ഒന്റാറിയോ: ഒന്റാറിയോ സർക്കാർ പുറത്തിറക്കിയ 2026-ലെ ബജറ്റിൽ ഒട്ടാവ നഗരത്തിനായി മുൻപ് പ്രഖ്യാപിച്ച പ്രധാന പദ്ധതികൾ ഉൾപ്പെടുത്തി. ഹൈവേ 174-ന്റെ അറ്റകുറ്റപ്പണികൾക്കും നവീകരണത്തിനുമായി പ്രവിശ്യാതലത്തിലുള്ള 31 ബില്യൺ ഡോളറിന്റെ 10 വർഷത്തെ മൂലധന പദ്ധതിയിൽ തുക മാറ്റിവെച്ചു. 2024-ലെ ഒട്ടാവ-ഒന്റാറിയോ കരാറിന്റെ ഭാഗമായി ഒട്ടാവ റോഡ് 174 ഏറ്റെടുക്കുന്നതിനുള്ള നടപടികൾ പുരോഗമിക്കുകയാണെന്ന് ബജറ്റ് രേഖ വ്യക്തമാക്കുന്നു. എന്നാൽ നഗരത്തിലെ ഒ-ട്രെയിൻ (O-Train) ലൈറ്റിൽ റെയിൽ ശൃംഖല ഏറ്റെടുക്കുന്നതുമായി ബന്ധപ്പെട്ട പുതിയ പരാമർശങ്ങളോ കൃത്യമായ സമയപരിധിയോ ബജറ്റിൽ ഉൾപ്പെടുത്തിയിട്ടില്ല.
ഒട്ടാവ മേഖലയിൽ നാല് പുതിയ സ്കൂളുകളുടെ നിർമ്മാണം ബജറ്റിൽ സ്ഥിരീകരിച്ചു. ഓർലിയൻസിലെ ഫ്രഞ്ച് കാത്തലിക്, ഫ്രഞ്ച് പബ്ലിക് എലമെന്ററി സ്കൂളുകളും ഒട്ടാവയിലെ ഇംഗ്ലീഷ് പബ്ലിക് എലമെന്ററി സ്കൂളും ഈ വർഷം അവസാനം തുറക്കും. കൂടാതെ, ഒട്ടാവ ഹോസ്പിറ്റലിന്റെ പുതിയ സിവിക് ക്യാംപസ്, സിഎച്ച്ഇഒ (CHEO) ഇന്റഗ്രേറ്റഡ് ട്രീറ്റ്മെന്റ് സെന്റർ, സ്ലോത്ത്ബ്രിഡ്ജ് ലോങ് ടേം കെയർ ഹോം എന്നിവയ്ക്കുള്ള പിന്തുണയും ബജറ്റിൽ ആവർത്തിച്ചു. ഹൈവേ 417-ലെ റാംപുകളുടെ പുനർനിർമ്മാണവും റോജർ സ്റ്റീവൻസ് ഡ്രൈവിലെ കൾവർട്ട് മാറ്റിസ്ഥാപിക്കലും പദ്ധതിയുടെ ഭാഗമാണ്.
കിഴക്കൻ ഒന്റാറിയോയിലെ മറ്റ് വികസന പദ്ധതികളും ബജറ്റിൽ ഇടംപിടിച്ചു. ബ്രോക്ക്വില്ലിൽ 295 തടവുകാരെ പാർപ്പിക്കാൻ ശേഷിയുള്ള പുതിയ കറക്ഷണൽ കോംപ്ലക്സ് നിർമ്മിക്കുമെന്നും സെന്റ് ലോറൻസ് വാലി സെന്റർ വികസിപ്പിക്കുമെന്നും സർക്കാർ അറിയിച്ചു. റെൻഫ്രൂവിനും ആർൺപ്രിയറിനും ഇടയിലുള്ള ഹൈവേ 17 നാല് വരിയായി വികസിപ്പിക്കുന്നതിനുള്ള രൂപരേഖ തയ്യാറാക്കാൻ നിർദ്ദേശം നൽകി. 244.2 ബില്യൺ ഡോളർ ചിലവ് പ്രതീക്ഷിക്കുന്ന ബജറ്റിൽ ആരോഗ്യ മേഖലയ്ക്ക് 101.2 ബില്യണും വിദ്യാഭ്യാസത്തിന് 40.8 ബില്യൺ ഡോളറുമാണ് നീക്കിവെച്ചിരിക്കുന്നത്.
Ontario Budget 2026: Ottawa’s infrastructure projects prioritized
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
