വിനിപെഗ്: വടക്കൻ മാനിറ്റോബയിലെ ഭൂരിഭാഗം പ്രദേശങ്ങളുടെയും ആരോഗ്യ ചുമതലയുള്ള നോർത്തേൺ ഹെൽത്ത് റീജിയൻ (NHR) സി.ഇ.ഒ രാജ് സേവ്ദ സ്ഥാനമൊഴിയുന്നു. ജനുവരി 6-ന് പുറത്തിറക്കിയ ഔദ്യോഗിക വാർത്താക്കുറിപ്പിലാണ് സേവ്ദയുടെ രാജി ഡയറക്ടർ ബോർഡ് അംഗീകരിച്ച വിവരം വ്യക്തമാക്കിയത്. ഈ മാസം അവസാനത്തോടെ അദ്ദേഹം ചുമതലകളിൽ നിന്ന് വിരമിക്കും. 2023 മാർച്ചിലായിരുന്നു സേവ്ദ സി.ഇ.ഒ ആയി സ്ഥാനമേറ്റത്.
കഴിഞ്ഞ വർഷത്തെ കാട്ടുതീ സമയത്ത് ആരോഗ്യ കേന്ദ്രങ്ങളെയും താമസക്കാരെയും സുരക്ഷിതമായി മാറ്റിപ്പാർപ്പിക്കുന്നതിനും പ്രതിസന്ധി കൈകാര്യം ചെയ്യുന്നതിനും സേവ്ദ നേതൃത്വം നൽകിയിരുന്നു. വടക്കൻ മേഖലയെ സേവിക്കാൻ കഴിഞ്ഞതിൽ അഭിമാനമുണ്ടെന്ന് അദ്ദേഹം പ്രതികരിച്ചു. നിലവിൽ റീജിയണൽ വൈസ് പ്രസിഡന്റായ കാമറൂൺ റിച്ചറിനാണ് സി.ഇ.ഒയുടെ താൽക്കാലിക ചുമതല നൽകിയിരിക്കുന്നത്. പാരാമെഡിക് ആയി ഔദ്യോഗിക ജീവിതം ആരംഭിച്ച റിച്ചർ, കാട്ടുതീ പ്രതിസന്ധി സമയത്ത് ഇൻസിഡന്റ് കമാൻഡറായി പ്രവർത്തിച്ചിട്ടുണ്ട്.
സേവ്ദയുടെ കാലാവധിയിൽ ആരോഗ്യ സേവനങ്ങൾക്ക് വലിയ തടസ്സങ്ങൾ ഉണ്ടായില്ലെങ്കിലും ചില സുരക്ഷാ പ്രശ്നങ്ങൾ റീജിയണെ പ്രതിക്കൂട്ടിലാക്കിയിരുന്നു. തോംസൺ ജനറൽ ആശുപത്രിയിൽ കഴിഞ്ഞ ക്രിസ്മസ് തലേന്ന് നടന്ന വെടിവെപ്പും രോഗിക്ക് കുത്തേറ്റ സംഭവവും ഇതിൽ പ്രധാനമാണ്. ഇതേത്തുടർന്ന് മാനിറ്റോബ നഴ്സസ് യൂണിയൻ ഈ ആശുപത്രിയെ ‘ഗ്രേ ലിസ്റ്റിൽ’ (സുരക്ഷാ ഭീഷണിയുള്ള ഇടം) ഉൾപ്പെടുത്തിയിരുന്നു. കൂടാതെ, ഫ്ലിൻ ഫ്ലോൺ ആശുപത്രിയിലെ പ്രസവചികിത്സാ വിഭാഗം വർഷങ്ങളായി അടഞ്ഞുകിടക്കുന്നതും രോഗികൾക്ക് കിലോമീറ്ററുകൾ സഞ്ചരിക്കേണ്ടി വരുന്നതും വലിയ പ്രതിഷേധത്തിന് കാരണമായിട്ടുണ്ട്.
ആരോഗ്യമേഖലയിലെ വംശീയ വിവേചന ആരോപണങ്ങളും പുതിയ നേതൃത്വത്തിന് മുന്നിലെ വലിയ വെല്ലുവിളിയാണ്. 2023-ൽ ഗുരുതരമായ ഉദരരോഗവുമായി എത്തിയ തദ്ദേശീയ വിഭാഗത്തിൽപ്പെട്ട യുവാവിനെ “മദ്യപിച്ചതിന്റെ ഹാങ്ങോവർ” ആണെന്ന് പറഞ്ഞ് ചികിത്സ നൽകാതെ മടക്കിയ സംഭവത്തിൽ നിലവിൽ കോടതിയിൽ കേസുണ്ട്.
പിന്നീട് വിനിപെഗിൽ ചികിത്സ തേടിയ ഇദ്ദേഹത്തിന് അടിയന്തര ശസ്ത്രക്രിയ വേണ്ടിവന്നിരുന്നു. 2022-ൽ ഇത്തരം വിവേചനങ്ങൾക്കെതിരെ റീജിയൺ പരസ്യമായി ക്ഷമാപണം നടത്തുകയും പ്രത്യേക സമിതികൾ രൂപീകരിക്കുകയും ചെയ്തിരുന്നെങ്കിലും ഇതിൽ കാര്യമായ പുരോഗതി ഉണ്ടായിട്ടില്ലെന്ന ആക്ഷേപം ശക്തമാണ്.
northern-health-region-raj-sewda-resigns
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
