കാനഡയിൽ ‘ബുഫെ’ വിപ്ലവത്തിന് തുടക്കമിട്ട ജെയിംസ് ചിയു അന്തരിച്ചു; വിടവാങ്ങിയത് മാൻഡറിൻ റെസ്റ്റോറന്റ് ശൃംഖലയുടെ അമരക്കാരൻ

ബ്രാംപ്ടൺ: കാനഡയിലെ പ്രശസ്തമായ ചൈനീസ് ബുഫെ റെസ്റ്റോറന്റ് ശൃംഖലയായ ‘മാൻഡറിൻ’ (Mandarin) സഹസ്ഥാപകനും പ്രസിഡന്റുമായ ജെയിംസ് ചിയു (78) അന്തരിച്ചു. ശ്വാസകോശ സംബന്ധമായ അസുഖത്തെത്തുടർന്ന് (Pulmonary Fibrosis) ദീർഘനാളായി ചികിത്സയിലായിരുന്നു. ഏപ്രിൽ 29-നായിരുന്നു അന്ത്യമെന്ന് മാൻഡറിൻ റെസ്റ്റോറന്റ് മാനേജ്‌മെന്റ് ഔദ്യോഗികമായി അറിയിച്ചു. ഇൻസ്റ്റഗ്രാമിലൂടെയാണ് മരണവാർത്ത പുറത്തുവിട്ടത്. ഒരു സാധാരണ ഭക്ഷണശാലയെ കാനഡയിലെ ഏറ്റവും വലിയ റെസ്റ്റോറന്റ് ശൃംഖലകളിൽ ഒന്നായി വളർത്തിയെടുത്ത സംരംഭകനെയാണ് ജെയിംസ് ചിയുവിന്റെ വിയോഗത്തിലൂടെ ഒന്റാറിയോയ്ക്ക് നഷ്ടമായത്.

തായ്‌വാനിൽ നിന്ന് 1963-ൽ മാതാപിതാക്കൾക്കൊപ്പം മോൺട്രിയലിലേക്ക് കുടിയേറിയതോടെയാണ് ജെയിംസിന്റെ കാനഡയിലെ ജീവിതം ആരംഭിക്കുന്നത്. സർവ്വകലാശാലാ പഠനത്തിന് ശേഷം അതിജീവനത്തിനായി ‘സ്വീറ്റ് എൻ സോർ’ (Sweet ‘N Sour) എന്ന പേരിൽ ആരംഭിച്ച ചെറിയ ഭക്ഷണശാലയാണ് അദ്ദേഹത്തിന്റെ കരിയറിൽ വഴിത്തിരിവായത്. പിന്നീട് 1979-ൽ കുടുംബാംഗങ്ങൾക്കും സുഹൃത്തായ കെ.സി. ചാങ്ങിനുമൊപ്പം ഒന്റാറിയോയിലേക്ക് താമസം മാറിയ ജെയിംസ്, ബ്രാംപ്ടണിലെ ക്വീൻ സ്ട്രീറ്റിലുള്ള ‘മാൻഡറിൻ’ എന്ന ചെറിയ റെസ്റ്റോറന്റ് ഏറ്റെടുത്തു. മികച്ച സേവനവും ഗുണമേന്മയുള്ള ഭക്ഷണവും കൊണ്ട് ചുരുങ്ങിയ കാലം കൊണ്ടുതന്നെ മാൻഡറിൻ ജനശ്രദ്ധ നേടി.

തിരക്കേറിയതോടെ ഉപഭോക്താക്കളെ ഉൾക്കൊള്ളുന്നതിനായി 1986-ലാണ് മാൻഡറിൻ റെസ്റ്റോറന്റ് ‘ഓൾ യു കാൻ ഈറ്റ്’ എന്ന ബുഫെ രീതിയിലേക്ക് മാറിയത്. ഈ മാറ്റം റെസ്റ്റോറന്റിന്റെ ചരിത്രം തന്നെ മാറ്റിമറിച്ചു. ജെയിംസിന്റെ ദീർഘവീക്ഷണവും കഠിനാധ്വാനവും മാൻഡറിനെ ഒന്റാറിയോയിലുടനീളം 29 ശാഖകളുള്ള വൻ ശൃംഖലയാക്കി വളർത്തി. ഭക്ഷണത്തോടുള്ള അഭിനിവേശത്തിനൊപ്പം ഉപഭോക്താക്കൾക്ക് നൽകിയ ആത്മാർത്ഥമായ പരിഗണനയുമാണ് അദ്ദേഹത്തെ മറ്റ് സംരംഭകരിൽ നിന്ന് വ്യത്യസ്തനാക്കിയത്.

കുടുംബത്തോടും സമൂഹത്തോടും അതീവ സ്നേഹം പുലർത്തിയിരുന്ന ജെയിംസ് ചിയു, തന്റെ നർമ്മബോധം കൊണ്ടും വിവേകം കൊണ്ടും ഏവർക്കും പ്രിയപ്പെട്ടവനായിരുന്നുവെന്ന് കുടുംബം അനുസ്മരിച്ചു. “ഞങ്ങൾക്ക് ഒരു മികച്ച ബിസിനസ് ഐക്കണിനെ മാത്രമല്ല, സമൂഹത്തിന് തന്നെ മാതൃകയായ ഒരു മനുഷ്യസ്നേഹിയെയാണ് നഷ്ടമായിരിക്കുന്നത്. മികച്ച ഭക്ഷണത്തോടുള്ള അദ്ദേഹത്തിന്റെ കാഴ്ചപ്പാട് വരുംതലമുറകൾക്കും പ്രചോദനമായി നിലനിൽക്കുമെന്ന് മാൻഡറിൻ റെസ്റ്റോറന്റ് പുറത്തിറക്കിയ കുറിപ്പിൽ പറയുന്നു. കാനഡയിലെ ചൈനീസ് ഭക്ഷണ സംസ്കാരത്തിന് പുതിയ മുഖം നൽകിയ ജെയിംസ് ചിയുവിന്റെ വിയോഗത്തിൽ പ്രമുഖർ അനുശോചനം രേഖപ്പെടുത്തി.

mandarin-restaurant-co-founder-dies-after-battle-with-pulmonary-fibrosis

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt