റോജേഴ്‌സ് സ്റ്റേഡിയത്തിലെ ശബ്ദമലിനീകരണം: നിയന്ത്രണങ്ങൾ ആവശ്യപ്പെട്ട് ടൊറന്റോ സിറ്റി കൗൺസിൽ

ടൊറന്റോ : റോജേഴ്‌സ് സ്റ്റേഡിയത്തിൽ നടക്കുന്ന സംഗീതകച്ചേരികളിൽ നിന്നുള്ള ശബ്ദം സമീപപ്രദേശങ്ങളിലേക്ക് വ്യാപിക്കുന്നത് കുറയ്ക്കാൻ ലൈവ് നേഷൻ കാനഡ കമ്പനിയോട് ആവശ്യപ്പെടുന്ന പ്രമേയം ടൊറന്റോ സിറ്റി കൗൺസിൽ ഈ ആഴ്ച ചർച്ച ചെയ്യും. സ്റ്റേഡിയത്തിന്റെ ഘടന പരിശോധിച്ച് പരിഹാരങ്ങൾ കണ്ടെത്താൻ ഒരു സ്വതന്ത്ര അക്കൗസ്റ്റിക്സ് എഞ്ചിനീയറെയോ ശബ്ദ വിദഗ്ദ്ധനെയോ നിയമിക്കാൻ സിറ്റി മാനേജർ വിനോദ കമ്പനിയുമായി ചേർന്ന് പ്രവർത്തിക്കണമെന്ന് യോർക്ക് സെന്റർ കൗൺസിലർ ജെയിംസ് പാസ്റ്റർനാക്ക് ആവശ്യപ്പെട്ടു. കൗൺസിലർ ലിലി ചെങ് പിന്തുണച്ച ഈ പ്രമേയത്തിൽ, ഇതിനാവശ്യമായ ചെലവുകൾ ലൈവ് നേഷൻ കാനഡ തന്നെ വഹിക്കണമെന്നും ആവശ്യപ്പെടുന്നുണ്ട്. എന്നാൽ തങ്ങളുടെ പരിപാടികൾ നഗരസഭയുടെ ശബ്ദനിയമങ്ങൾ പാലിച്ചാണ് നടത്തുന്നതെന്നും അനുവദനീയമായ പരിധി ലംഘിച്ചിട്ടില്ലെന്നും ലൈവ് നേഷൻ കാനഡ പ്രസ്താവനയിൽ വ്യക്തമാക്കി.

ഡൗൺസ്‌വ്യൂ വിമാനത്താവളത്തിന്റെ റൺവേയുടെ വടക്കേ അറ്റത്ത് താത്കാലിക സോണിംഗ് അനുമതിയോടെ 2025 ജൂണിലാണ് റോജേഴ്‌സ് സ്റ്റേഡിയം തുറന്നത്. പ്രമേയപ്രകാരം, 2025-ൽ 7,00,000 സന്ദർശകരെ ആകർഷിച്ച ഈ വേദിയിൽ 2026-ൽ പത്ത് ലക്ഷത്തിലധികം സന്ദർശകരെയാണ് പ്രതീക്ഷിക്കുന്നത്. ശബ്ദം പുറത്തേക്ക് പോകുന്നത് തടയാൻ ഈ വർഷം ഗ്രാൻഡ്‌സ്റ്റാൻഡിന് പിന്നിൽ വിനൈൽ ക്ലാഡിംഗ് സ്ഥാപിച്ചതായി പാസ്റ്റർനാക്ക് അറിയിച്ചു. കച്ചേരികൾ നടക്കുന്ന രാത്രികളിൽ യോർക്ക് സെന്റർ, വില്ലോഡേൽ, വോൺ തുടങ്ങിയ പ്രദേശങ്ങളിലെ താമസക്കാർ ശബ്ദമലിനീകരണത്തെക്കുറിച്ച് ശക്തമായ പരാതികൾ ഉന്നയിച്ചിട്ടുണ്ട്. ഇതിന്റെ അടിസ്ഥാനത്തിൽ സ്ഥിരമായ ശബ്ദ നിരീക്ഷണ സംവിധാനങ്ങളും സൗണ്ട് ബാരിയർ ബെർമുകളും സ്ഥാപിക്കുന്നത് പരിഗണിക്കാൻ സിറ്റി ജീവനക്കാരോട് പ്രമേയം ആവശ്യപ്പെടുന്നു.

നഗരസഭയുടെ ലൈസൻസിംഗ് ഓഫീസർമാരെ സ്റ്റേഡിയത്തിലും സമീപപ്രദേശങ്ങളിലും നിർത്തി കച്ചേരികളുടെ ശബ്ദത്തോത് നിരന്തരം നിരീക്ഷിക്കുന്നുണ്ടെന്നും ഇതിന്റെ ചെലവ് കമ്പനിയാണ് വഹിക്കുന്നതെന്നും ലൈവ് നേഷൻ കാനഡ അറിയിച്ചു. എല്ലാ പരിപാടികളും രാത്രി 11 മണിയോടെ അവസാനിക്കാറുണ്ടെന്നും കമ്പനി വ്യക്തമാക്കി. എന്നാൽ, ജനലുകൾ അടച്ചിട്ടാൽ പോലും വീടുകൾക്കുള്ളിൽ കച്ചേരികളുടെ ശബ്ദം കേൾക്കാമെന്നും ഉറക്കത്തെ ബാധിക്കുന്നുണ്ടെന്നും ഡൗൺസ്‌വ്യൂ നിവാസികളായ വെയ്ൻ ലെവിൻ, വ്ലാഡിസ്ലാവ് ടോറോനോവ് എന്നിവർ ആരോപിച്ചു. നിലവിലെ ശബ്ദ നിയന്ത്രണ നിയമങ്ങൾ പരിഷ്കരിക്കാൻ നഗരസഭാ ജീവനക്കാർക്ക് രണ്ട് വർഷമെടുക്കുമെന്നതിനാലാണ് കൂടുതൽ കാര്യക്ഷമമായ ഈ പ്രമേയം കൗൺസിലിന് മുന്നിൽ വച്ചതെന്ന് ജെയിംസ് പാസ്റ്റർനാക്ക് വിലയിരുത്തി.

Noise pollution at Rogers Stadium: Toronto City Council calls for restrictions

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla