ഒട്ടാവ: ഒക്ടോബറിൽ നടക്കുന്ന പ്രവിശ്യാതല റഫറണ്ടത്തിൽ കാനഡയിൽ തുടരാനാണ് ജനങ്ങൾ വോട്ട് ചെയ്യുന്നതെങ്കിൽ, ഭാവിയിൽ വിഭജനവുമായി ബന്ധപ്പെട്ട് മറ്റൊരു വോട്ടെടുപ്പ് നടത്തില്ലെന്ന് ആൽബർട്ട പ്രീമിയർ ഡാനിയേൽ സ്മിത്ത്. കാനഡയിൽ നിന്ന് വേർപെടണമോ എന്നതുമായി ബന്ധപ്പെട്ട ചർച്ചകൾ ദീർഘകാലമായി പ്രവിശ്യയിൽ സജീവമാണ്. ഈ സാഹചര്യത്തിൽ, ജനവികാരം മാനിക്കുമെന്നും പ്രവിശ്യാ ഭരണകൂടം ജനങ്ങളുടെ തീരുമാനത്തിനൊപ്പം നിൽക്കുമെന്നും മാധ്യമങ്ങൾക്ക് നൽകിയ അഭിമുഖത്തിൽ പ്രീമിയർ ഉറപ്പുനൽകി.
വരുന്ന ഒക്ടോബർ 19-നാണ് ആൽബർട്ടയിൽ നിർണായകമായ ഈ വോട്ടെടുപ്പ് നടക്കുന്നത്. കാനഡയിൽ നിന്ന് പൂർണ്ണമായി വേർപെടണമോ എന്ന ചോദ്യമല്ല ഇവിടെ വോട്ടർമാർക്ക് മുന്നിൽ വെയ്ക്കുന്നത്, മറിച്ച് വിഭജനത്തിന് ആവശ്യമായ നിയമനടപടികളുമായി പ്രവിശ്യാ സർക്കാരിന് മുന്നോട്ടുപോകാമോ എന്നതിലാണ് ജനവിധി തേടുന്നത്. പ്രവിശ്യയിലെ ജനങ്ങൾക്കിടയിലുള്ള അതൃപ്തിയും വിഭജന വാദവും അവഗണിക്കാൻ കഴിയില്ലെന്നും, നേരിട്ടുള്ള ജനാധിപത്യ പ്രക്രിയയിലൂടെ ഇതിനൊരു ശാശ്വത പരിഹാരം കാണാനാണ് വോട്ടെടുപ്പ് നടത്തുന്നതെന്നും പ്രീമിയർ വ്യക്തമാക്കി. കാനഡയിൽ തന്നെ തുടരണമെന്നാണ് തന്റെ വ്യക്തിപരമായ ആഗ്രഹമെന്നും അതിനായി പ്രചാരണം നടത്തുമെന്നും സ്മിത്ത് കൂട്ടിച്ചേർത്തു.
എന്നാൽ, ഒക്ടോബറിലെ വോട്ടെടുപ്പിൽ വേർപിരിയലിന് അനുകൂലമായാണ് ജനവിധിയെങ്കിൽ പ്രവിശ്യ വലിയ പ്രത്യാഘാതങ്ങൾ നേരിടേണ്ടി വരുമെന്ന് രാഷ്ട്രീയ നിരീക്ഷകർ വിലയിരുത്തുന്നു. സ്വന്തം രാഷ്ട്രീയ നിലനിൽപ്പിനായും വിഭജനവാദികളെ തൃപ്തിപ്പെടുത്താനുമാണ് പ്രീമിയർ ഈ വോട്ടെടുപ്പിന് വഴിതുറന്നതെന്ന വിമർശനം ഒന്റാറിയോ പ്രീമിയർ ഡഗ് ഫോർഡ് ഉൾപ്പെടെയുള്ളവർ ഉന്നയിച്ചിട്ടുണ്ട്. പതിറ്റാണ്ടുകളായി തുടരുന്ന ഈ രാഷ്ട്രീയ തർക്കത്തിന് അഞ്ച് മാസത്തെ ചർച്ചകൾക്ക് ശേഷം വോട്ടെടുപ്പിലൂടെ ഒരു അന്തിമ തീരുമാനമുണ്ടാകുമെന്നാണ് ആൽബർട്ട ഭരണകൂടം പ്രതീക്ഷിക്കുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
'October's referendum will be final'; Premier Daniel Smith makes crucial announcement in Canada's division controversy
