പൃഥ്വിരാജ് സുകുമാരനെ നായകനാക്കി വൈശാഖ് സംവിധാനം ചെയ്യുന്ന ബിഗ് ബജറ്റ് മാസ് ചിത്രം ‘ഖലീഫ’ ഓഗസ്റ്റ് 20-ന് ലോകമെമ്പാടുമുള്ള തിയേറ്ററുകളിലെത്തും. ഈ വർഷത്തെ ഓണം റിലീസുകളിൽ ഏറ്റവും വലിയ പ്രതീക്ഷയോടെ പ്രേക്ഷകർ കാത്തിരിക്കുന്ന ചിത്രങ്ങളിലൊന്നാണിത്. രണ്ട് ഭാഗങ്ങളിലായി പുറത്തിറങ്ങുന്ന സിനിമയിൽ പൃഥ്വിരാജിനൊപ്പം മലയാളത്തിന്റെ ഇതിഹാസ താരം മോഹൻലാൽ അതിഥി വേഷത്തിൽ എത്തുന്നു എന്ന വിവരവും പുറത്തുവന്നിട്ടുണ്ട്.
ചിത്രത്തിൽ ‘മാമ്പറയ്ക്കൽ ആമിർ അലി’ എന്ന ശക്തമായ കഥാപാത്രത്തെയാണ് പൃഥ്വിരാജ് അവതരിപ്പിക്കുന്നത്. ‘മാമ്പറയ്ക്കൽ അഹമ്മദ് അലി’ എന്ന കഥാപാത്രമായാണ് മോഹൻലാൽ സ്ക്രീനിലെത്തുക. മോഡലും നടിയുമായ മാളവിക ശർമ്മ നായികയായി അരങ്ങേറ്റം കുറിക്കുന്ന ചിത്രത്തിൽ പൃഥ്വിരാജിന്റെ ലൊക്കേഷൻ സ്റ്റില്ലുകളും അടുത്തിടെ പുറത്തിറങ്ങിയ ‘അസലായവളെ’ എന്ന പാട്ടും ഇതിനോടകം തന്നെ സോഷ്യൽ മീഡിയയിൽ വലിയ തരംഗമായി മാറിയിട്ടുണ്ട്. ദുബായിൽ വച്ചാണ് സിനിമയുടെ പ്രധാന ഭാഗങ്ങളുടെ ചിത്രീകരണം പൂർത്തിയാക്കിയത്.
ജിനു വി. എബ്രહാം തിരക്കഥയെഴുതി ജിനു ഇന്നോവേഷൻസിന്റെ ബാനറിൽ നിർമ്മിക്കുന്ന ചിത്രത്തിന് സഹനിർമ്മാതാക്കളായി സൂരജ് കുമാർ, ശ്രീലാൽ സൂരപാണി, സിജോ സെബാസ്റ്റ്യൻ എന്നിവരും പ്രവർത്തിക്കുന്നു. ജോമോൻ ടി. ജോൺ ഛായാഗ്രഹണവും ചമൻ ചാക്കോ ചിത്രസംയോജനവും നിർവ്വഹിക്കുന്നു. ചേതൻ ഡിസൂസ, യാനിക് ബെൻ, ഫീനിക്സ് പ്രഭു എന്നിവരടങ്ങുന്ന ആക്ഷൻ കൊറിയോഗ്രാഫി സംഘമാണ് ചിത്രത്തിലെ തകർപ്പൻ സ്റ്റണ്ട് രംഗങ്ങൾ ഒരുക്കിയിരിക്കുന്നത്. വൻ ഹൈപ്പോടെ എത്തുന്ന ‘ഖലീഫ’ ഓണം ബോക്സ് ഓഫീസിൽ പുതിയ തരംഗം സൃഷ്ടിക്കുമെന്ന പ്രതീക്ഷയിലാണ് സിനിമാ പ്രേമികൾ.
Prithviraj’s ‘Khalifa’ to release on Onam; The film will hit theaters on August 20
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
