വാണിയപ്പാറ : കണ്ണൂർ വാണിയപ്പാറ ഇൻഫന്റ് ജീസസ് പള്ളിയിലെ കല്ലറയെച്ചൊല്ലി ഉയർന്ന ആശങ്കകൾക്കും ദുരൂഹതകൾക്കും ഒടുവിൽ വിരാമം. കല്ലറ തുറന്നു നടത്തിയ പ്രാഥമിക പരിശോധനയിൽ സംശയാസ്പദമായി മൂന്നാമതൊരു മൃതദേഹം അവിടെ ഇല്ലെന്ന് പോലീസ് കണ്ടെത്തി. നിലവിൽ കല്ലറയ്ക്കുള്ളിൽ രണ്ട് മൃതദേഹങ്ങൾ മാത്രമാണുള്ളത്. പരിശോധനയിൽ ദുരൂഹമായി ഒന്നുമില്ലെന്നും, ഇതുവരെ ലഭിച്ച തെളിവുകളുടെ അടിസ്ഥാനത്തിൽ അസ്വാഭാവികതയൊന്നും കണ്ടെത്താനായിട്ടില്ലെന്നും പോലീസ് ഔദ്യോഗികമായി സ്ഥിരീകരിച്ചു.
സെമിത്തേരിയിൽ പുതിയൊരു മൃതദേഹം സംസ്കരിക്കാനായി 38-ാം നമ്പർ കല്ലറ തുറന്നപ്പോഴാണ് പായയിൽ പൊതിഞ്ഞ നിലയിൽ ഒരു വസ്തു കണ്ടെത്തുന്നത്. ഇതാണ് പ്രദേശവാസികളിലും പള്ളി അധികൃതരിലും വൻ സംശയത്തിന് ഇടയാക്കിയത്. എന്നാൽ, മുൻപ് അടക്കം ചെയ്ത മൃതദേഹത്തിന് അടിയിൽ വെച്ചിരുന്ന പായയാണ് ഇതെന്നും, അല്ലാതെ മൂന്നാമതൊരു മൃതദേഹം അല്ലെന്നും പോലീസ് വ്യക്തമാക്കി. എങ്കിലും കൂടുതൽ വ്യക്തതയ്ക്കായി കല്ലറയ്ക്കുള്ളിൽ നിന്ന് കണ്ടെത്തിയ മൃതദേഹങ്ങളുടെ ഡിഎൻഎ സാമ്പിളുകൾ പോലീസ് ശേഖരിച്ചിട്ടുണ്ട്.
ക്രിസ്ത്യൻ ആചാരപ്രകാരം ഒരു മൃതദേഹത്തിന് മേൽ മറ്റൊരു മൃതദേഹം അനുമതിയില്ലാതെ അടക്കം ചെയ്യില്ലെന്നിരിക്കെ, കല്ലറയിൽ ദുരൂഹതയുണ്ടെന്ന് ആരോപിച്ച് പ്രദേശവാസികൾ രംഗത്തെത്തിയിരുന്നു. തുടർന്ന് പള്ളി വികാരി ഫാ. ജിൽബർട്ട് കൊന്നയിലിന്റെ നേതൃത്വത്തിലാണ് അധികൃതർ പോലീസിൽ പരാതി നൽകിയത്. മുൻപ് 2006-ലും 2015-ലും ഈ കല്ലറയിൽ മൃതദേഹങ്ങൾ സംസ്കരിച്ചിട്ടുണ്ടെന്ന് ബന്ധപ്പെട്ട കുടുംബങ്ങൾ സാക്ഷ്യപ്പെടുത്തിയിരുന്നു. ആചാരപ്രകാരം അടക്കം ചെയ്ത ജെയിംസ് എന്നയാളുടെ ഭാര്യയും സ്ഥലത്തെത്തി കല്ലറ തിരിച്ചറിഞ്ഞതോടെയാണ് നാളുകളായി നീണ്ടുനിന്ന ആശങ്കകൾക്ക് പൂർണ്ണ പരിഹാരമായത്.
Mystery at Kannur cemetery solved; No third body found inside tomb
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
