കാനഡ-യുഎസ് അതിർത്തി യാത്ര സുഗമമാകും; പുതിയ ‘പ്രീക്ലിയറൻസ്’ പദ്ധതികൾക്ക് ഈ വർഷം തുടക്കം

ഒട്ടാവ: കാനഡയിൽ നിന്ന് അമേരിക്കയിലേക്ക് യാത്ര ചെയ്യുന്നവർക്ക് അതിർത്തി കടക്കുന്നതിന് മുൻപ് തന്നെ പരിശോധനകൾ പൂർത്തിയാക്കാൻ സഹായിക്കുന്ന പുതിയ പ്രീക്ലിയറൻസ് കേന്ദ്രങ്ങൾ ഈ വർഷം പ്രവർത്തനമാരംഭിക്കുമെന്ന് ഇരു രാജ്യങ്ങളും അറിയിച്ചു. മാസങ്ങൾ നീണ്ട ആസൂത്രണത്തിനും നിർമ്മാണത്തിനുമൊടുവിലാണ് ഈ സുപ്രധാന നീക്കം. യാത്രക്കാർ അതിർത്തി കടന്നതിന് ശേഷം യുഎസ് ഇമിഗ്രേഷൻ വിഭാഗത്തിന് മുന്നിൽ കാത്തുനിൽക്കേണ്ടി വരുന്ന സാഹചര്യം ഒഴിവാക്കാനും സുരക്ഷാ പരിശോധനകൾ കൂടുതൽ കാര്യക്ഷമമാക്കാനും ഈ സംവിധാനം സഹായിക്കും.

നിലവിൽ കാനഡയിലെ എട്ട് പ്രധാന വിമാനത്താവളങ്ങളിലും ഒരു ഫെറി ടെർമിനലിലും ഈ സംവിധാനമുണ്ട്. 2024 സെപ്റ്റംബർ വരെയുള്ള കണക്കനുസരിച്ച് ഏകദേശം 1.6 കോടി യാത്രക്കാരാണ് ഈ സൗകര്യം പ്രയോജനപ്പെടുത്തിയത്. ടൊറന്റോ, വാൻകൂവർ, മോൺട്രിയൽ വിമാനത്താവളങ്ങൾ വഴിയാണ് ഏറ്റവും കൂടുതൽ യാത്രക്കാർ മുൻകൂട്ടി പരിശോധന പൂർത്തിയാക്കി അമേരിക്കയിലേക്ക് കടക്കുന്നത്. അതിർത്തി കടക്കുന്നതിന് മുൻപ് തന്നെ സുരക്ഷാ ഭീഷണികൾ തിരിച്ചറിയാനും യാത്രക്കാർക്ക് കണക്ഷൻ ഫ്ലൈറ്റുകൾ വേഗത്തിൽ ലഭിക്കാനും ഇത് ഉപകരിക്കുന്നു.

ടൊറന്റോയിലെ ബില്ലി ബിഷപ്പ് സിറ്റി എയർപോർട്ടാണ് പുതിയ പദ്ധതിയിലെ പ്രധാന കേന്ദ്രം. ഇതിനായുള്ള നിർമ്മാണ പ്രവർത്തനങ്ങൾ കഴിഞ്ഞ ഡിസംബറിൽ പൂർത്തിയായിക്കഴിഞ്ഞു. നിലവിൽ ജീവനക്കാർക്കുള്ള പരിശീലനവും സാങ്കേതിക പരിശോധനകളുമാണ് നടക്കുന്നത്. വസന്തകാലത്തോടെ (Spring) ഇവിടെ പ്രീക്ലിയറൻസ് ആരംഭിക്കുമെന്നാണ് ടൊറന്റോ പോർട്ട് അതോറിറ്റി വ്യക്തമാക്കുന്നത്. പുതിയ സംവിധാനം വരുന്നതോടെ ന്യൂയോർക്ക്, വാഷിംഗ്ടൺ, ചിക്കാഗോ, ബോസ്റ്റൺ എന്നിവിടങ്ങളിലേക്ക് കൂടുതൽ സർവീസുകൾ ആരംഭിക്കുമെന്ന് എയർ കാനഡ അറിയിച്ചു.

മറുഭാഗത്ത്, കാനഡ ബോർഡർ സർവീസസ് ഏജൻസി (CBSA) ന്യൂയോർക്കിലെ കാനൺ കോർണേഴ്‌സിൽ തങ്ങളുടെ ആദ്യ പ്രീക്ലിയറൻസ് കേന്ദ്രം തുറക്കാനൊരുങ്ങുകയാണ്. മോൺട്രിയലിന് തെക്ക് ക്യൂബെക് അതിർത്തിയിലാണിത്. നയപരമായ ചില മാറ്റങ്ങളും അടിസ്ഥാന സൗകര്യങ്ങളിലെ ക്രമീകരണങ്ങളും കാരണം ചെറിയ താമസമുണ്ടായെങ്കിലും 2025-ൽ തന്നെ ഈ കേന്ദ്രം തുറക്കുമെന്ന് കാനഡ വ്യക്തമാക്കിയിരുന്നു, സുരക്ഷാ തന്ത്രത്തിന്റെ ഭാഗമായി പ്രീക്ലിയറൻസ് കേന്ദ്രങ്ങൾ തുടരുമെന്ന് നേരത്തെ തന്നെ അമേരിക്കൻ എംബസിയും സ്ഥിരീകരിച്ചിരുന്നു.

ഭാവിയിൽ റെയിൽവേ സ്റ്റേഷനുകളിലേക്കും കൂടുതൽ വിമാനത്താവളങ്ങളിലേക്കും ഈ സംവിധാനം വ്യാപിപ്പിക്കാൻ ഇരു രാജ്യങ്ങളും ആലോചിക്കുന്നുണ്ട്. മോൺട്രിയലിലെ സെൻട്രൽ റെയിൽവേ സ്റ്റേഷൻ, ക്യുബെക് സിറ്റി എയർപോർട്ട്, വാൻകൂവറിലെ ക്രൂസ് ടെർമിനൽ എന്നിവയാണ് പരിഗണനയിലുള്ള പ്രധാന കേന്ദ്രങ്ങൾ. അടുത്ത അഞ്ച് വർഷത്തിനുള്ളിൽ കൂടുതൽ സ്ഥലങ്ങളിൽ പ്രീക്ലിയറൻസ് സൗകര്യം ഏർപ്പെടുത്തുന്നതിനായി ട്രാൻസ്പോർട്ട് പങ്കാളികളുമായി ചർച്ചകൾ പുരോഗമിക്കുകയാണ്.

preclearance-operations-in-canada-are-a-critical-component-of-border-strategy-us

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt