കാൽഗറി: ആൽബർട്ടയിൽ ഹൈവേ കേന്ദ്രീകരിച്ച് നടന്ന പരിശോധനയിൽ വൻതോതിൽ ലഹരിമരുന്ന് പിടികൂടി. കാൽഗറിയുടെ കിഴക്കുഭാഗത്ത് ഹൈവേ 1-ൽ വെച്ച് നടത്തിയ ട്രാഫിക് പരിശോധനയ്ക്കിടെയാണ് 250 ലിറ്റർ ജിഎച്ച്ബി (GHB) പോലീസ് കണ്ടെടുത്തത്. സംഭവവുമായി ബന്ധപ്പെട്ട് ഒന്റാരിയോ സ്വദേശിയായ 50 വയസ്സുകാരനെ ആർസിഎംപി (RCMP) ഉദ്യോഗസ്ഥർ അറസ്റ്റ് ചെയ്തു.
ഏപ്രിൽ 22-ന് രാവിലെ എട്ടു മണിയോടെ ആർസിഎംപിയുടെ പ്രത്യേക ട്രാഫിക് യൂണിറ്റ് വാഹനം തടഞ്ഞു നിർത്തി പരിശോധിക്കുകയായിരുന്നു. സംശയാസ്പദമായ സാഹചര്യത്തിൽ കണ്ടെത്തിയ വാഹനത്തിനുള്ളിൽ നടത്തിയ വിശദമായ തിരച്ചിലിലാണ് ഒളിപ്പിച്ച നിലയിൽ മയക്കുമരുന്ന് കണ്ടെത്തിയത്. വിപണിയിൽ ഏകദേശം 3 ലക്ഷം മുതൽ 7.5 ലക്ഷം ഡോളർ വരെ വിലമതിക്കുന്നതാണ് പിടിച്ചെടുത്ത ലഹരിമരുന്നെന്ന് ഉദ്യോഗസ്ഥർ വ്യക്തമാക്കി.
കേന്ദ്ര നാഡീവ്യൂഹത്തെ തളർത്തുന്ന മാരകമായ ലഹരിമരുന്നാണ് ജിഎച്ച്ബി. പിടിച്ചെടുത്ത അളവ് ഏകദേശം 60,000 മുതൽ 2.5 ലക്ഷം വരെയുള്ള ഡോസുകൾക്ക് തുല്യമാണെന്ന് അധികൃതർ അറിയിച്ചു. ടൊറന്റോ, ഒട്ടാവ തുടങ്ങിയ നഗരങ്ങളിലേക്ക് വിതരണത്തിനായി എത്തിച്ചതാണ് ഇതെന്നാണ് പ്രാഥമിക നിഗമനം. പ്രതിയെ ജൂൺ 11-ന് കോടതിയിൽ ഹാജരാക്കും. ലഹരിമരുന്ന് വ്യാപാരത്തിലെ സംഘടിത കുറ്റകൃത്യങ്ങളെക്കുറിച്ച് അന്വേഷണം തുടരുകയാണ്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Massive drug bust in Calgary: 250 litres of GHB seized; one person arrested
