ഫ്രെഡറിക്ടൺ: ന്യൂ ബ്രൺസ്വിക് പ്രവിശ്യയിൽ വിദേശ തൊഴിലാളികളുടെ സംരക്ഷണം ഉറപ്പാക്കുന്നതിനായി നിർണ്ണായക നിയമ ഭേദഗതിക്ക് തുടക്കമായി. തൊഴിൽ നിയമത്തിൽ വരുത്തുന്ന പുതിയ മാറ്റങ്ങൾ പ്രകാരം വിദേശ തൊഴിലാളികളിൽ നിന്ന് ഏതെങ്കിലും തരത്തിലുള്ള റിക്രൂട്ട്‌മെന്റ് ഫീസ് ഈടാക്കുന്നത് പൂർണ്ണമായി നിരോധിക്കും. കൂടാതെ, വിദേശ തൊഴിലാളികളെ റിക്രൂട്ട് ചെയ്യുന്ന ഏജൻസികൾക്ക് ലൈസൻസ് നിർബന്ധമാക്കാനും നിയമലംഘനം നടത്തുന്ന തൊഴിലുടമകൾക്കും ഏജന്റുകൾക്കും സാമ്പത്തിക പിഴ ചുമത്താനും നിർദ്ദേശമുണ്ട്. കാനഡയിലെ മറ്റ് പ്രവിശ്യകളിലെ നിയമങ്ങൾക്ക് തുല്യമായി സ്വന്തം തൊഴിൽ മേഖലയെ മാറ്റുന്നതിന്റെ ഭാഗമായിട്ടാണ് പൊതുജനങ്ങൾ, മറ്റ് പങ്കാളികൾ, തൊഴിലാളികൾ എന്നിവരിൽ നിന്നുള്ള രഹസ്യ സർവേ വഴിയും എഴുതി തയ്യാറാക്കിയ അഭിപ്രായങ്ങൾ വഴിയും ഈ ഭേദഗതി തയ്യാറാക്കിയത്.
പുതിയ നിയമപ്രകാരം എംപ്ലോയ്‌മെന്റ് സ്റ്റാൻഡേർഡ് ഡയറക്ടർക്ക് വിദേശ തൊഴിലാളികളെ നിയമിക്കുന്ന കമ്പനികളുടെ രജിസ്ട്രി പരിശോധിക്കാനും ആവശ്യാനുസരണം തൊഴിലുടമകളെ സസ്‌പെൻഡ് ചെയ്യാനോ നിരോധിക്കാനോ ഉള്ള അധികാരം ലഭിക്കും. റിക്രൂട്ട്‌മെന്റ് പ്രക്രിയയിൽ പങ്കാളികളാകുന്ന അന്താരാഷ്ട്ര ഏജന്റുമാരുടെയും ഇടനിലക്കാരുടെയും വിവരങ്ങൾ വെളിപ്പെടുത്തുന്നതും നിർബന്ധമാക്കിയിട്ടുണ്ട്. വിദേശ തൊഴിലാളികൾ പ്രവിശ്യാ സമ്പദ്‌വ്യവസ്ഥയുടെ പ്രധാന ഭാഗമാണെന്നും അവരെ സാമ്പത്തിക ചൂഷണങ്ങളിൽ നിന്ന് സംരക്ഷിച്ച് സുരക്ഷിത തൊഴിൽ അന്തരീക്ഷമൊരുക്കുകയാണ് ലക്ഷ്യമെന്നും തൊഴിൽ മന്ത്രി ആലിസൺ ടൗൺസെൻഡ് വ്യക്തമാക്കി. Royal Assent ലഭിക്കുന്നതോടെ ഫീസ് നിരോധനം ഉടനടി പ്രാബല്യത്തിൽ വരും. ലൈസൻസിംഗ് സമ്പ്രദായം 2028 ഏപ്രിൽ 1-നും, സമ്പൂർണ്ണ നിയമങ്ങൾ 2029 മാർച്ച് 31-ഓടെയും പൂർണ്ണമായി നടപ്പിലാക്കും.
Also Read: സ്ഥിരമായ ‘ഡേലൈറ്റ് സേവിംഗ് ടൈം’ വേണോ? കാനഡയിൽ സമയമാറ്റം വീണ്ടും ചർച്ചയിൽ
അതേസമയം, നിയമനിർമ്മാണത്തെ സ്വാഗതം ചെയ്യുമ്പോഴും കൂടുതൽ ശക്തമായ നടപടികൾ വേണമെന്നാണ് മൈഗ്രന്റ് വർക്കേഴ്സ് അലയൻസ് ഫോർ ചേഞ്ച് (MWAC) ആവശ്യപ്പെടുന്നത്. കഴിഞ്ഞ രണ്ട് വർഷമായി ഇത്തരമൊരു നിയമത്തിനായി രംഗത്തുള്ള ഇവർ, മുൻപ് ലക്ഷക്കണക്കിന് രൂപ ഫീസായി നൽകി വഞ്ചിക്കപ്പെട്ട തൊഴിലാളികൾക്ക് പണം തിരികെ ലഭിക്കാനുള്ള വ്യവസ്ഥ ഭേദഗതിയിൽ ഇല്ലാത്തതിൽ ആശങ്ക പ്രകടിപ്പിച്ചു. വിദേശത്തെയും നാട്ടിലെയും ഏജന്റുമാർക്കും തൊഴിലുടമകൾക്കും കൂട്ടായ ഉത്തരവാദിത്തം നിശ്ചയിക്കണമെന്നും ഇവർ ആവശ്യപ്പെടുന്നു. 2025-ൽ 108 തൊഴിലാളികളിൽ നടത്തിയ സർവേയിൽ 65 ശതമാനം പേരും റിക്രൂട്ടർമാർക്ക് വൻതുക നൽകിയതായി കണ്ടെത്തിയിരുന്നു. ജോലി ലഭിക്കുമെന്ന വാഗ്ദാനം വിശ്വസിച്ച് 2,300 ഡോളറിലധികം നൽകി കാനഡയിലെത്തിയ ശേഷം ജോലി ലഭിക്കാതെ കടക്കെണിയിലായ അറേലി എന്ന മെക്സിക്കൻ തൊഴിലാളിയുടെ അനുഭവവും സംഘടന ചൂണ്ടിക്കാട്ടുന്നു. ഇത്തരത്തിൽ വഞ്ചിക്കപ്പെട്ടവർക്ക് നഷ്ടപരിഹാരം ഉറപ്പാക്കാൻ സർക്കാർ മുന്നോട്ടുവരണമെന്നാണ് ഇവരുടെ പ്രധാന ആവശ്യം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
