. ഇടുക്കി : മുല്ലപ്പെരിയാറിന് പകരം പുതിയ അണക്കെട്ട് നിർമ്മിക്കണമെന്ന ആവശ്യവുമായി കേരളം ഇന്ന് കേന്ദ്ര ജലവിഭവ പാർലമെന്ററി സ്റ്റാൻഡിങ് കമ്മിറ്റിക്ക് മുമ്പാകെ തമിഴ്നാടുമായി ചർച്ച നടത്തും. മൂന്നാറിൽ രാവിലെ 10 മണി മുതൽ 11:30 വരെയാണ് നിർണായകമായ ഈ അന്തർസംസ്ഥാന യോഗം നടക്കുന്നത്. ‘തമിഴ്നാടിന് സുരക്ഷിതമായ വെള്ളം, കേരളത്തിന് പുതിയ ഡാം’ എന്ന തങ്ങളുടെ ദീർഘകാലമായുള്ള ഔദ്യോഗിക നിലപാട് ചർച്ചയിൽ കേരളം ശക്തമായി ഉന്നയിക്കും. ഇരു സംസ്ഥാനങ്ങളിലെയും ജലവിഭവ വകുപ്പ് സെക്രട്ടറിമാരും മറ്റ് ഉന്നത ഉദ്യോഗസ്ഥരും യോഗത്തിൽ പങ്കെടുക്കുന്നുണ്ട്.
കേന്ദ്ര ജലവിഭവ സ്റ്റാൻഡിങ് കമ്മിറ്റി ചെയർമാൻ രാജീവ് പ്രതാപ് റൂഡി എംപിയുടെ നേതൃത്വത്തിലാണ് മൂന്നാറിലെ ചർച്ചകൾ പുരോഗമിക്കുന്നത്. സമിതിയിലെ അംഗങ്ങളായ ജെബി മേത്തർ എംപി, ഡീൻ കുര്യാക്കോസ് എംപി എന്നിവരും യോഗത്തിന്റെ ഭാഗമാണ്. ഒരിടവേളയ്ക്ക് ശേഷമാണ് മുല്ലപ്പെരിയാർ തർക്കത്തിൽ ഇരു സംസ്ഥാനങ്ങളെയും ഉൾപ്പെടുത്തി ഇത്തരമൊരു ഉന്നതതല ചർച്ച നടക്കുന്നത്. കേന്ദ്ര ജല കമ്മീഷന് കീഴിൽ കേരളത്തിൽ നടപ്പിലാക്കുന്ന വിവിധ ജലപദ്ധതികളുടെ പുരോഗതി വിലയിരുത്തുന്നതിനൊപ്പം മുല്ലപ്പെരിയാർ വിദഗ്ധ സമിതിയിൽ നിന്ന് ഒഴിവാക്കപ്പെട്ട കേരളത്തിന്റെ പ്രതിനിധിയെ പുനഃസ്ഥാപിക്കണമെന്ന ആവശ്യവും യോഗത്തിൽ ചർച്ചയാകും.
മുല്ലപ്പെരിയാറിൽ പുതിയ അണക്കെട്ട് നിർമ്മിക്കാനുള്ള കേരളത്തിന്റെ ശ്രമങ്ങളെ ശക്തമായി ചെറുക്കുമെന്ന് വിജയ്യുടെ നേതൃത്വത്തിലുള്ള തമിഴ്നാട്ടിലെ പുതിയ സർക്കാർ തങ്ങളുടെ ആദ്യ നയപ്രഖ്യാപനത്തിൽ വ്യക്തമാക്കിയിരുന്നു. ഡാമിന്റെ ജലനിരപ്പ് 152 അടിയായി ഉയർത്താനുള്ള ശ്രമങ്ങളുമായി മുന്നോട്ട് പോകുമെന്നും അറ്റകുറ്റപ്പണികൾ നടത്തുമെന്നുമായിരുന്നു അയൽസംസ്ഥാനത്തിന്റെ പ്രഖ്യാപനം. തമിഴ്നാട് തങ്ങളുടെ നിലപാടുകളിൽ ഉറച്ചുനിൽക്കുന്ന പശ്ചാത്തലത്തിൽ നടക്കുന്ന ഇന്നത്തെ ചർച്ച ഇരു സംസ്ഥാനങ്ങൾക്കും ഏറെ നിർണായകമാണ്. ചർച്ചയുടെ ഫലമായി ഉണ്ടാകുന്ന തീരുമാനങ്ങളെ ആശ്രയിച്ചിരിക്കും മുല്ലപ്പെരിയാർ തർക്കത്തിന്റെ ഭാവി പരിഹാരങ്ങൾ.
New dam on Mullaperiyar: After a hiatus, talks between Kerala and Tamil Nadu begin in Munnar
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
