ഹാലിഫാക്സ്: നോവ സ്കോഷ്യ പവർ കമ്പനിയിലെ ജീവനക്കാരുടെ പുതിയ ശമ്പള കരാറുമായി ബന്ധപ്പെട്ട് ഇന്റർനാഷണൽ ബ്രദർഹുഡ് ഓഫ് ഇലക്ട്രിക്കൽ വർക്കേഴ്സ് (IBEW) 1928 യൂണിയൻ അംഗങ്ങളുടെ വോട്ടെടുപ്പ് ആരംഭിച്ചു. ജീവനക്കാർ പണിമുടക്കിലേക്ക് നീങ്ങാൻ തീരുമാനിച്ച് 48 മണിക്കൂർ നോട്ടീസ് നൽകിയതോടെയാണ് മാനേജ്മെന്റ് പുതിയ വാഗ്ദാനവുമായി രംഗത്തെത്തിയത്. ചൊവ്വാഴ്ച ഉച്ചയ്ക്ക് ആരംഭിച്ച ഓൺലൈൻ വോട്ടെടുപ്പ് വെള്ളിയാഴ്ച ഉച്ചയ്ക്ക് 12 മണി വരെ തുടരും.
പുതിയ കരാർ പ്രകാരം ജീവനക്കാർക്ക് 1,000 ഡോളർ സൈനിംഗ് ബോണസായി ലഭിക്കും. 2026 ഏപ്രിൽ 1 മുതലോ അതിനു ശേഷമോ ജോലിയിലുള്ള സ്ഥിരം ജീവനക്കാർക്കും അർഹരായ താത്കാലിക ജീവനക്കാർക്കും ഇതിന്റെ പ്രയോജനം ലഭിക്കും. ബോണസ് ഒഴികെ മുൻപ് ചർച്ച ചെയ്ത മറ്റ് ശമ്പള വ്യവസ്ഥകളിൽ മാറ്റമൊന്നുമില്ലെന്ന് യൂണിയൻ വ്യക്തമാക്കി.
നോവ സ്കോഷ്യ പവറിലെ എണ്ണൂറോളം ജീവനക്കാരാണ് ഈ യൂണിയനിൽ ഉള്ളത്. മാനേജ്മെന്റും യൂണിയനും തമ്മിൽ മുൻപുണ്ടാക്കിയ രണ്ട് താത്കാലിക കരാറുകളും വോട്ടെടുപ്പിലൂടെ ജീവനക്കാർ തള്ളിക്കളഞ്ഞിരുന്നു. ഇതിനെ തുടർന്നാണ് സമരം ചെയ്യാൻ യൂണിയൻ തീരുമാനിച്ചതും, ഒടുവിൽ മാനേജ്മെന്റ് പുതിയ ബോണസ് ഓഫർ മുന്നോട്ടുവെച്ചതും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Wage dispute: Nova Scotia Power makes a new offer following strike notice; employees begin voting.
