സെന്റ് ജോൺ : സാമ്പത്തിക പ്രതിസന്ധി മറികടക്കാൻ കാനഡയിലെ മെമ്മോറിയൽ യൂണിവേഴ്സിറ്റിയിൽ (എം.യു.എൻ) വൻ തോതിൽ തൊഴിൽ വെട്ടിക്കുറയ്ക്കൽ. സർവകലാശാലയുടെ ദീർഘകാല സാമ്പത്തിക സ്ഥിരത ഉറപ്പാക്കുന്നതിന്റെ ഭാഗമായി നേതൃനിര, മാനേജേഴ്സ്, ഫാക്കൽറ്റി വിഭാഗങ്ങളിലായി ആകെ 107 തസ്തികകളാണ് വെട്ടിക്കുറച്ചത്. ഇതുവഴി പ്രതിവർഷം 12.7 മില്യൺ ഡോളർ ലാഭിക്കാൻ സാധിക്കുമെന്നാണ് സർവകലാശാലാ അധികൃതരുടെ വിലയിരുത്തൽ.
കഴിഞ്ഞ വർഷങ്ങളിൽ സർവകലാശാല കടുത്ത സാമ്പത്തിക അരക്ഷിതാവസ്ഥയിലൂടെയാണ് കടന്നുപോയതെന്നും ഇത്തരം ബുദ്ധിമുട്ടേറിയ തീരുമാനങ്ങൾ അനിവാര്യമാണെന്നും എം.യു.എൻ പ്രസിഡന്റ് ജാനറ്റ് മോറിസൺ വ്യക്തമാക്കി. വിദ്യാർത്ഥികളെ ബാധിക്കാത്ത രീതിയിലാണ് നടപടികൾ ക്രമീകരിച്ചിരിക്കുന്നത്. ദീർഘകാല കാത്തിരിപ്പ് ഒഴിവാക്കാൻ ഡീൻമാർ നേരിട്ട് ഇടപെടാനും ആവശ്യമുള്ളിടത്ത് കോഴ്സുകൾ ചേർക്കാനും നിർദ്ദേശം നൽകിയിട്ടുണ്ട്. ഈ സാമ്പത്തിക വർഷം ഇനി വലിയ തോതിലുള്ള തൊഴിൽ വെട്ടിക്കുറയ്ക്കൽ ഉണ്ടാകില്ലെന്നും അധികൃതർ അറിയിച്ചു.
വെട്ടിക്കുറച്ച 107 തസ്തികകളിൽ 51 എണ്ണം വിരമിക്കലിലൂടെ ഒഴിവായതാണ്. ഇതിൽ 47 പേരും സന്നദ്ധ വിരമിക്കൽ പദ്ധതി പ്രയോജനപ്പെടുത്തിയവരാണ്. മുൻകൂട്ടി ഒഴിവ് വന്ന 37 തസ്തികകളും ഇതിൽ ഉൾപ്പെടുന്നു. വിരമിക്കലിന് അർഹതയില്ലാത്തതോ അതിന് തയ്യാറാകാത്തതോ ആയ 19 പേരെയാണ് പിരിച്ചുവിട്ടത്. സർവകലാശാലയുടെ നിലവിലുള്ള സാമ്പത്തിക ബുദ്ധിമുട്ടുകൾ പരിഹരിക്കുന്നതിനായി ഈ വർഷം നേരത്തെയും വിവിധ നടപടികൾ സ്വീകരിച്ചിരുന്നു. ജനുവരിയിൽ എക്സിക്യൂട്ടീവ് ഘടന മാറ്റി ഏഴ് വൈസ് പ്രസിഡന്റ് സ്ഥാനങ്ങൾ മൂന്നായി കുറച്ചിരുന്നു.
പ്രവർത്തനച്ചെലവ് ഉയർന്നതിനെത്തുടർന്ന് യൂറോപ്പിലെ യുകെ ക്യാമ്പസ് ഉൾപ്പെടെയുള്ള അത്യാവശ്യമല്ലാത്ത ആസ്തികൾ വിൽക്കുമെന്ന് സർവകലാശാല നേരത്തെ പ്രഖ്യാപിച്ചിരുന്നു. ഉന്നത വിദ്യാഭ്യാസ മേഖലയിലെ പ്രതിസന്ധികളും കുടിയേറ്റ നയങ്ങളിലെ മാറ്റങ്ങളും കാരണം 2030-ഓടെ വിദ്യാർത്ഥികളുടെ പ്രവേശനത്തിൽ 12 ശതമാനം വരെ കുറവുണ്ടാകാമെന്നാണ് വിലയിരുത്തൽ. കഴിഞ്ഞ വർഷം 20.85 മില്യൺ ഡോളറിന്റെ ചെലവ് ചുരുക്കൽ ബോർഡ് ഓഫ് റീജന്റ്സ് അംഗീകരിച്ചിരുന്നു. ഇതിന്റെ ഭാഗമായി വിവിധ ഓഫീസുകൾ അടച്ചുപൂട്ടുകയും ഫണ്ടുകൾ വെട്ടിക്കുറയ്ക്കുകയും ചെയ്തു. ഇത്തരത്തിലുള്ള കർശന നടപടികളിലൂടെ കഴിഞ്ഞ സാമ്പത്തിക വർഷം 2.7 മില്യൺ ഡോളറിന്റെ പ്രവർത്തന മിച്ചത്തോടെയാണ് സർവകലാശാല വർഷം അവസാനിപ്പിച്ചത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
