വിന്നിപെഗ്: മാനിറ്റോബ പ്രവിശ്യയിൽ ഡോക്ടർമാരുടെ ക്ഷാമം പരിഹരിക്കുന്നതിൽ നിർണായക പുരോഗതിയുണ്ടായതായി ഡോക്ടേഴ്‌സ് മാനിറ്റോബയുടെ പുതിയ റിപ്പോർട്ട്. 2026-ൽ പ്രവിശ്യയിൽ 196 ഡോക്ടർമാരുടെ അറ്റ വർധനവുണ്ടായി. രേഖപ്പെടുത്തിയ ചരിത്രത്തിലെ ഏറ്റവും ഉയർന്ന പ്രതിവർഷ വർധനവാണിതെന്ന് സംഘടന വ്യക്തമാക്കുന്നു. പ്രവിശ്യ ശരിയായ ദിശയിലാണ് മുന്നേറുന്നതെന്നും ഇത് ഏറെ പ്രതീക്ഷ നൽകുന്ന വാർത്തയാണെന്നും ഡോക്ടേഴ്‌സ് മാനിറ്റോബ പ്രസിഡന്റ് ഡോ. അലോൺ ആൾട്ട്മാൻ പറഞ്ഞു. നിലവിൽ കനേഡിയൻ ഇൻസ്റ്റിറ്റ്യൂട്ട് ഫോർ ഹെൽത്ത് ഇൻഫർമേഷന്റെ കണക്കുകൾ പ്രകാരം പ്രവിശ്യയിൽ ഒരു ലക്ഷം പേർക്ക് 235 ഡോക്ടർമാർ എന്ന തോതിലുണ്ട്.
എന്നാൽ ദേശീയ ശരാശരിയായ 246 ഡോക്ടർമാർക്ക് ഒപ്പമെത്താൻ മാനിറ്റോബയ്ക്ക് 229 ഡോക്ടർമാരുടെ കൂടി കുറവുണ്ട്. ഇതിൽ ഭൂരിഭാഗവും സ്പെഷ്യലിസ്റ്റ് ഡോക്ടർമാരുടെ ക്ഷാമമാണ്. പ്രവിശ്യയിൽ 217 സ്പെഷ്യലിസ്റ്റുകളുടെ കുറവുണ്ടെന്ന് റിപ്പോർട്ട് ചൂണ്ടിക്കാണിക്കുന്നു. വയോജന ആരോഗ്യം (ജെറിയാട്രിക് മെഡിസിൻ), വാസ്കുലാർ സർജറി, ന്യൂക്ലിയർ മെഡിസിൻ, ഗ്യാസ്ട്രോഎൻട്രോളജി, കാർഡിയോളജി തുടങ്ങിയ മേഖലകളിലാണ് ഡോക്ടർമാരുടെ ദൗർലഭ്യം ഏറ്റവും രൂക്ഷം. ഇത് രോഗികളുടെ പരിശോധന വൈകുന്നതിനും ശസ്ത്രക്രിയകൾ നീണ്ടുപോകുന്നതിനും കാരണമാകുന്നുണ്ടെന്ന് ഡോ. അലോൺ ആൾട്ട്മാൻ ആശങ്ക പ്രകടിപ്പിച്ചു.
നഗര മേഖലകളെ അപേക്ഷിച്ച് ഗ്രാമീണ, വടക്കൻ മാനിറ്റോബ പ്രദേശങ്ങളിൽ ആരോഗ്യസേവനങ്ങൾ ഇപ്പോഴും പ്രതിസന്ധിയിലാണ്. സതേൺ ഹെൽത്ത്, ഇന്റർലേക്-ഈസ്റ്റേൺ റീജിയണൽ ഹെൽത്ത് അതോറിറ്റി തുടങ്ങിയ മേഖലകളിലാണ് ഏറ്റവും വലിയ വിടവുള്ളത്. ഇത് വിനിപെഗിന് പുറത്തുള്ള കുടുംബങ്ങൾക്ക് ഡോക്ടർമാരെ ലഭിക്കുന്നത് പ്രയാസകരമാക്കുന്നു. അടുത്ത മൂന്ന് വർഷത്തിനുള്ളിൽ വിരമിക്കൽ അല്ലെങ്കിൽ മറ്റ് സ്ഥലങ്ങളിലേക്ക് മാറുന്നത് മൂലം 658 ഡോക്ടർമാരെ നഷ്ടപ്പെടാൻ സാധ്യതയുണ്ടെന്നും, അതിനാൽ പുതിയ ഡോക്ടർമാരെ നിയമിക്കുന്നതിനൊപ്പം നിലവിലുള്ളവരെ നിലനിർത്തുന്നതിനുള്ള തന്ത്രങ്ങൾ വേണമെന്നും സംഘടന ആവശ്യപ്പെട്ടു.
അതേസമയം, നിലവിലെ തൊഴിൽ സാഹചര്യങ്ങളും ജോലിഭാരവും പരിഹരിച്ചാൽ മാത്രമേ ഡോക്ടർമാരെ പ്രവിശ്യയിൽ നിലനിർത്താൻ കഴിയൂ എന്ന് പ്രതിപക്ഷ കൺസർവേറ്റീവ് പാർട്ടിയുടെ ഹെൽത്ത് ക്രിട്ടിക് കാത്‌ലീൻ കുക്ക് കുറ്റപ്പെടുത്തി. എന്നാൽ 2023-ൽ എൻ.ഡി.പി സർക്കാർ അധികാരത്തിൽ വന്നതിനുശേഷം 370 പുതിയ ഡോക്ടർമാരെ നിയമിച്ചതായും, ആളോഹരി കുടുംബ ഡോക്ടർമാരുടെ എണ്ണത്തിൽ രാജ്യം മുന്നിലാണെന്നും ആരോഗ്യ മന്ത്രി ഉസോമ അസാഗ്വാര വ്യക്തമാക്കി. ഡോക്ടേഴ്‌സ് മാനിറ്റോബയുടെ റിപ്പോർട്ടിനെ അടിസ്ഥാനമാക്കി തുടർനടപടികളുമായി മുന്നോട്ടുപോകുമെന്നും മന്ത്രി കൂട്ടിച്ചേർത്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
