യുക്രൈൻ നടത്തിയ ശക്തമായ ഡ്രോൺ ആക്രമണത്തെ തുടർന്ന് മോസ്കോയിലെ പ്രധാന വിമാനത്താവളങ്ങൾ താൽകാലികമായി അടച്ചുപൂട്ടുകയും, ഏകദേശം 140-ഓളം വിമാനങ്ങൾ റദ്ദാക്കുകയും ചെയ്തതായി അധികൃതർ അറിയിച്ചു. ശനിയാഴ്ച രാവിലെ മുതൽ റഷ്യയിൽ 230-ൽ അധികം യുക്രൈൻ ഡ്രോണുകൾ വെടിവച്ചിട്ടതായും, അതിൽ 27 എണ്ണം തലസ്ഥാനത്ത് നിന്നുള്ളതാണെന്നും റഷ്യൻ പ്രതിരോധ മന്ത്രാലയം വ്യക്തമാക്കി.
മോസ്കോയുടെ നാല് പ്രധാന വിമാനത്താവളങ്ങളെയും ഡ്രോൺ ആക്രമണം ബാധിച്ചതായി റഷ്യയുടെ വ്യോമയാന വിഭാഗം അറിയിച്ചു. 130-ൽ അധികം വിമാനങ്ങൾ വഴിതിരിച്ചുവിടുകയും ചെയ്തു. നിലവിൽ എല്ലാ വിമാനത്താവളങ്ങളുടെയും പ്രവർത്തനം സാധാരണ നിലയിലായിട്ടുണ്ട്. അതേസമയം, റഷ്യയുടെ വ്യോമാക്രമണത്തിൽ യുക്രൈനിൽ മൂന്ന് പേർ മരിച്ചതായി പ്രാദേശിക അധികൃതർ അറിയിച്ചു. കഴിഞ്ഞ 24 മണിക്കൂറിനിടെ മോസ്കോ വിമാനത്താവളങ്ങൾ 10 തവണ അടച്ചുപൂട്ടേണ്ടി വന്നതായി റഷ്യയുടെ ടൂർ ഓപ്പറേറ്റേഴ്സ് അസോസിയേഷൻ (ATOR) ഞായറാഴ്ച പറഞ്ഞു.
മോസ്കോയുടെ തെക്കുപടിഞ്ഞാറുള്ള കലുഗ മേഖലയിലും ഡ്രോൺ ആക്രമണം ഉണ്ടായി. ശനിയാഴ്ച രാവിലെ മുതൽ 45 ഡ്രോണുകൾ തടഞ്ഞതായും, കലുഗ അന്താരാഷ്ട്ര വിമാനത്താവളവും താൽകാലികമായി അടച്ചിടേണ്ടി വന്നതായും റഷ്യൻ പ്രതിരോധ മന്ത്രാലയം അറിയിച്ചു. റോസ്തോവ്, ബ്രയാൻസ്ക് തുടങ്ങിയ യുക്രൈൻ അതിർത്തി പ്രദേശങ്ങളിലും ബ്ലാക്ക് സീയിലും ഡ്രോണുകൾ വെടിവച്ചിട്ടതായി റിപ്പോർട്ടുണ്ട്. ആർക്കും ജീവൻ നഷ്ടപ്പെട്ടിട്ടില്ല. മെയ് മാസത്തിലും സമാനമായ ഡ്രോൺ ആക്രമണങ്ങൾ കാരണം 60,000 യാത്രക്കാർ കുടുങ്ങിയിരുന്നു.
റഷ്യൻ വ്യോമാക്രമണത്തിൽ ഡോണെറ്റ്സ്കിലെ വിവിധ ഭാഗങ്ങളിൽ രണ്ട് പേരും, സുമിയിൽ 78 വയസ്സുള്ള ഒരു സ്ത്രീയും മരിച്ചതായി യുക്രൈനിലെ പ്രാദേശിക അധികൃതർ അറിയിച്ചു. യുക്രൈന്റെ വ്യോമസേന 57 റഷ്യൻ ഡ്രോണുകളിൽ 18 എണ്ണം വെടിവച്ചിട്ടതായും, ഏഴ് ഡ്രോണുകൾ റഡാർ ജാമിംഗ് കാരണം നഷ്ടപ്പെട്ടതായും പറഞ്ഞു. സുമി, ഡോണെറ്റ്സ്ക് കൂടാതെ ഖാർക്കിവ്, ഡിനിപ്രോപെട്രോവ്സ്ക്, സാപ്പോരിജിയ എന്നിവിടങ്ങളിലും ആക്രമണങ്ങളുണ്ടായി.
റഷ്യൻ പ്രസിഡന്റ് വ്ളാഡിമിർ പുടിൻ സമാധാന ചർച്ചകൾക്ക് തയ്യാറാണെന്ന് ക്രെംലിൻ വക്താവ് ദിമിത്രി പെസ്കോവ് പറഞ്ഞു. എന്നാൽ, റഷ്യയുടെ ലക്ഷ്യങ്ങൾ നേടുക എന്നതാണ് പ്രധാനമെന്നും അദ്ദേഹം കൂട്ടിച്ചേർത്തു. എത്രയും പെട്ടെന്ന് യുക്രൈൻ പ്രശ്നം സമാധാനപരമായി അവസാനിപ്പിക്കാനാണ് പുടിൻ ആഗ്രഹിക്കുന്നതെന്നും പെസ്കോവ് പറഞ്ഞു. യുക്രൈൻ അധിനിവേശം ആരംഭിച്ച് മൂന്നര വർഷത്തോളമായി.
സമാധാന ചർച്ചകൾ പുനരാരംഭിക്കാൻ യുക്രൈൻ പ്രസിഡന്റ് വോളോഡിമിർ സെലെൻസ്കി ശനിയാഴ്ച പുതിയ ചർച്ചകൾക്ക് തയ്യാറാണെന്ന് പ്രഖ്യാപിച്ചിരുന്നു. നേരത്തെ നടന്ന ചർച്ചകൾക്ക് വെടിനിർത്തൽ സാധ്യമായില്ലെങ്കിലും തടവുകാരെ കൈമാറാൻ കഴിഞ്ഞിരുന്നു. നേതൃതലത്തിൽ ഒരു കൂടിക്കാഴ്ച സമാധാനം ഉറപ്പാക്കാൻ ആവശ്യമാണെന്ന് പറഞ്ഞ് പുടിനുമായി നേരിട്ടുള്ള ചർച്ചയ്ക്ക് സെലെൻസ്കി വീണ്ടും സന്നദ്ധത പ്രകടിപ്പിച്ചു.
