പ്രിൻസ് എഡ്വേർഡ് ഐലൻഡ്: താൽക്കാലിക വിദേശ തൊഴിലാളികളുടെ സുരക്ഷയും അവകാശങ്ങളും ഉറപ്പാക്കുന്നതിനായി നിർദ്ദേശിച്ച പുതിയ നിയമനിർമ്മാണങ്ങളിൽ പൊതുജനങ്ങളുടെ അഭിപ്രായം തേടി പ്രിൻസ് എഡ്വേർഡ് ഐലൻഡ് (PEI) പ്രവിശ്യാ സർക്കാർ. ‘ടെമ്പററി ഫോറിൻ വർക്കർ പ്രൊട്ടക്ഷൻ ആക്ട്’ പ്രകാരം തൊഴിലുടമകൾക്കായി ഒരു പൊതു രജിസ്ട്രി സ്ഥാപിക്കുന്നതിനും നിയമലംഘനം നടത്തുന്നവർക്കെതിരെ അഡ്മിനിസ്ട്രേറ്റീവ് പിഴ ചുമത്തുന്നതിനുമുള്ള വ്യവസ്ഥകളാണ് പുതിയ കരട് നിയമാവലിയിലുള്ളത്.
പുതിയ നിർദ്ദേശങ്ങൾ അനുസരിച്ച് വിദേശികളെ ജോലിക്ക് നിയമിക്കുന്ന തൊഴിലുടമകൾ പ്രവിശ്യാ സർക്കാരിൽ രജിസ്റ്റർ ചെയ്യേണ്ടതുണ്ട്. പൊതുജനങ്ങൾക്കായി ലഭ്യമാക്കുന്ന ഈ രജിസ്ട്രിയിലൂടെ തൊഴിലുടമകളുടെ ബിസിനസ് വിവരങ്ങൾ, റിക്രൂട്ട്മെന്റ് രീതികൾ, ഒഴിവുള്ള തസ്തികകൾ, വേതനം, മറ്റ് ആനുകൂല്യങ്ങൾ എന്നിവ കൃത്യമായി വെളിപ്പെടുത്തണം. നിയമലംഘനം നടത്തുന്ന തൊഴിലുടമകൾക്ക് $500 മുതൽ $3,000 കാനഡിയൻ ഡോളർ വരെ പിഴയും, തുടർച്ചയായി കുറ്റം ആവർത്തിക്കുന്നവർക്ക് കൂടുതൽ തുകയും പിഴയായി ഈടാക്കും.
READ MORE : ഒൻ്റാരിയോയിലാണോ താമസം, പുതിയ വാടക നിയമങ്ങൾ വരുന്നു:അറിയേണ്ട പ്രധാന മാറ്റങ്ങൾ ഇതാ
തൊഴിലാളികൾ എവിടെ നിന്ന് വരുന്നവരായാലും അവർക്ക് സുരക്ഷിതവും സുതാര്യവുമായ തൊഴിൽ അന്തരീക്ഷം ഉറപ്പാക്കാൻ പ്രവിശ്യ പ്രതിജ്ഞാബദ്ധമാണെന്ന് വർക്ക്ഫോഴ്സ് ആൻഡ് അഡ്വാൻസ്ഡ് ലേണിംഗ് മന്ത്രി സാക്ക് ബെൽ വ്യക്തമാക്കി. പൊതുജനങ്ങൾക്ക് കരട് നിയമങ്ങളെക്കുറിച്ചുള്ള നിർദ്ദേശങ്ങളും അഭിപ്രായങ്ങളും 2026 സെപ്റ്റംബർ 17 വരെ labourrelations@gov.pe.ca എന്ന ഇമെയിൽ വിലാസത്തിലേക്ക് അയക്കാവുന്നതാണ്. ഘട്ടംഘട്ടമായി നടപ്പിലാക്കുന്ന ഈ നിയമത്തിന്റെ ഒന്നാം ഘട്ടം 2025 ഏപ്രിൽ 1-ന് നിലവിൽ വന്നിരുന്നു. റിക്രൂട്ട്മെന്റ് ഏജൻസികൾക്ക് ലൈസൻസ് നിർബന്ധമാക്കിക്കൊണ്ട് കൂടുതൽ ഉത്തരവാദിത്തം ഉറപ്പാക്കാൻ ആദ്യഘട്ടത്തിലൂടെ സാധിച്ചിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
