ഒന്റാറിയോയിൽ തിങ്കളാഴ്ച മുതൽ പുതിയ ജാമ്യ നിയമം; എതിർപ്പുമായി സംഘടനകൾ

ഒന്റാറിയോ: ഒന്റാറിയോയിൽ ജാമ്യത്തിൽ ഇറങ്ങണമെങ്കിൽ ഇനി മുതൽ മുൻകൂറായി പണം അടയ്ക്കണമെന്ന പുതിയ നിയമം വരുന്നു. എന്നാൽ ഈ തീരുമാനം പണക്കാർക്ക് മാത്രം സഹായകരമാകുന്നതാണെന്നും പണമില്ലാത്ത സാധുക്കളെ ബാധിക്കുമെന്നും പറഞ്ഞ് ഒരു കൂട്ടം അഭിഭാഷകരും സംഘടനകളും ഇതിനെതിരെ കോടതിയെ സമീപിക്കുകയാണ്.

സാധാരണക്കാർക്ക് തിരിച്ചടിയാകും

പുതിയ നിയമം ഭരണഘടനയ്ക്ക് എതിരാണെന്നാണ് പ്രമുഖ നിയമ സംഘടനകൾ പറയുന്നത്. പണം അടയ്ക്കാൻ കഴിയാത്ത പാവപ്പെട്ട നിരപരാധികൾ ജയിലിൽ തന്നെ കഴിയേണ്ടി വരും. ആദ്യമായി കേസിൽപ്പെടുന്നവർക്കും ഇത് വലിയ ബുദ്ധിമുട്ടുണ്ടാക്കും. കൂടാതെ ജയിലുകളിൽ ആളുകളെക്കൊണ്ട് നിറയാൻ മാത്രമേ ഈ തീരുമാനം കാരണമാകൂ എന്നും അവർ ചൂണ്ടിക്കാട്ടുന്നു.

എന്താണ് പുതിയ മാറ്റം?

പുതിയ നിയമപ്രകാരം ജാമ്യം ലഭിക്കുന്ന പ്രതിയോ അവർക്ക് പകരം നിൽക്കുന്ന ആളോ രണ്ട് ദിവസത്തിനകം മുഴുവൻ തുകയും പണമായി അടയ്ക്കണം. കേസ് തീരുമ്പോൾ ഈ പണം തിരികെ കിട്ടും. എന്നാൽ കോടതി പറഞ്ഞ കാര്യങ്ങൾ ലംഘിച്ചാൽ സർക്കാരിലേക്ക് ഈ പണം കണ്ടുകെട്ടും. പണം അടയ്ക്കാമെന്ന് ഉറപ്പ് നൽകിയാൽ മാത്രം മതിയെന്ന പഴയ രീതിയാണ് ഇതോടെ മാറുന്നത്.

ജാമ്യം നിൽക്കുന്നവർക്കും കർശന വ്യവസ്ഥകൾ

മറ്റൊരാൾക്ക് ജാമ്യം നിൽക്കുന്നവർ കൃത്യമായ വിലാസവും തിരിച്ചറിയൽ രേഖകളും നൽകണം. തെറ്റായ വിവരങ്ങൾ നൽകിയാൽ അത് കുറ്റകൃത്യമായി കണക്കാക്കും. ജാമ്യത്തുക അടച്ചില്ലെങ്കിൽ പ്രതിയുടെയോ ജാമ്യം നിന്നയാളുടെയോ ശമ്പളം, ബാങ്ക് അക്കൗണ്ട്, സ്വത്തുക്കൾ എന്നിവയിൽ നിന്ന് തുക ഈടാക്കാൻ സർക്കാരിന് അധികാരമുണ്ടാകും.

Read more: https://canadavarthakal.ca/surge-protocol-to-reduce-hospital-overcrowding/

ജനങ്ങളുടെ സുരക്ഷയ്ക്കെന്ന് സർക്കാർ

നാട്ടിലെ ക്രമസമാധാനവും ജനങ്ങളുടെ സുരക്ഷയും ഉറപ്പാക്കാനാണ് ഈ മാറ്റമെന്നാണ് ഒന്റാറിയോ അറ്റോർണി ജനറൽ ഡഗ് ഡൗണി പറയുന്നത്. കുറ്റം ചെയ്ത ശേഷം വീണ്ടും നിയമം തെറ്റിക്കുന്നവരെ ഡിജിറ്റൽ സംവിധാനം വഴി നിരീക്ഷിക്കും. ജാമ്യ വ്യവസ്ഥകൾ ആളുകൾ കൃത്യമായി പാലിക്കുന്നുണ്ടെന്ന് ഉറപ്പാക്കുകയാണ് ലക്ഷ്യമെന്നും അദ്ദേഹം പറഞ്ഞു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla

New bail law in Ontario from Monday; organizations express opposition.