നയാഗ്രാ ഫാൾസ്: നയാഗ്ര മേഖലയിലെ ഭക്ഷണശാലകളിൽ ആരോഗ്യവകുപ്പ് ഉദ്യോഗസ്ഥർ നടത്തിയ കർശന പരിശോധനയിൽ നിരവധി സ്ഥാപനങ്ങൾ സുരക്ഷാ മാനദണ്ഡങ്ങൾ ലംഘിച്ചതായി കണ്ടെത്തി. നയാഗ്ര പബ്ലിക് ഹെൽത്ത് ഇൻസ്പെക്ടർമാർ ഡിസംബർ ആദ്യവാരം നടത്തിയ റെഗുലർ ഇൻസ്പെക്ഷനിലാണ് പ്രശ്നങ്ങൾ ശ്രദ്ധയിൽപ്പെട്ടത്. ഭക്ഷണസാധനങ്ങൾ ശരിയായ താപനിലയിൽ സൂക്ഷിക്കാതിരിക്കുക, അടുക്കളയിലും പരിസരത്തും ശുചിത്വമില്ലായ്മ, കൈ കഴുകുന്നതിനുള്ള സൗകര്യങ്ങളുടെ അപര്യാപ്തത, ഭക്ഷണം കൈകാര്യം ചെയ്യുന്നവർ പാലിക്കേണ്ട സുരക്ഷാ നിയമങ്ങളിലെ വീഴ്ച എന്നിവയിലാണ് ലംഘനങ്ങൾ കണ്ടെത്തിയത്.
ഗുരുതരമായ വീഴ്ചകൾ കണ്ടെത്തിയ ചില സ്ഥാപനങ്ങൾക്ക് പിഴ ചുമത്തുകയും, പോരായ്മകൾ പരിഹരിക്കാൻ കർശന നിർദ്ദേശം നൽകുകയും ചെയ്തു. നിശ്ചിത സമയത്തിനുള്ളിൽ നിർദ്ദേശങ്ങൾ പാലിക്കാത്ത പക്ഷം ഈ സ്ഥാപനങ്ങളുടെ ലൈസൻസ് റദ്ദാക്കുന്നത് ഉൾപ്പെടെയുള്ള നടപടികളിലേക്ക് നീങ്ങുമെന്ന് അധികൃതർ അറിയിച്ചു.
നിയമലംഘനം കണ്ടെത്തിയതോടെ നയാഗ്ര ഹെൽത്ത് ഇൻസ്പെക്ടർമാർ താത്കാലികമായി അടപ്പിച്ച ‘ഷവർമ ആൻഡ് ഗ്രിൽ ബോക്സ്’ (Shawarma & Grill Box) എന്ന റെസ്റ്റോറന്റ് ഇപ്പോൾ വീണ്ടും തുറന്നു പ്രവർത്തിക്കാൻ തുടങ്ങി. നയാഗ്ര ഫാൾസിനടുത്തുള്ള 7558 ലണ്ടിസ് ലെയ്നിലാണ് (7558 Lundy’s Ln.) ഈ സ്ഥാപനം സ്ഥിതി ചെയ്യുന്നത്. ഉദ്യോഗസ്ഥരെത്തി വീണ്ടും പരിശോധന നടത്തുകയും എല്ലാ പോരായ്മകളും പരിഹരിച്ചതായി ബോധ്യപ്പെട്ടതിനെ തുടർന്ന് റെസ്റ്റോറന്റ് തുറക്കാൻ അനുമതി നൽകുകയായിരുന്നു.
പൊതുജനാരോഗ്യത്തിന് മുൻഗണന നൽകിക്കൊണ്ട് വരും ദിവസങ്ങളിലും നഗരത്തിലെ മറ്റ് ഭക്ഷണശാലകളിൽ പരിശോധന തുടരുമെന്ന് ഹെൽത്ത് ഇൻസ്പെക്ടർമാർ വ്യക്തമാക്കി. പുറത്തുനിന്ന് ഭക്ഷണം കഴിക്കുന്നവർ സ്ഥാപനങ്ങളുടെ ശുചിത്വ നിലവാരം ഉറപ്പുവരുത്തണമെന്നും അധികൃതർ ഓർമ്മിപ്പിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Niagara Falls Restaurant Inspections: Action Taken Against Establishments Violating Regulations
