ടൊറന്റോ നഗരം ഭവനരഹിതർക്കായി ഷെൽട്ടറുകളുടെ എണ്ണം അതിവേഗം വർദ്ധിപ്പിക്കാൻ ഒരുങ്ങുന്നതിനിടെ, സ്ഥലം തിരഞ്ഞെടുക്കുന്ന പ്രക്രിയയിൽ പൊതുജനങ്ങളെ അന്യായമായി മാറ്റിനിർത്തുകയാണെന്ന് ആരോപിച്ച് ചില കൗൺസിലർമാരും നികുതിദായകരുടെ സംഘടനകളും രംഗത്ത് വന്നിരിക്കുകയാണ്.പ്രാദേശിക താമസക്കാരുടെയും വാർഡ് കൗൺസിലർമാരുടെയും അനുമതിയില്ലാതെ തന്നെ നഗരസഭാ ഉദ്യോഗസ്ഥർക്ക് അഭയകേന്ദ്രങ്ങൾ സ്ഥാപിക്കാൻ അനുവാദം നൽകുന്ന ഒരു നഗര നയമാണ് ഇവിടെ പ്രധാന ചർച്ചാ വിഷയം. തങ്ങളുടെ വാർഡിൽ 65 ഭവനരഹിതരായ സ്ത്രീകൾക്കായി ഒരു അഭയകേന്ദ്രം നിർമ്മിക്കാൻ പദ്ധതിയിടുന്നതിനെക്കുറിച്ച് വൈകിയാണ് അറിഞ്ഞതെന്ന് കൗൺസിലർ ഡഗ് ഹോളിഡേ പറഞ്ഞു. പുതിയ അഭയകേന്ദ്രങ്ങളുടെ സ്ഥലനിർണ്ണയത്തിൽ സുതാര്യതയില്ലെന്ന് അദ്ദേഹം ചൂണ്ടിക്കാട്ടി.
2017-ൽ കൗൺസിലർമാർ അംഗീകരിച്ച ഈ നയം, 2033-ഓടെ ടൊറന്റോയിലുടനീളം 20 പുതിയ അഭയകേന്ദ്രങ്ങൾ തുറക്കാനുള്ള നഗരത്തിന്റെ പദ്ധതികൾ പുറത്തുവന്നതോടെയാണ് വീണ്ടും ശ്രദ്ധാകേന്ദ്രമായത്. ഏകദേശം 12,000 ആളുകളാണ് നിലവിൽ താൽക്കാലിക അഭയകേന്ദ്രങ്ങളിലും ഹോട്ടലുകളിലുമായി കഴിയുന്നത്. ഇത് നഗരത്തിന് വലിയ സാമ്പത്തിക ബാധ്യതയാണെന്നും കണക്കുകൾ പറയുന്നു. 2023-ലെ ഒരു റിപ്പോർട്ട് അനുസരിച്ച്, പ്രതിദിനം ശരാശരി 291 കോളുകൾ അഭയം അന്വേഷിച് ലഭിച്ചിരുന്നു, എന്നാൽ പലർക്കും ഇടം നൽകാൻ കഴിഞ്ഞിരുന്നില്ല. ഈ അടിയന്തിര സാഹചര്യം കണക്കിലെടുത്ത്, സ്ഥലനിർണ്ണയം രാഷ്ട്രീയവൽക്കരിക്കാതിരിക്കാനും പദ്ധതികൾ വേഗത്തിൽ നടപ്പിലാക്കാനുമാണ് സ്ഥലങ്ങൾ രഹസ്യമായി സൂക്ഷിക്കുന്നതെന്ന് നഗരസഭയുടെ വക്താവ് ലൊറെറ്റ രമാധിൻ അറിയിച്ചു.
എന്നിരുന്നാലും, സ്ഥലനിർണ്ണയത്തിൽ പൊതുജനങ്ങൾക്ക് യാതൊരു പങ്കുമില്ലാത്തതിൽ പലരും അതൃപ്തി രേഖപ്പെടുത്തി. സ്കാർബറോ യുണൈറ്റഡ് നെയ്ബർഹുഡ്സ് എന്ന സംഘടനയുടെ റോൺ പാർക്കിൻസൺ, സ്ഥലം തിരഞ്ഞെടുത്തതിന് ശേഷം നടത്തുന്ന കൂടിയാലോചനകൾ അപര്യാപ്തമാണെന്ന് അഭിപ്രായപ്പെട്ടു. അതേസമയം, ജൂൺ 26-ന് നടന്ന കൗൺസിൽ യോഗത്തിൽ ഡഗ് ഹോളിഡേ ഒരു പ്രമേയം അവതരിപ്പിച്ചു, പുതിയ അഭയകേന്ദ്രങ്ങളുടെ സ്ഥലം അംഗീകരിക്കുന്നതിനുള്ള അധികാരം കൗൺസിലിന് തിരികെ നൽകണമെന്ന് അതിൽ ആവശ്യപ്പെട്ടു. ഈ പ്രമേയം അംഗീകരിക്കപ്പെട്ടില്ലെങ്കിലും, മറ്റൊരു കൗൺസിലറായ ജെയിംസ് പാസ്റ്റർനാക്, സ്ഥലം തിരഞ്ഞെടുത്തതിന് ശേഷം പൊതുജനങ്ങളുമായി കൂടിയാലോചിക്കുന്ന രീതി പുനഃപരിശോധിക്കണമെന്ന് ആവശ്യപ്പെട്ടുകൊണ്ടുള്ള സമാനമായ പ്രമേയം പാസാക്കി.
പുതിയ അഭയകേന്ദ്രങ്ങളുടെ ആവശ്യം വളരെ വലുതായതിനാൽ, ഉദ്യോഗസ്ഥർക്ക് അനുയോജ്യമായ സ്ഥലങ്ങൾ കണ്ടെത്തി വേഗത്തിൽ നിർമ്മാണ പ്രവർത്തനങ്ങൾ ആരംഭിക്കാൻ കഴിയണമെന്ന് മറ്റ് ചില കൗൺസിലർമാർ വാദിച്ചു. കോവിഡ് മഹാമാരിക്ക് ശേഷമുണ്ടായ ഭവനരഹിതരുടെ എണ്ണത്തിലുണ്ടായ വർദ്ധനവും അഭയാർത്ഥികളുടെ ഒഴുക്കും കാരണം നഗരത്തിന് എത്രയും പെട്ടെന്ന് പുതിയ അഭയകേന്ദ്രങ്ങൾ നിർമ്മിക്കേണ്ടതുണ്ടെന്ന് കൗൺസിലർ ഡയാൻ സാക്സ് പറഞ്ഞു. “ജനങ്ങൾക്ക് തങ്ങളുടെ അയൽവാസികളെ തിരഞ്ഞെടുക്കാൻ അവകാശമില്ല,” അവർ കൂട്ടിച്ചേർത്തു. പുതിയതും ചെറുതുമായ അഭയകേന്ദ്രങ്ങൾ അയൽവാസികൾക്ക് ഒരു ബുദ്ധിമുട്ടും ഉണ്ടാക്കില്ലെന്നും അവർ വ്യക്തമാക്കി.
