ഒട്ടാവ: കാനഡയിലെ മുതിർന്ന പൗരന്മാർക്കുള്ള ഓൾഡ് ഏജ് സെക്യൂരിറ്റി (OAS), ഗ്യാരന്റീഡ് ഇൻകം സപ്ലിമെന്റ് (GIS) ആനുകൂല്യങ്ങളുടെ ഈ വർഷത്തെ ഏറ്റവും വലിയ വർധന പ്രാബല്യത്തിൽ വന്നു. വർധിപ്പിച്ച പുതിയ തുക ജൂലൈ 29 ബുധനാഴ്ച മുതൽ ഗുണഭോക്താക്കളുടെ ബാങ്ക് അക്കൗണ്ടുകളിൽ നേരിട്ടെത്തും. കൺസ്യൂമർ പ്രൈസ് ഇൻഡക്സ് (CPI) അടിസ്ഥാനമാക്കി പ്രതിമാസ പെൻഷൻ തുകയിൽ 1.2 ശതമാനത്തിന്റെ വർധനവാണ് കനേഡിയൻ സർക്കാർ വരുത്തിയിരിക്കുന്നത്. വിലക്കയറ്റത്തിന്റെ പശ്ചാത്തലത്തിൽ മുതിർന്ന പൗരന്മാർക്ക് വലിയ ആശ്വാസമേകുന്നതാണ് സർക്കാരിന്റെ ഈ പുതിയ തീരുമാനം.
പുതിയ ഉത്തരവ് പ്രകാരം 65 നും 74 നും ഇടയിൽ പ്രായമുള്ളവർക്ക് പ്രതിമാസം പരമാവധി $751.97 ഡോളറും 75 വയസ്സിന് മുകളിലുള്ളവർക്ക് $827.17 ഡോളറും ലഭിക്കും. മുൻ മാസങ്ങളെ അപേക്ഷിച്ച് യഥാക്രമം $8.92, $9.81 ഡോളറുകളുടെ വർധനവാണ് ഇതിലൂടെ ഉണ്ടായിരിക്കുന്നത്. ഇതിന് പുറമെ കുറഞ്ഞ വരുമാനക്കാർക്കുള്ള GIS ആനുകൂല്യത്തിലും 1.2 ശതമാനത്തിന്റെ വർധനവ് പ്രാബല്യത്തിൽ വന്നിട്ടുണ്ട്. ഇതോടെ 75 വയസ്സിന് മുകളിൽ പ്രായമുള്ള, മറ്റ് വരുമാനമാർഗ്ഗങ്ങളില്ലാത്ത ഒരു വ്യക്തിക്ക് OAS, GIS ആനുകൂല്യങ്ങൾ ചേർത്ത് പ്രതിമാസം പരമാവധി $1,950.34 ഡോളർ വരെ ലഭിക്കാൻ അർഹതയുണ്ടായിരിക്കും.
2025-ലെ നികുതി റിട്ടേൺ അടിസ്ഥാനമാക്കിയാണ് പുതിയ അലവൻസുകളും സാമ്പത്തിക സഹായങ്ങളും കണക്കാക്കുന്നത് എന്നതിനാൽ വ്യക്തികളുടെ വരുമാനത്തിലെ വ്യത്യാസമനുസരിച്ച് ലഭിക്കുന്ന തുകയിലും മാറ്റങ്ങൾ വരാം. 40 വർഷമോ അതിൽ കൂടുതലോ കാനഡയിൽ താമസിച്ചവർക്കാണ് പൂർണ്ണ പെൻഷൻ ലഭിക്കുക. പണം ലഭിക്കുന്നതിൽ തടസ്സമുള്ളവർക്ക് ‘മൈ സർവീസ് കാനഡ’ (My Service Canada) അക്കൗണ്ട് വഴിയോ 1-800-277-9914 എന്ന ഹെൽപ്പ് ലൈൻ നമ്പർ വഴിയോ വിവരങ്ങൾ അറിയാൻ സാധിക്കുമെന്ന് അധികൃതർ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
OAS and GIS pension amounts increased in Canada; new rates credited to accounts today.
