരു ഡസനോളം കേസുകളിൽ പ്രവർത്തിച്ചിട്ടുണ്ടെന്ന് പറയുന്നു. അദ്ദേഹത്തിന്റെ മിക്ക കേസുകളും ജിടിഎയിലാണ്. 2019-ൽ, അദ്ദേഹത്തിന്റെ ഒരു ക്ലയന്റ്, ടൊറന്റോയിൽ നിന്നുള്ള ഒരു സ്ത്രീയാണ്, ഊബറിനും ഒരു ഡ്രൈവർക്കുമെതിരെ അവർ 5 ദശലക്ഷം ഡോളറിന്റെ കേസ് കൊടുത്തു. ആ കേസ് ഒത്തുതീർപ്പായെന്നും അദ്ദേഹം പറഞ്ഞു.
2020 മുതൽ റൈഡ് ഷെയറുകളുമായി ബന്ധപ്പെട്ട റിപ്പോർട്ടുകൾ ഒരുപാട് വർദ്ധിച്ചതായി ടൊറന്റോ പോലീസ് വക്താവ് നദീൻ റമദാൻ മാധ്യമങ്ങളോട് പറഞ്ഞു. റൈഡ് ഷെയർ കമ്പനികൾ ഡ്രൈവർമാരെ കൂടുതൽ കർശനമായി സ്ക്രീൻ ചെയ്യണമെന്ന് അഭിഭാഷകൻ ഡാരിൽ സിംഗർ ആവശ്യപ്പെടുന്നു. ടൊറന്റോയിൽ ഊബറിനോ ലിഫ്റ്റിനോ വേണ്ടി ഡ്രൈവ് ചെയ്യാൻ ആഗ്രഹിക്കുന്നവർക്ക് കമ്പനികൾ നടത്തുന്ന ഒരു പശ്ചാത്തല പരിശോധന ഉൾപ്പെടെയുള്ള നടപടികളിലൂടെ കടന്നുപോകണം.
തുടർന്ന് കമ്പനികൾ ഡ്രൈവർമാർക്ക് ലൈസൻസിനായി അപേക്ഷിക്കുന്നു. ലൈസൻസ് നൽകുന്നതിന് മുമ്പ് നഗരം അപേക്ഷകന്റെ ക്രിമിനൽ റെക്കോർഡ് പരിശോധിക്കുകയും ഡ്രൈവിംഗ് റെക്കോർഡ് അവലോകനം ചെയ്യുകയും ചെയ്യുന്നു. ലൈസൻസ് നിഷേധിക്കാനുള്ള ഒരു കാരണം, കഴിഞ്ഞ പത്ത് വർഷത്തിനുള്ളിൽ ക്രിമിനൽ കോഡിന് കീഴിലുള്ള ഏതെങ്കിലും ലൈംഗിക കുറ്റകൃത്യത്തിന് ശിക്ഷിക്കപ്പെട്ടതാണ്. എന്നാൽ 2024 ഡിസംബർ വരെ നഗരത്തിൽ 80,500 പേർക്ക് റൈഡ് ഷെയർ കമ്പനികളിൽ ഡ്രൈവ് ചെയ്യാൻ ലൈസൻസ് ലഭിച്ചിട്ടുണ്ടെന്ന് സമീപകാല റിപ്പോർട്ട് പറയുന്നു.
ക്രിമിനൽ പശ്ചാത്തല പരിശോധന മാത്രം പര്യാപ്തമല്ലെന്ന് സിംഗർ വാദിക്കുന്നു.
റൈഡ് ഷെയർ കമ്പനികൾ യുഎസിൽ ചെയ്തതുപോലെ ലൈംഗികാതിക്രമങ്ങളുടെ വിവരങ്ങൾ വാർഷികമായി പ്രസിദ്ധീകരിക്കാൻ ടൊറന്റോ നഗരത്തിന് ആവശ്യപ്പെടാമെന്ന് സിംഗർ പറയുന്നു. റൈഡ് ഷെയർ കമ്പനികളിൽ നിന്നുള്ള വിവരങ്ങൾ നഗരം മുമ്പ് പ്രസിദ്ധീകരിച്ചിട്ടുണ്ട്. എന്നാൽ ഡ്രൈവറുടെ പെരുമാറ്റവുമായി ബന്ധപ്പെട്ട പരാതികൾ നേരിട്ട് കമ്പനിയിൽ ഫയൽ ചെയ്യണം. കാനഡയിൽ വിവരങ്ങൾ പുറത്തുവിടില്ലെന്ന് ലിഫ്റ്റ് വ്യക്തമാക്കിയപ്പോൾ, ഭാവിയിൽ കൂടുതൽ റിപ്പോർട്ടുകൾ പ്രസിദ്ധീകരിക്കാനുള്ള സാധ്യതകൾ വിലയിരുത്തുമെന്ന് ഊബർ അറിയിച്ചു.
ഇത്തരം കേസുകൾ അത്യപൂർവമാണെന്നാണ് രണ്ട് കമ്പനികളും പറയുന്നത്. എന്നാൽ ലൈംഗികാതിക്രമത്തിന് ഇരയായവരെ പ്രതിനിധീകരിച്ച ബർലിംഗ്ടൺ അഭിഭാഷക ലോറ ഹില്ലിയർ പറയുന്നത്, ഇത്തരം വിവരങ്ങൾ പുറത്തുവിടുന്നതിലൂടെ ആളുകൾക്ക് യഥാർത്ഥ അപകടസാധ്യതകളെക്കുറിച്ച് ധാരണ ലഭിക്കുമെന്നാണ്.
