സെന്റ് ജോൺസ്: ന്യൂഫൗണ്ട്ലാൻഡ് ആൻഡ് ലാബ്രഡോർ പ്രവിശ്യയിലെ നിർമ്മാണ മേഖല വരും വർഷങ്ങളിൽ വലിയ മാറ്റങ്ങളിലേക്ക് നീങ്ങുന്നതായി റിപ്പോർട്ട്. 2026 മുതൽ 2035 വരെയുള്ള കാലയളവിൽ റെസിഡൻഷ്യൽ നിർമ്മാണ മേഖലയിൽ നേരിയ കുറവുണ്ടാകുമെങ്കിലും, നോൺ-റെസിഡൻഷ്യൽ മേഖലയിലെ ശക്തമായ വളർച്ച ഈ കുറവിനെ മറികടക്കുമെന്ന് ബിൽഡ് ഫോഴ്സ് കാനഡയുടെ പുതിയ റിപ്പോർട്ട് വ്യക്തമാക്കുന്നു.
ഖനനം, ഗതാഗതം, യൂട്ടിലിറ്റീസ് മേഖലകളിലെ വൻകിട പദ്ധതികളാണ് നോൺ-റെസിഡൻഷ്യൽ രംഗത്തെ ഈ കുതിപ്പിന് കാരണമാകുന്നത്. ബേ ഡു നോർഡ് ഓഫ്ഷോർ ഓയിൽ പദ്ധതിയും ചർച്ചിൽ ഫാൾസ് ജനറേറ്റിംഗ് സ്റ്റേഷന്റെ വിപുലീകരണവും ഉൾപ്പെടെയുള്ളവ 2031-ഓടെ നിർമ്മാണ മേഖലയെ പുതിയ ഉന്നതിയിലെത്തിക്കും. ഇൻഡസ്ട്രിയൽ, കൊമേഴ്സ്യൽ, ഇൻസ്റ്റിറ്റ്യൂഷണൽ കെട്ടിട നിർമ്മാണ രംഗത്ത് മാത്രം 27 ശതമാനം വളർച്ചയാണ് പ്രതീക്ഷിക്കുന്നത്. ഇതിന്റെ ഫലമായി 2035-ഓടെ നോൺ-റെസിഡൻഷ്യൽ മേഖലയിൽ തൊഴിലവസരങ്ങൾ 15 ശതമാനം വർധിക്കുമെന്നാണ് കണക്കുകൂട്ടൽ.
വരും ദശകത്തിൽ വിരമിക്കൽ മൂലം 5,900 തൊഴിലാളികളെ നിർമ്മാണ മേഖലയ്ക്ക് നഷ്ടപ്പെടും. ഇത് പരിഹരിക്കാൻ 5,700 പുതിയ തൊഴിലാളികളെ ആവശ്യമായി വരും. ഇതിൽ 4,100 പേരെ പ്രാദേശികമായി കണ്ടെത്താൻ സാധിക്കുമെങ്കിലും, ബാക്കി വരുന്ന 1,600 പേരെ മറ്റ് സ്രോതസ്സുകളിൽ നിന്ന് നിയമിക്കേണ്ടി വരും. അതിനാൽ സ്ത്രീകൾ, തദ്ദേശീയ ജനവിഭാഗങ്ങൾ, കുടിയേറ്റക്കാർ എന്നിവരെ നിർമ്മാണ മേഖലയിലേക്ക് കൂടുതൽ ആകർഷിക്കാനുള്ള ശ്രമങ്ങൾ സജീവമാക്കുന്നുണ്ട്. പ്രത്യേകിച്ച്, വരും വർഷങ്ങളിൽ പ്രവിശ്യയിലേക്ക് എത്തുന്ന വൻ കുടിയേറ്റ വിഭാഗത്തെ നിർമ്മാണ മേഖലയുടെ ഭാഗമാക്കാനാണ് അധികൃതരുടെ നീക്കം.
ന്യൂഫൗണ്ട്ലാൻഡിലെ നിർമ്മാണ മേഖലയുടെ ഭാവി ശുഭകരമാണെന്നും വരാനിരിക്കുന്ന വൻകിട പദ്ധതികൾ പ്രവിശ്യയുടെ സാമ്പത്തിക വളർച്ചയ്ക്ക് മുതൽക്കൂട്ടാകുമെന്നും ബിൽഡ് ഫോഴ്സ് കാനഡ എക്സിക്യൂട്ടീവ് ഡയറക്ടർ ഇർവിൻ ബെസ് പറഞ്ഞു. കൃത്യമായ ആസൂത്രണത്തിലൂടെയും പരിശീലനത്തിലൂടെയും നിർമ്മാണ മേഖല നേരിടുന്ന തൊഴിൽ പ്രതിസന്ധികളെ മറികടക്കാമെന്ന ആത്മവിശ്വാസത്തിലാണ് വ്യവസായ പ്രമുഖർ.
Newfoundland and Labrador’s construction outlook sees a modest residential contraction more than offset by strong non-residential growth
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
