മാനിറ്റോബ: പ്രവിശ്യയിൽ നവംബർ 1 മുതൽ ക്ലോക്കിലെ സമയം മാറ്റി ക്രമീകരിക്കുന്നത് അവസാനിപ്പിച്ച്, സ്ഥിരമായ ‘ഡേലൈറ്റ് സേവിംഗ് ടൈം’ (Daylight Saving Time) നടപ്പിലാക്കാനുള്ള സർക്കാരിന്റെ പെട്ടെന്നുള്ള തീരുമാനം പ്രാദേശിക ബിസിനസ്സുകളിലും വിവിധ സ്ഥാപനങ്ങളിലും വലിയ ആശയക്കുഴപ്പവും സാങ്കേതിക വെല്ലുവിളികളും സൃഷ്ടിക്കുന്നു. മുൻകാലങ്ങളിൽ വിന്ററിൽ ക്ലോക്കിലെ സമയം ഒരു മണിക്കൂർ പിന്നോട്ട് മാറ്റുന്ന രീതിയാണ് ഈ വർഷം മുതൽ മാനിറ്റോബ ഉപേക്ഷിക്കുന്നത്.
ക്ലോക്ക് മാറ്റത്തിന് വെറും ആറാഴ്ച മാത്രം ശേഷിക്കെ ഒക്ടോബർ അവസാനത്തോടെയാണ് പ്രവിശ്യാ ഭരണകൂടം ഈ മാറ്റം പ്രഖ്യാപിച്ചത്. ഇത്രയും കുറഞ്ഞ സമയത്തിനുള്ളിൽ ഡിജിറ്റൽ സംവിധാനങ്ങളിൽ മാറ്റങ്ങൾ വരുത്തേണ്ടിവന്നതാണ് പ്രധാന തിരിച്ചടിയായത്. റെസ്റ്റോറന്റുകൾ, ഹോട്ടലുകൾ തുടങ്ങി വിവിധ മേഖലകളിലെ സ്ഥാപനങ്ങളിൽ ഉപഭോക്താക്കൾക്കായി ഉപയോഗിക്കുന്ന ഓൺലൈൻ റിസർവേഷനുകൾ, ജീവനക്കാരുടെ ഷെഡ്യൂളിംഗ്, പോയിന്റ് ഓഫഅ സെയിൽ (POS) പേയ്‌മെന്റ് മെഷീനുകൾ എന്നിവയെല്ലാം മൂന്നാം കക്ഷി (Third-party) സോഫ്റ്റ്‌വെയറുകളെ ആശ്രയിച്ചാണ് പ്രവർത്തിക്കുന്നത്. മുൻകൂട്ടി പ്രോഗ്രാം ചെയ്ത ഈ സിസ്റ്റങ്ങൾ ഞായറാഴ്ച ഓട്ടോമാറ്റിക്കായി സമയം മാറ്റാൻ സാധ്യതയുള്ളതിനാൽ അവ നേരിട്ട് തിരുത്താനുള്ള ശ്രമത്തിലാണ് ബിസിനസ് ഉടമകൾ.
ഇന്റർനെറ്റുമായി ബന്ധിപ്പിച്ചിട്ടുള്ള മൊബൈൽ ഫോണുകൾ, കമ്പ്യൂട്ടറുകൾ എന്നിവയിലെ സമയം ‘ഗ്ലോബൽ ടൈം സോൺ ഡാറ്റാബേസ്’ (IANA) അപ്‌ഡേറ്റ് ചെയ്തതിലൂടെ സ്വയം ക്രമീകരിക്കപ്പെടുമെന്ന് മാനിറ്റോബ സർവകലാശാലയിലെ കമ്പ്യൂട്ടർ സയൻസ് പ്രൊഫസർ ഡേവിഡ് ഗെർഹാർഡ് വിശദീകരിക്കുന്നു. എന്നാൽ ഇന്റർനെറ്റ് അധിഷ്ഠിതമല്ലാത്ത പഴയ സാങ്കേതിക വിദ്യകളും ഓഫ്‌ലൈൻ സിസ്റ്റങ്ങളും ഉപയോഗിക്കുന്ന സ്ഥാപനങ്ങളിൽ സമയവ്യതിയാനം കാരണം പ്രശ്നങ്ങൾ ഉണ്ടായേക്കാം. എങ്കിലും വിമാന സർവീസുകളെയോ വലിയ പൊതുസേവനങ്ങളെയോ ബാധിക്കുന്ന ഗുരുതരമായ തിരിച്ചടികൾ ഉണ്ടാവില്ലെന്നാണ് സാങ്കേതിക വിദഗ്ദ്ധരുടെ വിലയിരുത്തൽ.
ALSO READ: ആകാശപ്പാതയിൽ ചരിത്രം കുറിച്ച് ഇത്തിഹാദ്: അബുദാബി- കാൽഗറി ആദ്യ നോൺ-സ്റ്റോപ്പ് വിമാന സർവീസ് തുടങ്ങി
യാത്രക്കാർക്ക് തടസ്സമില്ലാത്ത സേവനം ഉറപ്പാക്കാൻ വിന്നിപെഗ് എയർപോർട്ട് അതോറിറ്റി (WAA) തങ്ങളുടെ സിസ്റ്റങ്ങൾ മുൻകൂട്ടി അപ്‌ഡേറ്റ് ചെയ്തിട്ടുണ്ട്. എന്നാൽ വിമാനക്കമ്പനികളുടെ സമയം കൃത്യമായി മനസ്സിലാക്കാൻ യാത്രക്കാർ വിമാനക്കമ്പനികളുമായി നേരിട്ട് ബന്ധപ്പെടണമെന്ന് അതോറിറ്റി നിർദ്ദേശിക്കുന്നു. അതേസമയം, എൻവയോൺമെന്റ് ആൻഡ് ക്ലൈമറ്റ് ചേഞ്ച് കാനഡ തങ്ങളുടെ വെബ്‌സൈറ്റിലെ സമയ വിവരങ്ങളിൽ താത്കാലികമായി തകരാറുകൾ ഉണ്ടായേക്കാമെന്നും സിസ്റ്റം പൂർണ്ണമായി അപ്‌ഡേറ്റ് ചെയ്തുകൊണ്ടിരിക്കുകയാണെന്നും അറിയിച്ചു. ഞായറാഴ്ച വലിയ സാങ്കേതിക തടസ്സങ്ങളൊന്നുമില്ലാതെ മാറ്റം പൂർത്തിയാകുമെന്ന പ്രതീക്ഷയിലാണ് പ്രവിശ്യയിലെ വ്യാപാരികളും പൊതുജനങ്ങളും.
കൂടുതൽ ഇമിഗ്രേഷൻ വാർത്തകൾക്കായി: https://chat.whatsapp.com/FPKIxDWK4Sq59rSaUB2Jr8?s=cl&p=a&ilr=4
