മാനസിക സമ്മർദ്ദം വരുമ്പോൾ ഫോൺ സ്ക്രോൾ ചെയ്യുന്ന ശീലമുണ്ടോ? തിരിച്ചറിയുക ഈ അപകടം

മാനസിക സംഘർഷങ്ങളിൽ നിന്നും ബുദ്ധിമുട്ടുകളിൽ നിന്നും താൽക്കാലികമായി രക്ഷപ്പെടാൻ അമിതമായി ഉറങ്ങുകയോ ഫോൺ ഉപയോഗിക്കുകയോ ചെയ്യുന്നുണ്ടോ? എങ്കിൽ ഈ ശീലം ദോഷകരമാണെന്ന് വിദഗ്ധർ മുന്നറിയിപ്പ് നൽകുന്നു.

മനഃശാസ്ത്രപരമായ ഈ രീതി അവോയ്‌ഡൻ്റ് കോപ്പിങ് എന്നാണ് അറിയപ്പെടുന്നത്. മനസ്സിൽ അസ്വസ്ഥതകളും സംഘർഷങ്ങളും അനുഭവപ്പെടുമ്പോൾ അതിൽനിന്ന് ഒഴിഞ്ഞുമാറാൻ പലരും ചില അനാരോഗ്യകരമായ മാർഗങ്ങളെ ആശ്രയിക്കാറുണ്ട്. അമിതമായി ഉറങ്ങുക, മണിക്കൂറുകളോളം മൊബൈൽ ഫോൺ സ്ക്രോൾ ചെയ്യുക, വിശ്രമമില്ലാതെ ജോലിയിൽ മുഴുകുക തുടങ്ങിയവ ഇതിന് പ്രധാന ഉദാഹരണങ്ങളാണ്. അസ്വസ്ഥമാക്കുന്ന ചിന്തകളിൽനിന്നും വികാരങ്ങളിൽനിന്നും ശ്രദ്ധ തിരിക്കാനുള്ള മാർഗങ്ങളായാണ് ഇവ സാധാരണയായി പ്രവർത്തിക്കുന്നത്. എന്നാൽ ഇത്തരം ശീലങ്ങൾ മനസിന്റെ യഥാർത്ഥ വിഷമങ്ങൾക്ക് ഒരിക്കലും പരിഹാരമാകുന്നില്ല.

മാനസികാരോഗ്യ സംഘടനയായ അമാഹ പുറത്തുവിട്ട പുതിയ റിപ്പോർട്ട് പ്രകാരം, ചികിത്സ തേടിയവരിൽ 82.7 ശതമാനം പേരും ഇത്തരം ഒഴിവാക്കൽ സ്വഭാവമുള്ള ശീലങ്ങൾ പ്രകടിപ്പിച്ചവരാണ്. അമിതമായ സ്ക്രീൻ ഉപയോഗവും ജോലിയിൽ അത്യധികം മുഴുകുന്നതും ഇതിൽ ഉൾപ്പെടുന്നു. അതേസമയം, വ്യായാമം ചെയ്യുകയോ ഡയറി എഴുതുകയോ പോലുള്ള ആരോഗ്യകരമായ മാർഗങ്ങൾ സ്വീകരിച്ചവർ 43 ശതമാനം മാത്രമാണ്. പ്രശ്നങ്ങൾ ഗുരുതരമായി മാറി ഒരു വർഷത്തിലേറെ കഴിഞ്ഞ ശേഷമാണ് പലരും വിദഗ്ധ സഹായം തേടുന്നത് എന്നത് ആശങ്കാജനകമാണ്.

കൈകാര്യം ചെയ്യാൻ പ്രയാസമുള്ള വികാരങ്ങളിൽനിന്ന് കുറച്ചുനേരത്തേക്കെങ്കിലും ആശ്വാസം ലഭിക്കുമെന്നതിനാലാണ് ആളുകൾ ഇത്തരം ശീലങ്ങളിലേക്ക് തിരിയുന്നത്. ആശങ്കകളിൽനിന്ന് ശ്രദ്ധ തിരിക്കാൻ ഫോൺ ഉപയോഗിക്കുന്നത് താൽക്കാലികമായി സഹായിച്ചേക്കാം. അമിതമായി സമ്മർദം അനുഭവപ്പെടുമ്പോൾ അതിനെ അഭിമുഖീകരിക്കാതിരിക്കാൻ പലരും കിടക്കയിൽത്തന്നെ തുടരാൻ ഇഷ്ടപ്പെടുന്നു. ജീവിതത്തിലെ മറ്റ് കാര്യങ്ങളിൽ അനിശ്ചിതത്വം ഉണ്ടാകുമ്പോൾ ജോലിയിൽ മുഴുകുന്നത് ഒരു നിയന്ത്രണബോധം നൽകുമെന്ന് സൈക്യാട്രിസ്റ്റ് ഡോ. അമിത് മാലിക് വ്യക്തമാക്കുന്നു.

എന്നാൽ ഈ ആശ്വാസം പ്രശ്‌നത്തിന്റെ അടിസ്ഥാന കാരണം ഒരിക്കലും പരിഹരിക്കുന്നില്ലെന്ന് വിദഗ്ധർ ഓർമ്മിപ്പിക്കുന്നു. വിഷമം വീണ്ടും വരുമ്പോൾ അതിൽനിന്ന് രക്ഷപ്പെടാൻ വീണ്ടും അതേ ശീലങ്ങളെത്തന്നെ ആശ്രയിക്കേണ്ടി വരുന്നു. ഇത് ക്രമേണ ഗുരുതരമായ ഒരു മാനസികാവസ്ഥയായി മാറുകയും ദൈനംദിന ജീവിതത്തെ ബാധിക്കുകയും ചെയ്യുന്നു. ഈ ശീലങ്ങൾ നൽകുന്ന ആശ്വാസം തികച്ചും താൽക്കാലികം മാത്രമാണെന്ന് തിരിച്ചറിയേണ്ടതുണ്ട്.

Also Read: കാൻസർ പ്രതിരോധത്തിന് ആരോഗ്യകരമായ ഭക്ഷണം മാത്രം പോരാ; ഈ കാര്യങ്ങളും ശ്രദ്ധിക്കണം

മാനസിക വിഷമങ്ങളിൽ നിന്ന് ഒളിച്ചോടുന്നതിനുപകരം അവ തിരിച്ചറിയുകയും ആരോഗ്യകരമായി കൈകാര്യം ചെയ്യാൻ ശ്രമിക്കുകയും ചെയ്യുകയാണ് പ്രധാനം. ഇതിനായി വ്യായാമം, ഡയറി എഴുത്ത് തുടങ്ങിയ നല്ല ശീലങ്ങൾ ജീവിതത്തിൽ വളർത്തിയെടുക്കാം. വിഷമങ്ങൾ കൂടുകയാണെങ്കിൽ വൈകാതെ തന്നെ മാനസികാരോഗ്യ വിദഗ്‌ധരുടെ സഹായം തേടേണ്ടതാണ്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z