സാൻഫ്രാൻസിസ്കോ: ആർട്ടിഫിഷ്യൽ ഇന്റലിജൻസ് സാങ്കേതികവിദ്യയിൽ പുതിയ വിസ്മയവുമായി ഗൂഗിൾ ജമിനി. കൈകൊണ്ട് എഴുതിയ കണക്കിലെ ചോദ്യങ്ങൾ വിശകലനം ചെയ്യുകയും അതേ കൈയക്ഷരത്തിൽ തന്നെ ഉത്തരം നൽകുകയും ചെയ്യുന്ന ‘നാനോ ബനാന പ്രോ’ (Nano Banana Pro) എന്ന പുതിയ എഐ ടൂളാണ് ആഗോളതലത്തിൽ ഇപ്പോൾ ശ്രദ്ധനേടുന്നത്. ജെമിനി 3 സീരീസിന്റെ ഭാഗമായി പുറത്തിറക്കിയ ഈ സാങ്കേതികവിദ്യയുടെ പ്രവർത്തനം സോഷ്യൽ മീഡിയയിലും സജീവ ചർച്ചയായിരിക്കുകയാണ്.
പേപ്പറിൽ എഴുതിയ ഒരു കണക്കിന്റെ ചോദ്യം എഴുതിയ ചിത്രം വിശകലനം ചെയ്ത് നിമിഷങ്ങൾക്കുള്ളിൽ പരിഹാരം കാണാൻ ഈ ടൂളിന് സാധിക്കും. ചോദ്യം എഴുതിയ വ്യക്തിയുടെ അതേ ശൈലിയിലുള്ള കൈയക്ഷരം കൃത്യമായി അനുകരിച്ച് ഉത്തരം നൽകുന്നു എന്നതാണ് നാനോ ബനാന പ്രോയെ മറ്റ് എഐ ടൂളുകളിൽ നിന്ന് വ്യത്യസ്തമാക്കുന്നത്. ചിത്രം വിശകലനം ചെയ്യുന്നതിലെ കൃത്യതയും വേഗതയും ഉപയോക്താക്കളെ അമ്പരപ്പിക്കുന്നുണ്ട്.
ഒരു ഉപയോക്താവ് താൻ എഴുതിയ കുറിപ്പിന്റെ ചിത്രം പരീക്ഷണാടിസ്ഥാനത്തിൽ എഐ ടൂളിന് നൽകിയതോടെയാണ് ഈ വിവരം പുറംലോകമറിഞ്ഞത്. ചോദ്യം പരിഹരിക്കുക മാത്രമല്ല, തന്റെ യഥാർത്ഥ കൈയക്ഷരത്തിൽ തന്നെ മറുപടി ലഭിച്ചത് അത്ഭുതകരമാണെന്ന് അദ്ദേഹം സോഷ്യൽ മീഡിയയിൽ കുറിച്ചു. വിദ്യാർത്ഥികൾക്കും അധ്യാപകർക്കും പഠനകാര്യങ്ങളിൽ വലിയ സഹായമാകുന്ന വിപ്ലവകരമായ മാറ്റമായിരിക്കും ഇതെന്നാണ് വിദഗ്ധർ ചൂണ്ടിക്കാട്ടുന്നത്.
മനുഷ്യസഹജമായ യുക്തിബോധത്തോടെ വിവരങ്ങൾ വിശകലനം ചെയ്യാനും തത്സമയ വിവരങ്ങൾ ഉപയോഗിച്ച് സന്ദർഭോചിതമായ മറുപടികൾ നൽകാനും സാധിക്കുന്ന വിധത്തിലാണ് ഗൂഗിൾ ഇതിനെ പരിശീലിപ്പിച്ചിരിക്കുന്നത്. ഇമേജ് റെക്കഗ്നിഷൻ സാങ്കേതികവിദ്യയുടെ അടുത്ത ഘട്ടമായാണ് ഈ മുന്നേറ്റത്തെ സാങ്കേതിക ലോകം വിലയിരുത്തുന്നത്.
നിലവിൽ ഗൂഗിൾ എഐ സ്റ്റുഡിയോ, വെർട്ടെക്സ് എഐ എന്നീ പ്ലാറ്റ്ഫോമുകളിൽ നാനോ ബനാന പ്രോ ലഭ്യമാക്കിയിട്ടുണ്ട്. വരും ദിവസങ്ങളിൽ കൂടുതൽ ആപ്പുകളിലേക്കും സേവനങ്ങളിലേക്കും ഈ ടൂൾ സംയോജിപ്പിക്കും. വിദ്യാഭ്യാസ മേഖലയ്ക്ക് പുറമെ ഡാറ്റാ എൻട്രി, ഡോക്യുമെന്റേഷൻ തുടങ്ങിയ പ്രൊഫഷണൽ മേഖലകളിലും ഈ സാങ്കേതികവിദ്യ വലിയ സ്വാധീനം ചെലുത്തുമെന്നാണ് കരുതപ്പെടുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
'Nano Banana Pro' to revolutionize learning; When you see a question, the answer is ready in handwriting!
