വിന്നിപെഗ്: മാനിറ്റോബ പ്രവിശ്യയിൽ ആഞ്ഞടിച്ച ശക്തമായ കാറ്റിൽ വ്യാപക നാശനഷ്ടം. വ്യാഴാഴ്ച ഉണ്ടായ അതിശക്തമായ കാറ്റിനെ തുടർന്ന് നിരവധിയിടങ്ങളിൽ മരങ്ങൾ കടപുഴകി വീഴുകയും വൈദ്യുതി ലൈനുകൾ തകരുകയും ചെയ്തു. പ്രവിശ്യയിലെ പ്രധാന നഗരമായ വിന്നിപെഗ്, പാർക്ക്ലാൻഡ്, വെസ്റ്റ്മാൻ എന്നീ പ്രദേശങ്ങളിലാണ് കാറ്റ് കടുത്ത നാശം വിതച്ചത്.
നിലവിൽ തെക്കൻ മാനിറ്റോബയിലെ അയ്യായിരത്തി അഞ്ഞൂറോളം ഉപഭോക്താക്കൾ പൂർണ്ണമായും ഇരുട്ടിലാണ്. പ്രവിശ്യയിലുടനീളം ഇരുന്നൂറ്റിമുപ്പതിലധികം ഇടങ്ങളിൽ വൈദ്യുതി ബന്ധം തകരാറിലായതായി ഔദ്യോഗികമായി റിപ്പോർട്ട് ചെയ്യപ്പെട്ടിട്ടുണ്ട്. കനത്ത പൊടിപടലങ്ങൾ കാരണം കാഴ്ചപരിധി കുറഞ്ഞതും ശക്തമായ കാറ്റും വ്യാഴാഴ്ച രാത്രിയിൽ മാനിറ്റോബ ഹൈഡ്രോ ജീവനക്കാരുടെ രക്ഷാപ്രവർത്തനങ്ങൾക്ക് കടുത്ത തടസ്സമുണ്ടാക്കി. തുടർന്ന് താൽക്കാലികമായി നിർത്തിവെച്ച അറ്റകുറ്റപ്പണികൾ വെള്ളിയാഴ്ച രാവിലെയോടെയാണ് വീണ്ടും പുനരാരംഭിച്ചത്. പലയിടങ്ങളിലും വൈദ്യുതി പൂർണ്ണമായി പുനഃസ്ഥാപിക്കാൻ വെള്ളിയാഴ്ച വൈകുന്നേരം വരെ സമയമെടുക്കുമെന്നാണ് അധികൃതർ വ്യക്തമാക്കുന്നത്.
വിന്നിപെഗ് നഗരത്തിൽ മാത്രം നിരവധി മരങ്ങളും വലിയ ചില്ലകളും ഒടിഞ്ഞുവീണിട്ടുണ്ട്. പാർക്ക് ചെയ്തിരുന്ന വാഹനങ്ങൾക്ക് മുകളിലേക്ക് മരങ്ങൾ മറിഞ്ഞുവീണ് വലിയ നാശനഷ്ടമുണ്ടായി. അടിയന്തര സഹായത്തിനും അവശിഷ്ടങ്ങൾ നീക്കം ചെയ്യാനുമായി നഗരസഭയ്ക്ക് ഇതിനോടകം നാൽപ്പത്തിയഞ്ചിലധികം അപേക്ഷകൾ ലഭിച്ചുകഴിഞ്ഞു. വരും ദിവസങ്ങളിൽ ശക്തമായ കാറ്റിന് സാധ്യതയുള്ളതിനാൽ, അപകടാവസ്ഥയിലുള്ള മരങ്ങളും ചില്ലകളും മുൻകൂട്ടി വെട്ടിമാറ്റാൻ ജനങ്ങൾ ശ്രദ്ധിക്കണമെന്ന് വൃക്ഷ വിദഗ്ദ്ധർ മുന്നറിയിപ്പ് നൽകുന്നുണ്ട്. റോഡുകളിൽ മരങ്ങൾ വീണുകിടക്കുന്നതിനാൽ പലയിടങ്ങളിലും ഗതാഗത തടസ്സവും നേരിടുന്നുണ്ട്. നിലവിൽ യുദ്ധകാലാടിസ്ഥാനത്തിൽ അവശിഷ്ടങ്ങൾ നീക്കം ചെയ്യാനുള്ള ശ്രമത്തിലാണ് നഗരസഭാ അധികൃതർ. Manitoba dust storm leaves downed power lines, trees, outages in its wake കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
