ഒട്ടാവ: കുറ്റകൃത്യങ്ങൾ തടയുന്നതിന്റെ ഭാഗമായി പോലീസ്, രഹസ്യാന്വേഷണ ഏജൻസികൾ എന്നിവർക്ക് ഓൺലൈൻ ഇടങ്ങളിൽ കൂടുതൽ അധികാരം നൽകുന്ന പുതിയ നിയമനിർമ്മാണം കാനഡയിൽ വിവാദമാകുന്നു. ലിബറൽ സർക്കാർ അവതരിപ്പിച്ച ‘An Act respecting lawful access’പൗരന്മാരുടെ സ്വകാര്യതയെ തടസ്സപ്പെടുത്തുന്നതാണെന്ന് ചൂണ്ടിക്കാട്ടി പ്രമുഖ ടെക് കമ്പനികളും മനുഷ്യാവകാശ സംഘടനകളും രംഗത്തെത്തി. നിലവിൽ ഹൗസ് ഓഫ് കോമൺസ് കമ്മിറ്റിയുടെ പരിഗണനയിലുള്ള ഈ ബില്ലിലെ വ്യവസ്ഥകൾ ഭരണഘടനാ വിരുദ്ധമാണെന്നാണ് നിയമവിദഗ്ധരുടെ പ്രാഥമിക വിലയിരുത്തൽ.
ഡിജിറ്റൽ യുഗത്തിലെ കുറ്റകൃത്യങ്ങൾ കാര്യക്ഷമമായി നേരിടാൻ അന്വേഷണ ഏജൻസികളെ സജ്ജമാക്കുകയാണ് ബില്ലിന്റെ ലക്ഷ്യമെന്ന് സർക്കാർ വ്യക്തമാക്കുന്നു. പുതിയ വ്യവസ്ഥ പ്രകാരം, സംശയകരമായ സാഹചര്യങ്ങളിൽ വ്യക്തികളുടെ ഇമെയിൽ, ഫോൺ വിവരങ്ങൾ ടെലികോം കമ്പനികളിൽ നിന്ന് വേഗത്തിൽ ശേഖരിക്കാൻ പോലീസിന് സാധിക്കും. നിലവിൽ ഇതിനായി ദീർഘമായ കോടതി നടപടികൾ ആവശ്യമാണ്. എന്നാൽ, കൃത്യമായ തെളിവുകളില്ലാതെ കേവലം ‘യുക്തിസഹമായ സംശയത്തിന്റെ’ പേരിൽ വ്യക്തിഗത വിവരങ്ങൾ ചോദിക്കുന്നത് ദുരുപയോഗം ചെയ്യപ്പെടുമെന്ന് ഒട്ടാവ സർവകലാശാലയിലെ പ്രൊഫസർ മൈക്കൽ ഗീസ്റ്റ് ഉൾപ്പെടെയുള്ളവർ മുന്നറിയിപ്പ് നൽകുന്നു.
ആപ്പിൾ, മെറ്റ തുടങ്ങിയ ആഗോള കമ്പനികളും ബില്ലിലെ വ്യവസ്ഥകളിൽ കടുത്ത ആശങ്ക പ്രകടിപ്പിച്ചിട്ടുണ്ട്. ഉപഭോക്താക്കളുടെ സന്ദേശങ്ങൾ ചോർത്താനായി സ്മാർട്ട് ഉപകരണങ്ങളിൽ ‘ബാക്ക്ഡോർ’ സംവിധാനങ്ങൾ ഒരുക്കാൻ സർക്കാർ കമ്പനികളെ നിർബന്ധിച്ചേക്കാമെന്നാണ് ഇവരുടെ വാദം. എന്നാൽ വ്യക്തിഗത സന്ദേശങ്ങളോ ബ്രൗസിംഗ് ഹിസ്റ്ററിയോ പരിശോധിക്കാൻ ഈ ബിൽ അനുവാദം നൽകുന്നില്ലെന്നും, കോടതി വാറന്റില്ലാതെ ആർക്കും സ്വകാര്യ വിവരങ്ങളിൽ പ്രവേശിക്കാൻ കഴിയില്ലെന്നും പബ്ലിക് സേഫ്റ്റി മന്ത്രാലയം വിശദീകരിച്ചു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Privacy or security? Controversy over 'Lawful Access' bill in Canada; Tech companies against the government
