കാൽഗറി : കാനഡയിൽ നിന്ന് വേർപിരിഞ്ഞ് സ്വതന്ത്ര രാജ്യമാകണമെന്ന വാദം ഉന്നയിക്കുന്ന ആൽബർട്ടയിലെ വിഭജനവാദികൾക്ക് വൻ തിരിച്ചടിയായി പുതിയ കണ്ടെത്തലുകൾ. കാനഡയിൽ നിന്ന് വിട്ടുമാറി അമേരിക്കയുമായി നേരിട്ട് നേരിട്ടുള്ള വ്യാപാരബന്ധം ശക്തമാക്കാമെന്നാണ് ‘ലെറ്റ് ആൽബർട്ട ഡിസൈഡ്’ എന്ന വിഭജനവാദി ഗ്രൂപ്പ് വാദിക്കുന്നത്. പ്രതിദിനം 5 മില്യൺ ബാരൽ എണ്ണ ഉൽപ്പാദിപ്പിക്കുന്ന ആൽബർട്ടയുടെ ഉൽപ്പന്നങ്ങളിൽ മൂന്നിൽ രണ്ട് പങ്കും അമേരിക്കയിലേക്കാണ് കയറ്റി അയക്കുന്നത്. എന്നാൽ, ഭൂപടത്തിൽ കാണുന്നതുപോലെ എണ്ണ അമേരിക്കയിലേക്ക് നേരിട്ടല്ല ഒഴുകുന്നതെന്നും, മറിച്ച് ഭൂരിഭാഗം പൈപ്പ്ലൈനുകളും കാനഡയിലെ മറ്റ് പ്രവിശ്യകൾ വഴിയാണ് കടന്നുപോകുന്നതെന്നും അന്താരാഷ്ട്ര മാധ്യമമായ സി.ബി.സി വ്യക്തമാക്കി.
ആൽബർട്ടയിൽ നിന്ന് അതിർത്തി കടന്ന് അമേരിക്കയിലേക്ക് നേരിട്ട് പോകുന്ന മൂന്ന് എണ്ണ പൈപ്പ്ലൈനുകൾ കാനഡയുടെ മൊത്തം കയറ്റുമതി ശേഷിയുടെ പത്തിലൊന്ന് ഭാഗം മാത്രമാണ് കൈകാര്യം ചെയ്യുന്നത്. ബാക്കിയുള്ള വൻതോതിലുള്ള ക്രൂഡ് ഓയിൽ ബ്രിട്ടീഷ് കൊളംബിയ, മാനിറ്റോബ തുടങ്ങിയ മറ്റ് കാനഡ പ്രവിശ്യകൾ വഴിയാണ് കടത്തിവിടുന്നത്. സ്വാഭാവിക വാതകത്തിന്റെ കാര്യത്തിലും സ്ഥിതി സമാനമാണ്; മൊണ്ടാനയിലേക്ക് നേരിട്ട് പൈപ്പ്ലൈനുകളില്ലാത്തതിനാൽ മറ്റ് പ്രവിശ്യകളെ ആശ്രയിച്ചാണ് അമേരിക്കയിലേക്കുള്ള വിതരണം. സ്വതന്ത്ര രാജ്യമായാൽ, തങ്ങളുടെ ഏറ്റവും വലിയ വരുമാന സ്രോതസ്സായ എണ്ണയും വാതകവും വിദേശത്തേക്ക് അയക്കാൻ ആൽബർട്ടയ്ക്ക് തങ്ങൾ ഉപേക്ഷിച്ചുപോയ രാജ്യത്തിന്റെ അനുമതിയും സഹകരണവും ആവശ്യമായി വരും.
ഒരു പുതിയ സ്വതന്ത്ര രാജ്യം രൂപീകരിക്കപ്പെടുമ്പോൾ മുൻ കരാറുകളൊന്നും സ്വാഭാവികമായി പ്രാബല്യത്തിൽ ഉണ്ടാകില്ലെന്ന് സി.ഡി. ഹൗ ഇൻസ്റ്റിറ്റ്യൂട്ട് സീനിയർ ഫെലോയും അന്താരാഷ്ട്ര വ്യാപാര അഭിഭാഷകനുമായ ലോറൻസ് ഹെർമാൻ ചൂണ്ടിക്കാണിക്കുന്നു. കാനഡയും ആൽബർട്ടയും തമ്മിൽ പുതിയ കരാറുകളിൽ പൂജ്യത്തിൽ നിന്ന് ചർച്ചകൾ തുടങ്ങേണ്ടി വരും. കാനഡയിലെ മറ്റ് പ്രവിശ്യകളിലൂടെ സൗജന്യമായോ തടസ്സമില്ലാതെയോ എണ്ണ കടത്തിവിടാൻ കാനഡ സർക്കാർ സമ്മതിക്കുമെന്ന് യാതൊരു ഉറപ്പുമില്ല. ഒന്റാറിയോയിലേക്കും ക്യൂബെക്കിലേക്കും എണ്ണയെത്തിക്കാൻ 1977-ൽ ഒപ്പുവെച്ച പൈപ്പ്ലൈൻ കരാർ പോലെയുള്ള പുതിയ ധാരണകൾക്ക് തുടക്കമിടേണ്ടി വരും.
എന്നാൽ, ഈ കടമ്പകളെ മറികടക്കാൻ തങ്ങൾക്ക് ശക്തമായ സ്വാധീനശേഷിയുണ്ടെന്നാണ് വിഭജനവാദി നേതാവായ കീത്ത് വിൽസൺ അവകാശപ്പെടുന്നത്. കാനഡയിലെ മറ്റ് പ്രവിശ്യകളായ ബ്രിട്ടീഷ് കൊളംബിയ ഭൂമിശാസ്ത്രപരമായി ഒറ്റപ്പെട്ട അവസ്ഥയിലാണെന്നും, ഏഷ്യൻ വിപണികളിലേക്ക് അവർക്ക് വ്യാപാരം നടത്തണമെങ്കിൽ ആൽബർട്ട വഴിയുള്ള സഞ്ചാരം അത്യാവശ്യമാണെന്നും വിൽസൺ വാദിക്കുന്നു. അതേസമയം, ഇരുരാജ്യങ്ങളും തമ്മിൽ തർക്കമുണ്ടായാൽ ആൽബർട്ടയിൽ നിന്നുള്ള എണ്ണയ്ക്ക് പകരം അമേരിക്കയിൽ നിന്നോ മറ്റ് വിദേശ രാജ്യങ്ങളിൽ നിന്നോ എണ്ണ ഇറക്കുമതി ചെയ്യാൻ കാനഡ ശ്രമിച്ചേക്കാമെന്ന് ആൽബർട്ട സർവകലാശാലയിലെ ലോ പ്രൊഫസറും എനർജി ഇക്കണോമിസ്റ്റുമായ ആൻഡ്രൂ ലീച്ച് അഭിപ്രായപ്പെടുന്നു.
കാനഡയിലെ എണ്ണ-വാതക പൈപ്പ്ലൈനുകൾ ഒരു പ്രത്യേക പ്രവിശ്യയ്ക്ക് വേണ്ടിയല്ല, മറിച്ച് ഒരു രാജ്യത്തിന്റെ സമഗ്രമായ ആവശ്യങ്ങൾക്ക് വേണ്ടിയാണ് നിർമ്മിക്കപ്പെട്ടിരിക്കുന്നത്. പുതിയ പൈപ്പ്ലൈനുകൾ നിർമ്മിക്കുന്നത് വൻ സാമ്പത്തിക ബാധ്യത വരുത്തിവെക്കുമെന്നതിനാൽ നിലവിലെ ശൃംഖലയെ ആശ്രയിക്കാതെ ആൽബർട്ടയ്ക്ക് മുന്നോട്ട് പോകാനാകില്ലെന്ന് മുൻ ഊർജ്ജ മന്ത്രി സോണിയ സാവേജ് വ്യക്തമാക്കി. വരാനിരിക്കുന്ന റഫറണ്ടത്തിൽ വിഘടനവാദികൾ വിജയിച്ചാൽ പോലും, എണ്ണ വ്യാപാരത്തിനായുള്ള ട്രാൻസ്ഷിപ്പ്മെന്റ് കരാറുകൾ തടസ്സമില്ലാതെ നടപ്പിലാക്കുക എന്നത് കടുത്ത നയതന്ത്ര പരീക്ഷണമായിരിക്കും.
How will oil flow once it becomes an independent country? Pipeline network a trap for separatists
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
