വത്തിക്കാൻ: യു.എസ്. മിഡ്‌ടേം തിരഞ്ഞെടുപ്പിൽ തപാൽ വോട്ട് രേഖപ്പെടുത്തി പോപ്പ് ലിയോ പതിനാലാമൻ . ജനപ്രതിനിധി സഭയിലെ 435 സീറ്റുകളിലേക്കും സെനറ്റിലെ 35 സീറ്റുകളിലേക്കും വിവിധ സംസ്ഥാനങ്ങളിലെ ഗവർണർ പദവികളിലേക്കും നടക്കുന്ന തിരഞ്ഞെടുപ്പിലാണ് വത്തിക്കാന്റെ അമരത്തിരുന്നുകൊണ്ട് അദ്ദേഹം സമ്മതിദാനാവകാശം വിനിയോഗിച്ചത്. ഒരു മാർപ്പാപ്പ ജനാധിപത്യ തിരഞ്ഞെടുപ്പിൽ വോട്ട് ചെയ്യുന്നത് ചരിത്രത്തിൽ ഇതാദ്യമാണ്.
അമേരിക്കൻ പൗരത്വം നിലനിർത്തിയിട്ടുള്ള പോപ്പ്, തന്റെ സഹോദരനായ ജോൺ താമസിക്കുന്ന ഇല്ലിനോയ്സിലെ ന്യൂ ലെനോക്സിലാണ് വോട്ടറായി രജിസ്റ്റർ ചെയ്തിട്ടുള്ളത്. വോട്ടർ പട്ടികയിൽ അദ്ദേഹത്തിന്റെ പേരുള്ള വിവരം വിൽ കൗണ്ടി ക്ലർക്കിന്റെ ഓഫീസ് ഔദ്യോഗികമായി സ്ഥിരീകരിച്ചു. ചിക്കാഗോയിൽ ജനിച്ച അദ്ദേഹത്തിന്റെ യഥാർഥ പേര് റോബർട്ട് ഫ്രാൻസിസ് പ്രെവോസ്റ്റ് എന്നാണ്.
ALSO READ: അധിക വൈദ്യുതി യുഎസിന് വില്‍ക്കാനുള്ള നീക്കം; ഇറിവിങ് പേപ്പര്‍ അടച്ചുപൂട്ടല്‍ ഭീഷണിയില്‍
ഇതിനുമുമ്പും ജനാധിപത്യ പ്രക്രിയകളിൽ അദ്ദേഹം സജീവമായി പങ്കാളിയായിട്ടുണ്ട്. 2024-ലെ യു.എസ്. പ്രസിഡന്റ് തിരഞ്ഞെടുപ്പിലും, റിപ്പബ്ലിക്കൻ-ഡെമോക്രാറ്റിക് പ്രൈമറി പോളിംഗുകളിലും, ഇല്ലിനോയ്സിലെ സെനറ്റ്, ഗവർണർ, ജനപ്രതിനിധി സഭാ തിരഞ്ഞെടുപ്പുകളിലും അദ്ദേഹം വോട്ട് രേഖപ്പെടുത്തിയിട്ടുണ്ട്.
“ജനാധിപത്യ പ്രക്രിയകളിൽ പങ്കാളികളാകുന്നത് ഓരോ പൗരന്റെയും അവകാശവും കടമയുമാണ്,” എന്ന് വത്തിക്കാൻ വക്താവ് വ്യക്തമാക്കി. അമേരിക്കൻ പൗരനായതിനാൽ വത്തിക്കാന്റെ ഭരണത്തലവനായിരിക്കുമ്പോഴും പോപ്പിന് നിയമപരമായി വോട്ടവകാശം നിലനിൽക്കുന്നുണ്ട്. മതേതര ജനാധിപത്യ തിരഞ്ഞെടുപ്പിൽ ബാലറ്റ് രേഖപ്പെടുത്തുന്ന ആദ്യ മാർപ്പാപ്പയായി ലിയോ പതിനാലാമൻ മാറിയെന്ന് ബ്രിട്ടീഷ് ചരിത്രകാരനായ മൈക്കൽ വാൽഷും അഭിപ്രായപ്പെട്ടു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
