കാഠ്മണ്ഡു: നേപ്പാളിലും ടിബറ്റ് അതിർത്തിയിലും ഹിമാനി തകർന്നുണ്ടായ മിന്നൽ പ്രളയത്തിൽ മരണം 389 ആയി ഉയർന്നു. ബുധനാഴ്ച രാവിലെയാണ് ഹിമാനി തകർന്ന് വൻതോതിൽ പാറയും ഐസും ചെളിയും മലവെള്ളവും ഹിമപർവത നദീതടങ്ങളിലേക്ക് കുത്തിച്ചൊരിഞ്ഞത്. രക്ഷാപ്രവർത്തനം ശക്തമായി തുടരുന്നതിനിടയിൽ, പ്രദേശത്ത് വീണ്ടും വെള്ളപ്പൊക്കമുണ്ടാകാൻ സാധ്യതയുണ്ടെന്ന് ദുരന്ത നിവാരണ അതോറിറ്റി മുന്നറിയിപ്പ് നൽകി.
രക്ഷാപ്രവർത്തകർ ഭാരമേറിയ യന്ത്രങ്ങളും നായ്ക്കളെയും ഉപയോഗിച്ച് ചെളിയും അവശിഷ്ടങ്ങളും നീക്കം ചെയ്ത് തിരച്ചിൽ തുടരുകയാണ്. നേപ്പാളിലും തൊട്ടടുത്ത ടിബറ്റിലുമായി ആയിരത്തോളം ആളുകളെയാണ് ഇനിയും കണ്ടെത്താനുള്ളത്. ഇതിൽ കുറഞ്ഞത് 540 പേർ വിദേശികളാണ്. ദുരന്തബാധിത മേഖലകളിൽ കുടുങ്ങിക്കിടക്കുന്നവർക്ക് ഭക്ഷണവും അവശ്യസാധനങ്ങളും എത്തിക്കാൻ ഹെലികോപ്റ്ററുകൾ ഉപയോഗിക്കുന്നുണ്ട്. ഒഴുക്കിൽപ്പെട്ട് സമതല പ്രദേശങ്ങളിലെത്തിയ നിരവധി മൃതദേഹങ്ങളും കണ്ടെടുത്തു.
പ്രളയബാധിത പ്രദേശങ്ങളിൽ ഭോട്ടെകൊശി നദിക്ക് കുറുകെ അവശിഷ്ടങ്ങൾ അടിഞ്ഞുകൂടി രൂപപ്പെട്ട തടാകം കരകവിയുന്നതായി നേപ്പാൾ ദുരന്ത നിവാരണ അതോറിറ്റി അറിയിച്ചു. അതിർത്തിയുടെ മറുഭാഗത്ത് ചൈനയിലും സമാനമായ അവസ്ഥയാണ്. അടുത്ത മൂന്ന് ദിവസത്തിനുള്ളിൽ മൂന്ന് ദശലക്ഷം ക്യുബിക് മീറ്റർ വെള്ളം ഡാമിൽ എത്തുമെന്നാണ് കണക്കാക്കുന്നത്. സെപ്റ്റംബർ ഒന്നിനകം തടാകം കരകവിയാൻ ഉയർന്ന സാധ്യതയുണ്ടെന്ന് ചൈനീസ് ജലവിഭവ മന്ത്രാലയ വൃത്തങ്ങൾ വ്യക്തമാക്കി.
ടിബറ്റിലെ ഗ്യോറോങ് അതിർത്തിയിൽ ചൈനീസ് രക്ഷാപ്രവർത്തകർ ഇതുവരെ എത്തിച്ചേർന്നിട്ടില്ല. റോഡിലെ അവശിഷ്ടങ്ങൾ നീക്കം ചെയ്യാനുള്ള ശ്രമങ്ങൾ തുടരുകയാണ്. ഗ്യോറോങ് കൗണ്ടിയിൽ മാത്രം 558 പേരെയാണ് കാണാതായത്. ഇതിൽ 260 പേർ വിദേശ പൗരന്മാരാണ്. ചൈനീസ് ഭാഗത്ത് ഇതുവരെ മൂന്ന് പേരുടെ മരണം മാത്രമാണ് ഔദ്യോഗികമായി സ്ഥിരീകരിച്ചിട്ടുള്ളത്. സ്ഥിതിഗതികൾ വിലയിരുത്താൻ ചൈനീസ് പ്രീമിയർ ലി ക്യാങ് വ്യാഴാഴ്ച ഉച്ചയോടെ ഗ്യോറോങ് സന്ദർശിച്ചിരുന്നു.
Also Read : നേപ്പാൾ ദുരന്തം: 32 മലയാളി തീർത്ഥാടകരുടെ വിവരങ്ങൾ ലഭ്യമായി; 18 പേരുമായി സംസാരിച്ച് മുഖ്യമന്ത്രിയുടെ ഓഫീസ്
കാണാതായ വിദേശികളിൽ ഇന്ത്യ, ഓസ്ട്രേലിയ, ദക്ഷിണ കൊറിയ തുടങ്ങിയ രാജ്യങ്ങളിൽ നിന്നുള്ളവരും ഉൾപ്പെടുന്നു. ദുരന്തത്തിൽ ഇന്ത്യയും അമേരിക്കയും ഉൾപ്പെടെയുള്ള രാജ്യങ്ങൾ സഹായം വാഗ്ദാനം ചെയ്തിട്ടുണ്ട്. സ്ഥിതിഗതികൾ അതീവ ഗുരുതരമാണെന്നും കാണാതായവരെ കണ്ടെത്താനും പരിക്കേറ്റവർക്ക് ചികിത്സ ഉറപ്പാക്കാനുമാണ് സർക്കാർ പ്രഥമ പരിഗണന നൽകുന്നതെന്നും നേപ്പാൾ പ്രധാനമന്ത്രി ബലേന്ദ്ര ഷാ വ്യക്തമാക്കി. നിലവിലെ പ്രതിസന്ധിയെ നേരിടാൻ എല്ലാ സർക്കാർ സംവിധാനങ്ങളും പൂർണ്ണ സജ്ജമാണെന്നും അദ്ദേഹം കൂട്ടിച്ചേർത്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
