നയാഗ്ര: സാമ്പത്തിക പ്രതിസന്ധിയെ തുടർന്ന് പ്രവർത്തനം നിലച്ച കാനഡയിലെ പ്രശസ്തമായ മറൈൻലാൻഡ് തീം പാർക്കിൽ നിന്ന് ആറ് ബെലൂഗ തിമിംഗലങ്ങളെ അമേരിക്കയിലെ പുതിയ വാസസ്ഥലങ്ങളിലേക്ക് വിജയകരമായി മാറ്റി. നയാഗ്ര ഫാൾസിന് സമീപമുള്ള ഈ കേന്ദ്രത്തിലെ സമുദ്രജീവികളെ സംരക്ഷിക്കാൻ അമേരിക്കയിലെയും സ്പെയിനിലെയും അക്വേറിയങ്ങളുമായി ഉണ്ടാക്കിയ കരാറിന്റെ ഭാഗമായാണ് ഈ നടപടി. തിങ്കളാഴ്ച ആരംഭിച്ച സങ്കീർണമായ ദൗത്യത്തിനൊടുവിൽ വിമാന മാർഗ്ഗമാണ് ഇവയെ അമേരിക്കൻ അക്വേറിയങ്ങളിൽ എത്തിച്ചത്.
2024 മുതൽ പൊതുജനങ്ങൾക്കായി അടച്ചിട്ടിരിക്കുന്ന മറൈൻലാൻഡിൽ ജീവികളെ പരിപാലിക്കാൻ ആവശ്യമായ സാമ്പത്തിക ശേഷിയില്ലെന്ന് അധികൃതർ വ്യക്തമാക്കിയിരുന്നു. മുൻകാലങ്ങളിൽ വെള്ളത്തിന്റെ ഗുണനിലവാരമില്ലായ്മ കാരണം നിരവധി സമുദ്രജീവികൾ ഇവിടെ ചത്തൊടുങ്ങിയത് വലിയ വിവാദങ്ങൾക്കിടയാക്കിയിരുന്നു. ഇതിനെത്തുടർന്ന് കനേഡിയൻ സർക്കാരിന്റെ മേൽനോട്ടത്തിൽ അന്താരാഷ്ട്ര അക്വേറിയങ്ങളുടെ ഒരു കൂട്ടായ്മ രൂപീകരിച്ചാണ് തിമിംഗലങ്ങളുടെ പുനരധിവാസം സാധ്യമാക്കിയത്.
ആദ്യഘട്ടത്തിൽ മാറ്റിയ ആറ് തിമിംഗലങ്ങളും നിലവിൽ പൂർണ ആരോഗ്യത്തോടെ പുതിയ അന്തരീക്ഷവുമായി പൊരുത്തപ്പെട്ടു വരുന്നതായി വെറ്ററിനറി ഡോക്ടർമാർ അറിയിച്ചു. നിലവിൽ 24 ബെലൂഗ തിമിംഗലങ്ങളും നാല് ഡോൾഫിനുകളുമാണ് ഇനി പാർക്കിൽ ശേഷിക്കുന്നത്. വരുന്ന ഓഗസ്റ്റ് അവസാനത്തോടെ ഇവയെയും അമേരിക്ക, സ്പെയിൻ എന്നിവിടങ്ങളിലെ വിവിധ സമുദ്രജീവി സംരക്ഷണ കേന്ദ്രങ്ങളിലേക്ക് പൂർണമായി മാറ്റിപ്പാർപ്പിക്കാനാണ് അധികൃതർ ലക്ഷ്യമിടുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Niagara's beluga whales are now in the US; six were transported by air, with the rest to be moved by August.
