ഒട്ടാവ: അമേരിക്കയിൽ കനേഡിയൻ ഉൽപ്പന്നങ്ങൾക്ക് നികുതിയിളവ് ഉറപ്പാക്കാതെ യു.എസ്. സർക്കാരുമായി യാതൊരു വിട്ടുവീഴ്ചയ്ക്കും തയ്യാറാകരുതെന്ന് പ്രതിപക്ഷ നേതാവ് പിയറി പൊയിലിവ്രെ പ്രധാനമന്ത്രി മാർക്ക് കാർണിയോട് ആവശ്യപ്പെട്ടു. കാനഡയിൽ നിർമ്മിക്കുന്ന മരം, സ്റ്റീൽ, അലുമിനിയം, വാഹനങ്ങൾ എന്നിവയ്ക്ക് അമേരിക്കൻ വിപണിയിൽ പൂർണ്ണമായി നികുതി ഒഴിവാക്കി നൽകണമെന്നാവശ്യപ്പെട്ട് അദ്ദേഹം പ്രധാനമന്ത്രിക്ക് തുറന്ന കത്തെഴുതി. ഇരുരാജ്യങ്ങളും തമ്മിലുള്ള നിർണ്ണായക വ്യാപാര ചർച്ചകൾ അമേരിക്കയിൽ നടക്കാനിരിക്കെയാണ് പ്രതിപക്ഷം ഈ ആവശ്യം ഉന്നയിച്ചിരിക്കുന്നത്.
നേരത്തെ, കാനഡയിൽ നിന്നുള്ള 28 ബില്യൺ ഡോളറിന്റെ ഉൽപ്പന്നങ്ങൾക്ക് 50 ശതമാനം വരെ പുതിയ നികുതി ചുമത്തുമെന്ന് യു.എസ്. പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകിയിരുന്നു. അമേരിക്കൻ വാഹനങ്ങൾ, മദ്യം, പാൽ ഉൽപ്പന്നങ്ങൾ എന്നിവയ്ക്ക് കാനഡ ഏർപ്പെടുത്തിയ നിയന്ത്രണങ്ങൾ നീക്കിയില്ലെങ്കിൽ ഓഗസ്റ്റ് 19 മുതൽ പുതിയ നികുതി നിലവിൽ വരുമെന്നായിരുന്നു ഭീഷണി. ഈ പശ്ചാത്തലത്തിലാണ് കനേഡിയൻ പ്രതിനിധികൾ അമേരിക്കയിലെത്തി ചർച്ചകൾ തുടങ്ങിയത്. എന്നാൽ, അമേരിക്കൻ നികുതിയിൽ നിന്ന് രക്ഷപ്പെടാൻ കാനഡ ചില വിട്ടുവീഴ്ചകൾക്ക് തയ്യാറാകുന്നു എന്ന വാർത്തകൾ പുറത്തുവന്നതോടെയാണ് പ്രതിപക്ഷം വിഷയത്തിൽ ഇടപെട്ടത്.
കാനഡയിലെ തൊഴിലാളികളുടെയും വ്യാപാരികളുടെയും താല്പര്യം സംരക്ഷിക്കാൻ പ്രധാനമന്ത്രി ഉറച്ചുനിൽക്കണമെന്നാണ് പ്രതിപക്ഷത്തിന്റെ ആവശ്യം. എന്നാൽ, സ്വന്തം രാജ്യത്തെ വ്യവസായങ്ങളെ സംരക്ഷിക്കാൻ നികുതികൾ തുടരുമെന്ന നിലപാടിലാണ് അമേരിക്കൻ പ്രതിനിധികൾ. അതുകൊണ്ടുതന്നെ, വരാനിരിക്കുന്ന ചർച്ചകൾ കാനഡയെ സംബന്ധിച്ചിടത്തോളം വളരെ നിർണായകമായിരിക്കും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
'Do not compromise with Trump': Pierre Poilievre writes to the Prime Minister.
