മിസോറി: മിസോറിയിൽ റിപ്പബ്ലിക്കൻ പാർട്ടി തയ്യാറാക്കിയ പുതിയ കോൺഗ്രസ് മണ്ഡല പുനർവിഭജനം യു.എസ് സുപ്രീം കോടതി തടഞ്ഞു. നവംബറിൽ നടക്കാനിരിക്കുന്ന ഇടക്കാല തെരഞ്ഞെടുപ്പിൽ പുതിയ മാപ്പ് ഉപയോഗിക്കുന്നത് തടഞ്ഞുകൊണ്ടുള്ള ഉത്തരവാണ് കോടതി പുറപ്പെടുവിച്ചിരിക്കുന്നത്. പ്രസിഡന്റ് ഡോണൾഡ് ട്രംപിനും പ്രതിനിധി സഭയിലെ നേരിയ ഭൂരിപക്ഷം നിലനിർത്താൻ ശ്രമിക്കുന്ന റിപ്പബ്ലിക്കൻ പാർട്ടിഡയ്ക്കും ഇത് വലിയൊരു തിരിച്ചടിയായി മാറിയിരിക്കുകയാണ്.
പുതിയ മണ്ഡല അതിർത്തികൾ മാത്രം നവംബർ 3-ലെ തെരഞ്ഞെടുപ്പിൽ ഉപയോഗിക്കാൻ അനുമതി നൽകിയ ഫെഡറൽ ജഡ്ജിയുടെ ഉത്തരവ് റദ്ദാക്കിക്കൊണ്ടുള്ള ഹർജിയിലാണ് സുപ്രീം കോടതിയുടെ അടിയന്തര ഇടപെടൽ. ഈ ആഴ്ചയിൽ തന്നെ റിപ്പബ്ലിക്കൻ അനുകൂല ഭൂപടം നിലനിർത്താനുള്ള ശ്രമങ്ങൾ സുപ്രീം കോടതി തള്ളിക്കളയുന്നത് ഇത് രണ്ടാം തവണയാണ്. കോടതിയുടെ പുതിയ ഉത്തരവ് ഒപ്പുവെക്കാത്തതും വിശദീകരണങ്ങൾ ഇല്ലാത്തതുമാണെന്ന് ഉദ്യോഗസ്ഥർ വ്യക്തമാക്കി.
ഡെമോക്രാറ്റിക് പാര്ട്ടിയുടെ സിറ്റിങ് സീറ്റായ കൻസസ് സിറ്റി മണ്ഡലം ഒഴിവാക്കിക്കൊണ്ട് 2025-ലാണ് മിസോറി റിപ്പബ്ലിക്കൻമാർ പുതിയ ഭൂപടം തയ്യാറാക്കിയത്. റിപ്പബ്ലിക്കൻ സ്ഥാനാർത്ഥികൾക്ക് അനുകൂലമായ രീതിയിൽ മണ്ഡലങ്ങൾ പുനർവിഭജനം നടത്താൻ ട്രംപിന്റെ പിന്തുണയോടെയാണ് ഈ നീക്കം നടത്തിയത്. നിലവിൽ പ്രതിനിധി സഭയിൽ റിപ്പബ്ലിക്കൻമാർക്ക് 219-214 എന്ന നേരിയ ഭൂരിപക്ഷമാണുള്ളത്.
പുതിയ ഭൂപടത്തിനെതിരെ ‘പീപ്പിൾ നോട്ട് പൊളിറ്റീഷ്യൻസ്’ എന്ന സംഘടനയുടെ നേതൃത്വത്തിൽ 305,000-ത്തിലധികം വോട്ടർമാർ ഒപ്പുവെച്ച് റഫറണ്ടത്തിനായി അപേക്ഷ നൽകിയിരുന്നു. ജനങ്ങൾ വോട്ട് ചെയ്ത് അംഗീകരിക്കുന്നത് വരെ പുതിയ ഭൂപടം നടപ്പിലാകില്ലെന്ന് മിസോറി സുപ്രീം കോടതി ഉത്തരവിട്ടിരുന്നു. എന്നാൽ ഇതിനെതിരെ റിപ്പബ്ലിക്കൻ നേതാക്കൾ ഫെഡറൽ കോടതിയെ സമീപിക്കുകയും ഫെഡറൽ ജഡ്ജി പുതിയ ഭൂപടത്തിന് അനുകൂലമായി ഉത്തരവിടുകയും ചെയ്യുകയായിരുന്നു.
ഫെഡറൽ കോടതി ഉത്തരവിനെ തുടർന്ന് തെരഞ്ഞെടുപ്പ് ഉദ്യോഗസ്ഥർ പുതിയ മാപ്പ് ഉപയോഗിക്കാൻ നീക്കം നടത്തിയെങ്കിലും, സുപ്രീം കോടതിയുടെ പുതിയ സ്റ്റേയോടെ ഈ ആശയക്കുഴപ്പങ്ങൾക്ക് താൽക്കാലിക വിരാമമായിരിക്കുകയാണ്. നിയമവ്യവസ്ഥയെയും മിസോറി ഭരണഘടനയെയും മാനിച്ചുള്ള തീരുമാനമാണിതെന്ന് പരാതിക്കാരുടെ അഭിഭാഷകർ പ്രതികരിച്ചു. കേസിൽ പ്രതിരോധത്തിലായ റിപ്പബ്ലിക്കൻ നേതൃത്വത്തിന്റെ ഭാഗത്തുനിന്ന് ഔദ്യോഗിക പ്രതികരണങ്ങൾ ഇതുവരെ വന്നിട്ടില്ല
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
