രോഗികളെ ചികിത്സിക്കുന്നതിനിടയിലും രേഖകൾ തയ്യാറാക്കേണ്ടി വരുന്ന ഡോക്ടർമാർക്ക് ആശ്വാസമായി ആർട്ടിഫിഷ്യൽ ഇൻ്റലിജൻസ് (AI) ടൂളുകൾ രംഗത്തെത്തുന്നു. രോഗികളുമായുള്ള സംഭാഷണങ്ങൾ രേഖപ്പെടുത്തി ചികിത്സാ വിവരങ്ങൾ സ്വയം തയ്യാറാക്കുന്ന ഈ സാങ്കേതികവിദ്യ ക്യുബെക്കിൽ പരീക്ഷിക്കാൻ ഒരുങ്ങുകയാണ് അധികൃതർ. സാൻ്റേ ക്യുബെക് എന്ന സർക്കാർ സ്ഥാപനമാണ് ആരോഗ്യമേഖലയിൽ ഈ സാങ്കേതികവിദ്യയുടെ സാധ്യതകൾ പഠിക്കുന്നതിനായി ഒരു പൈലറ്റ് പ്രോജക്ട് ആരംഭിക്കാൻ തീരുമാനിച്ചത്.
ഈ എ.ഐ ടൂളുകൾ ഉപയോഗിക്കുന്നതിലൂടെ കൂടുതൽ രോഗികളെ കാണാൻ സാധിക്കുമെന്നും ജോലിയുടെ ഭാരം കുറയ്ക്കുമെന്നും ഡോക്ടർമാർ പറയുന്നു.
മോൺട്രിയലിൽ ഫാമിലി ഫിസിഷ്യനായ ഡോ. ഫെലിക്സ് ലെ-ഫാറ്റ്-ഹോ, കഴിഞ്ഞ ഒരു വർഷമായി ഈ സാങ്കേതികവിദ്യ ഉപയോഗിക്കുന്നുണ്ട്. പ്ലൂം എഐ (Plume AI) എന്ന ടൂൾ ഉപയോഗിക്കുന്നതിലൂടെ ദിവസവും രണ്ടോ മൂന്നോ മണിക്കൂർ ലാഭിക്കാൻ കഴിയുന്നുണ്ടെന്ന് അദ്ദേഹം പറയുന്നു. കൂടാതെ, ദിവസവും മൂന്ന് രോഗികളെ കൂടുതലായി കാണാനും സാധിക്കുന്നുണ്ട്.
ഇത് ഡോക്ടർമാർക്കും രോഗികൾക്കും ഒരുപോലെ പ്രയോജനകരമാണെന്നും അദ്ദേഹം കൂട്ടിച്ചേർത്തു. ക്യുബെക്കിലെ ഡോക്ടർമാർ ചേർന്ന് നിർമ്മിച്ച ഒരു ആപ്ലിക്കേഷനാണ് പ്ലൂം എഐ. ക്യുബെക്കിലെ ഏകദേശം 10 ശതമാനം ഡോക്ടർമാർ (2000 ഡോക്ടർമാർ) ഈ ആപ്ലിക്കേഷൻ ഉപയോഗിക്കുന്നുണ്ടെന്ന് ഇതിന്റെ സഹസ്ഥാപകനായ ഡോ. ജെയിംസ് ട്യൂ പറഞ്ഞു. ഈ ആപ്ലിക്കേഷൻ ഉപയോഗിക്കുമ്പോൾ രോഗിയുടെ സ്വകാര്യത ഉറപ്പുവരുത്തുന്നതിന് സാൻ്റേ ക്യുബെക്കിൻ്റെ ഔദ്യോഗിക അംഗീകാരം നേടേണ്ടതുണ്ട്.
കൺസൾട്ടേഷന്റെ തുടക്കത്തിൽ ഡോക്ടർമാർ രോഗിയോട് ഈ ആപ്ലിക്കേഷനെക്കുറിച്ച് വിശദീകരിക്കുകയും അവരുടെ അനുവാദം വാങ്ങുകയും ചെയ്യും. രോഗി സമ്മതിച്ചാൽ സംഭാഷണം റെക്കോർഡ് ചെയ്യും. രോഗിയുടെ സംഭാഷണങ്ങൾ റെക്കോർഡ് ചെയ്ത് എ.ഐ ഒരു മെഡിക്കൽ കുറിപ്പ് തയ്യാറാക്കും. ഇത് ഡോക്ടർമാർക്ക് കുറിപ്പുകൾ തയ്യാറാക്കാൻ വേണ്ടിവരുന്ന സമയം ലാഭിക്കാൻ സഹായിക്കും.
ഈ സാങ്കേതികവിദ്യയുടെ സാധ്യതകളെക്കുറിച്ച് സൈബർ സുരക്ഷാ വിദഗ്ദ്ധർ ആശങ്ക രേഖപ്പെടുത്തിയിട്ടുണ്ട്. രോഗികളുടെ വിവരങ്ങൾ സുരക്ഷിതമായി സൂക്ഷിക്കണമെന്നും ഡാറ്റയുടെ നിയമപരമായ ഉത്തരവാദിത്വം ആർക്കാണെന്ന് വ്യക്തമാക്കണമെന്നും സൈബർ സുരക്ഷാ വിദഗ്ദ്ധൻ എറിക് പാരെൻ്റ് പറഞ്ഞു. കൂടാതെ, സിസ്റ്റം ലഭ്യമല്ലാതെ വന്നാൽ എന്ത് സംഭവിക്കുമെന്നും അദ്ദേഹം ചോദിച്ചു. രോഗികളുടെ സ്വകാര്യതയെക്കുറിച്ച് തുടക്കത്തിൽ തനിക്കും ആശങ്കകളുണ്ടായിരുന്നുവെന്ന് ഡോ. ഫെലിക്സ് ലെ-ഫാറ്റ്-ഹോ പറഞ്ഞു.
പ്ലൂം എഐ എല്ലാ വിവരങ്ങളും ക്യുബെക്കിൽ തന്നെ സൂക്ഷിക്കുന്നുണ്ടെന്നും 24-48 മണിക്കൂറിനുള്ളിൽ പുതിയ ഡാറ്റ സ്വയം ഡിലീറ്റ് ആകുമെന്നും അറിഞ്ഞതോടെയാണ് താൻ ആപ്ലിക്കേഷൻ ഉപയോഗിക്കാൻ തുടങ്ങിയതെന്നും അദ്ദേഹം വ്യക്തമാക്കി.
ആരോഗ്യമേഖലയിൽ എ.ഐയുടെ വരവ് അനിവാര്യമാണെന്നും അത് കൃത്യമായ നിയമങ്ങളോടെയായിരിക്കണമെന്നും ഡോ. ജെയിംസ് ട്യൂ അഭിപ്രായപ്പെട്ടു. നഴ്സുമാർ, സോഷ്യൽ വർക്കർമാർ, ഫിസിയോതെറാപ്പിസ്റ്റുകൾ, ഡെൻ്റിസ്റ്റുകൾ തുടങ്ങിയ മറ്റ് ആരോഗ്യ വിദഗ്ദ്ധർക്കും ഈ സാങ്കേതികവിദ്യ പ്രയോജനപ്പെടുമെന്ന് അദ്ദേഹം കൂട്ടിച്ചേർത്തു
